1 Abamwene 11 - IBAYIBOLO 2024

Ukunanga ukwa Solomoni

¹ U Solomoni akabaghana abakolo abinji abayeni ukonjelezyapo nu mwana umulindu uwa Falabo. Akasenda sona abakolo aba mu Mowabu naba mu Amoni naba mu Edomu naba mu Sidoni sona naba mu Hiti.

² Abakolo banaba bakaba ba inko zizyo u Mwene akabalamula aba Izilayeli ukuti, “Mutakasendelanaye na bantu banaba, pachifukwa ichakuti abakolo banaba bangabapela abanavuli aba ukuti biputaye abachala abanji.” Pope bulo u Solomoni akabaghana nkani abakolo bala.

³ U Solomoni akasenda abakolo 700, babo bakaba bana aba bamwene, nukuba sona na bachi abazya 300, po abachi bache bala bakamusovya.

⁴ Bo u Solomoni aghosipa, abachi bache bala bakamudeba pakubiputa abachala abanji, nukuleka pakumusubila u Mwene u Chala wache ukuyana namumo uwise u Devedi akabombelagha.

⁵ U Solomoni akamwiputagha u Ashitoleti uchala umukolo uwa ba Sidoni, sona nu Moleki, uchala umukozya isoni uwa ba Amoni.

⁶ Po u Solomoni akabomba ivintu ivibibi pamaso pa Mwene, umwakuti atakamwivwila u Mwene nu moyo wache ghosi ukuyana namumo uwise u Devedi akabombelagha.

⁷ U Solomoni akazenga ubuzilo ubwa kumwiputilapo u Kemoshi pighamba ilya kubufumilo bwizuba ubwa Yelusalemu, yuyo akaba we chala umukozya isoni uwa ba Mowabu, sona nu Moleki uchala umukozya isoni uwa ba Amoni.

⁸ U Solomoni akabazengela abachi bache abayeni ubuzilo ubwakufukizizyapo utwakununkila nu bwakubikilapo ivyakwiyipa ku bachala babo.

⁹ U Mwene akamukalalila u Solomoni pachifukwa ichakuti umoyo wache ghukepako kwa Mwene, u Chala uwa ba Izilayeli yuyo akamubonekela kabili.

¹⁰ Napapo u Mwene akamulamula u Solomoni ukuti atakabiputaye abachala abanji, loli u Solomoni atakivwila zizyo u Mwene akamulamula.

¹¹ Po u Mwene akamubuzya u Solomoni akati, “Pachifukwa ichakuti utakalusunga ulufingo lulo ukafingana nane, sona na malamulo ghagho nkakulamula, nkwiza pakukufyula ubumwene bwako nukumupa weka uwa makambala ghako.

¹² Pachifukwa icha ghuso u Devedi, ntakwiza pakuzibomba zinizi bo uchili we mumi. Loli nkwiza pakubwefya pakabalilo aka mwana wako.

¹³ Ntakwiza pakumufyula umwana wako ubumwene bosi, loli nkwiza pakumulekela uluko loka pachifukwa icha mubombi wane u Devedi, sona na pachifukwa icha Yelusalemu akaya kane akakulu nkani akasaliwa.”

Abalwani aba Solomoni

¹⁴ Po u Mwene akamupela u Hadadi umu Edomu pakuba mulwani uwa Solomoni. U Hadadi akaba wa munyumba iya bumwene.

¹⁵ Pakabalilo kako u Devedi akalwanga ubwite naba Edomu, u Yowabu usongo uwa basilikali akabuka pakubasyila abantu babo bakaghoghiwa pabwite, po akabaghogha abanavuli bosi mu Edomu.

¹⁶ U Yowabu poka naba Izilayeli bosi bakasyalikila kulakula amezi sikisi, mupaka bakabaghogha abanavuli bosi mu Edomu.

¹⁷ Loli u Hadadi, yuyo akaba achili mulumendo, akachimbilila ku Ijiputi poka na makambala ghagho ghakamubombelagha u wise mu Edomu.

¹⁸ Bakanyamuka ku Midiyani nukubuka ku Palani. Bakabasenda abantu ku Palani nukubuka nabo ku Ijiputi kwa Falabo u mwene uwa Ijiputi, yuyo akamupa u Hadadi inyumba nu buzilo sona nichakulya.

¹⁹ U Falabo akahoboka nkani nu Hadadi umwakuti akamupa umukoyi wache, u mwene umukolo u Tapenesi pakuba muchi wache.

²⁰ Po u mwene umukolo yula akamupapila u Hadadi umwana umulumendo, itabwa lyache akaba we Genubati, yuyo u Tapenesi akamulelela munyumba iya bumwene. Kulakula u Genubati akikalagha poka na bana aba Falabo.

²¹ Bo u Hadadi ali mu Ijiputi akivwa ukuti u Devedi afuye, sona nukuti usongo uwa basilikali u Yowabu wepe afuye. Po u Hadadi akamubuzya u Falabo akati, “Leka imbwelaye kukaya.”

²² Loli u Falabo akamulalusya akati, “Nkimba ukusobelwa ichoni kuno, umwakuti ukulonda ukuti ubwele?” U Hadadi akamula akati, “Nachimochimo. Loli leka imbwelaye.”

²³ Po u Chala akamupela sona u Lezoni umwana uwa Eliyada, yuyo akamuchimbila u mwene wache, u mwene u Hadadezeli uwamu Zoba pakuba mulwani uwa Solomoni.

