1 Abamwene 1 - IBAYIBOLO 2024

U Mwene u Devedi mubughosi bwache

¹ U mwene u Devedi akaghosipa nkani, napapo abambombo bache bakamuvwinkagha amabulanketi, pope bulo atakivwa ubutukizu.

² Po abambombo bache bakamubuzya bakati, “Wee mwene buli tukulondele umulindu yuyo ataghonitepo nu mwanavuli uwakuti akubombelaye nukukusungilila akiza. Umulindu yunuyu angakufukatila umwakuti awe we mwene witu ungivwa ubutukizu.”

³ Bakamulondelezya umulindu uwakuboneka akiza nkani muchisu chosi icha Izilayeli. Po bakamwagha u Abishagi umu Shunami nukwiza nawe kwa mwene.

⁴ Umulindu yula akaba wakuboneka akiza nkani. Akamubombelagha u mwene nukumusungilila akiza, loli u mwene atakaghona nawe.

U Adoniya iyimika pakuba we mwene

⁵ Pakabalilo kalakala u Adoniya yuyo unyina akaba we Hagiti akanda pakwituvya nukuti, “Ane nkwiza pakuba ne mwene.” Po akibunganikila mwene ingolo izya bwite, ni falasi, sona na bantu 50 abakumusindikila.

⁶ Uwise u Devedi atakamwikazyapo pasi nukumulalusya ukuti, “Nkimba choni chicho ukubomba bunubu?” U Adoniya akaba muntu wakuboneka akiza nkani, sona akakonka pa Abisalomu.

⁷ U Adoniya akivwana nu Yowabu yuyo unyina akaba we Zeluya, poka nu muputi u Abiyatala, po bakitika pakumwavwa.

⁸ Loli umuputi u Zadoki nu Benaya umwana uwa Yehoyada nu mulaghuzi u Natani nu Shimeyi, sona nu Leyi, poka na basilikali abamaka aba Devedi batakaba poka nu Adoniya.

⁹ Isiku limo u Adoniya akabikagha ichakwiyipa icha ng'ozi ni ng'ombe, sona ni ngwata inyine pibwe ilya Zoheleti papipi nakaya akakulu aka Eni Logeli. Akabitizya abawamwabo bosi, babo bakaba bana abamwene, poka na makambala ghosi agha mwene mu Yuda.

¹⁰ Loli atakamwitizya umulaghuzi u Natani nu Benaya, pamo abasilikali abamaka aba Devedi, pamo uwamwabo u Solomoni.

¹¹ Po u Natani akamulalusya u Batisheba, unyina uwa Solomoni akati, “Nkimba utivuye ukuti u Adoniya yuyo unyina we Hagiti iyimika pakuba we mwene, ukusita u mwene witu u Devedi ukuzimanya?

¹² Polelo zagha nkubuzye amahala namumo ungabupokela ubumi ubwako, sona nubwa mwana wako u Solomoni.

¹³ Buka kwa mwene u Devedi nukumulalusya uti, ‘Wee mwene wane, nkimba utakandapizya ukuti umwana wane u Solomoni akwiza pakukupyana, sona nukuti akwiza pakwikala pachitengo icha bumwene? Po nkimba choni chicho u Adoniya apyana kale ubumwene bwako?’

¹⁴ Bo uchili uli palapala pakunena nu mwene, ane nkwiza pakwinjililapo pakusimikizya zizyo ukunena.”

¹⁵ Po u Batisheba akinjila muchipinda pakumulamuka u mwene, mumo u Abishagi umu Shunami akamubombelagha. Pakabalilo kalakala u mwene akaba mughosi nkani.

¹⁶ U Batisheba akafughama pantazi pa mwene. Po u mwene akamulalusya akati, “Nkimba ukulonda nkubombele ichoni?”

¹⁷ Umukolo yula akati, “Wee mwene wane, awe ukandayizya ni chilapo ane ne wambombo wako pamaso pa Mwene u Chala wako ukati, ‘Umwana wako u Solomoni akwiza pakukupyana nukwikala pachitengo chane.’

¹⁸ Loli u Adoniya iyimika kale pakuba we mwene, napapo awe we mwene wane utakuzimanya.

¹⁹ Abika ivyakwiyipa ivya ing'ombe ni ngwata inyine sona ni ng'ozi inyinji nkani. Abitizya abana bosi abamwene poka nu muputi u Abiyatala sona nu Yowabu usongo uwa basilikali, loli atakamwitizyapo umubombi wako u Solomoni.

²⁰ Wee mwene wane, aba Izilayeli bosi bakulindilila ukuti ufumusye umuntu yuyo akwiza pakukupyana.

²¹ Nanti awe we mwene watuleka, nkimba ane poka nu mwana wane u Solomoni tukwiza pakupimiwa ngati twe bantu abakusambuka?”

²² Bo u Batisheba achili akunena nu mwene, umulaghuzi u Natani akafika.

²³ U mwene akabuziwa ukuti, “Umulaghuzi u Natani iza.” Po u Natani akiza pamaso pa mwene nukufughama bo icheni chache chikotamiye pasi.

²⁴ U Natani akamulalusya u mwene akati, “Wee mwene wane, nkimba ufumusizye ukuti u Adoniya weyuyo akwiza pakukupyana nukwikala pachitengo chako?