²⁴ U Lezoni akabunganika akabukatila aka mavyondongo nukuba mulongozi wabo. Zinizi zikabombiwa bo u Devedi abapota abasilikali aba mu Zoba. Po amavyondongo ghala ghakabuka ku Damasika pakukafyula akaya kala nukwikala mulamula.

²⁵ U Lezoni akaba mulwani uwa ba Izilayeli pa kabalilo kosi aka Solomoni, ukonjelezya pantamyo zizyo u Hadadi akabapelela aba Izilayeli. Po u Lezoni akalaghila mu Siliya, sona akaba mulwani uwa ba Izilayeli.

U Chala akumulayizya u Yelobowamu

²⁶ U Yelobowamu umwana uwa Nebati uwamu Zeleda muchisu icha Efulayimu likaba likambala ilya Solomoni. Unyina akaba we Zeluwa sona akaba mukolo umufwilwe. Po wepe akamusambukila u mwene u Solomoni.

²⁷ Ili lyo lipangwi ilya mumo akamusambukila u mwene: U Solomoni akazenga amakwelelo amakulu agha mabwe nukuzenga sona ulupaso lulo lukamongoka, ulwa kaya akakulu nkani aka wise u Devedi, kako kakaba chigaba chimo icha kaya akakulu nkani aka Yelusalemu.

²⁸ U Yelobowamu akaba muntu umumanyikwe sona mujivu. Bo u Solomoni ennya ukuti umulumendo yula akaba wakwiyula, akamubika ukuti abanje we kapitwa uwakwenelezya imbombo izyakufyengiwa bulo pakasi pabantu abaluko ulwa Yosefu.

²⁹ Pakabalilo kalakala bo u Yelobowamu epamo mu Yelusalemu, umulaghuzi u Ahiya uwamu Shilo akakomana nawe pamusebo. U Ahiya yula akavwala inkazo impya. Abantu babili banaba bakaba bulo bene kuzi ukwa kaya.

³⁰ Po u Ahiya akayilema inkazo yache impya yila nukuyizepulannya mutugaba 12.

³¹ Akamubuzya u Yelobowamu akati, “Senda utugaba 10 utu, pakuti u Mwene u Chala uwa ba Izilayeli ati, ‘Nkwiza pakumufyula u Solomoni ubumwene nukukupa inko teni.

³² Loli pachifukwa icha mubombi wane u Devedi, sona nakaya akakulu nkani aka Yelusalemu, kako nakasala pakasi panko izya Izilayeli, nkwiza pakumulekela bulo uluko loka.

³³ Nkwiza pakubomba bunubu pachifukwa ichakuti bankana nukumwiputa u Ashitoleti uchala umukolo uwa ba Sidoni nu Kemoshi uchala uwa ba Mowabu, sona nu Moleki uchala uwa ba Amoni. Abantu banaba batakabomba vivyo nkabalamula, pamo ukubomba ivintu ivigholosu pamaso papane, pamo ukuzikonka indaghilo na malamulo ghane ukuyana namumo uwise uwa Solomoni u Devedi akabombelagha.

³⁴ “ ‘Ntakwiza pakumufyula u Solomoni ubumwene bosi, loli akwiza pakuba mulaghili pakabalilo kache kosi aka bumi bwache pachifukwa icha mubombi wane u Devedi, yuyo nkamusala. U Devedi akakonka indaghilo na malamulo ghane.

³⁵ Nkwiza pakumufyula ubumwene umwana wache nukukupa inko teni.

³⁶ Loli nkwiza pakumulekela umwana wache uluko loka, umwakuti umubombi wane u Devedi alaghilaye mu Yelusalemu, mukaya akakulu nkani kako nakasala ukuti bubanje buzilo ubwa kunchindikilamo.

³⁷ Nkwiza pakukupakazya awe Yelobowamu ukuti ubanje we mwene uwa Izilayeli, sona ukwiza pakulaghilagha muchisu chosi ukuyana namumo ukulondela.

³⁸ Nanti ukuzikonka indaghilo na malamulo ghane, sona na nanti ukubomba ivintu ivigholosu pamaso papane ukuyana namumo umubombi wane u Devedi akabombelagha, nkwiza pakuba nawe. Nkwiza pakubwikazya ubumwene bwako ukuyana namumo nkabwikazizya ubumwene ubwa Devedi, sona ukwiza pakuba we mwene uwa Izilayeli.

³⁹ Pachifukwa icha kunanga ukwa Solomoni, nkwiza pakubafunda abaluko ulwa Devedi, loli ntakwiza pakubafunda bwila na bwila.’ ”

⁴⁰ U Solomoni akayezya nkani ukuti amughoghe u Yelobowamu, loli Yelobowamu akachimbilila kwa mwene u Shishaki mu Ijiputi nukwikala kulakula mupaka u Solomoni akafwa.

Ubufwe ubwa Solomoni

⁴¹ Imbombo zyosi zizyo u Solomoni akabomba pabulaghili bwache, ni vintu vyosi, na mahala ghache visimbiwe mwibuku ilya Mbili iya Solomoni.

⁴² U Solomoni akabalaghila aba Izilayeli amaka 40 bo ali mu Yelusalemu.

⁴³ Pisinda pache u Solomoni akafwa, po bakamusyila mukaya akakulu nkani aka wise u Devedi, chicho chikaba chigaba chimo icha kaya akakulu nkani aka Yelusalemu. Umwana wache u Lehobowamu akamupyana pakuba we mwene.