²⁵ Umusanya ughu abika ivyakwiyipa ivya ng'ombe ni ngwata inyine sona ni ng'ozi inyinji nkani. Abitizya abana bako bosi poka nu Yowabu usongo uwa basilikali sona nu muputi u Abiyatala. Losi ulu bali pakulya nukung'wela poka nawe sona bakuti, ‘Tukukulondela ubumi ubutali, wee mwene Adoniya!’

²⁶ Loli ane ne wambombo wako pamo umuputi u Zadoki pamo u Benaya pamo umubombi wako u Solomoni atakatwitizyako.

²⁷ Wee mwene wane, nkimba wewe witikizya zinizi ukusita ukutubuzya aswe twe babombi bako nizya muntu yuyo akwiza pakukupyana?”

U Devedi akumwimika u Solomoni pakuba we mwene

²⁸ U mwene u Devedi akati, “Munyitizizyeko u Batisheba.” Po u Batisheba akiza nukwimilila pamaso pa mwene.

²⁹ U mwene akalapa ichilapo akati, “Naloli nkulapa pamaso pa Mwene yuyo ampoka muntamyo zyosi.

³⁰ Ilelo nkwiza pakuzibomba naloli zizyo nkalapa pamaso pa Mwene, u Chala uwa ba Izilayeli ukuti umwana wako u Solomoni akwiza pakumpyana nukwikala pachitengo chane icha bumwene.”

³¹ Po u Batisheba akafughama pamaso pa mwene, bo icheni chache chikotamiye pasi nukuti, “Wee mwene wane nkukulondela ubumi ubutali!”

³² U mwene u Devedi akati, “Munyitizizyeko umuputi u Zadoki nu mulaghuzi u Natani nu Benaya umwana uwa Yehoyada.” Bosi bakiza pamaso pa mwene,

³³ po u mwene akababuzya akati, “Mubasende abambombo bane nukumukwezya umwana wane u Solomoni pampunda yane, po mubuke nawe ku Gihoni.

³⁴ Kulakula umuputi u Zadoki nu mulaghuzi u Natani bamupakazye amafuta ukuti abanje we mwene uwa chisu icha Izilayeli. Mulizye amapati nukukolomoka ukuti, ‘Wee mwene u Solomoni tukukulondela ubumi ubutali.’

³⁵ Mumukonkaye mwisinda, po ize kuno ikale pachitengo chane icha bumwene, nukulaghila mubuzilo bwane. Pakuti namusala ukuti alaghilaye ichisu icha Izilayeli nicha Yuda.”

³⁶ U Benaya umwana uwa Yehoyada akamula akati, “Momumo! U Mwene u Chala wako itikizye ukuti zibanje bunubu.

³⁷ U Mwene akaba nawe, po umwakuyana bulo abanje nu Solomoni nukubupela ubumwene bwache pakuba bukulu nkani ukubuchila ubumwene bwako.”

³⁸ Po umuputi u Zadoki nu mulaghuzi u Natani, sona nu Benaya umwana uwa Yehoyada, poka naba Keleti, naba Peleti bakamukwezya u Solomoni pampunda iya mwene u Devedi nukumusindikila ku Gihoni

³⁹ Kulakula umuputi u Zadoki akasenda ibotolo ilya mafuta aghakupakazya agha misyunguti muchisakasa icha Mwene nukumupakazya u Solomoni. Po bakalizya amapati, sona abantu bosi bakakolomoka bakati, “Wee mwene u Solomoni tukukulondela ubumi ubutali!”

⁴⁰ Po abantu bosi bakamukonka mwisinda, bo bakulizya amalonji nukusekela ukukulu nkani, umwakuti ichisu chikaneng'ena pachifukwa icha chongo chilachila.

⁴¹ U Adoniya na bayeni bache bosi babo bakaba poka nawe palusekelo lula bakivwa ichongo chila, bo bamala pakusekela. U Yowabu akivwa ipati, po akalalusya akati, “Nkimba ichongo chosi chicho chili mukaya akakulu nkani aka cha choni?”

⁴² Bo achili akunena, u Yonatani umwana uwa muputi u Abiyatala akafika. Po u Adoniya akati, “Injila, awe we muntu umwiza nkani, lumo wiza ni pangwi ilyiza.”

⁴³ U Yonatani akamula akati, “Awe! U mwene witu u Devedi amwimika u Solomoni pakuba we mwene.

⁴⁴ Akamutuma umuputi u Zadoki nu mulaghuzi u Natani, sona nu Benaya umwana uwa Yehoyada, poka naba Keleti, na Peleti ukuti bamukwezye u Solomoni pampunda iya mwene.

⁴⁵ Po umuputi u Zadoki nu mulaghuzi u Natani bakamupakazya amafuta mu Gihoni pakuba we mwene. Losi ulu abantu bali pakusekela, cho chifukwa wivwanga ichongo mukaya akakulu nkani aka.

⁴⁶ Pamwanya pavyosi u Solomoni weyuyo ikaye pachitengo icha bumwene.

⁴⁷ Amakambala ghosi agha mwene ghiza pakumupala u mwene witu u Devedi ukuti, ‘U Chala wako alikwezye itabwa ilya Solomoni ukuchila itabwa lyako, sona ubumwene bwache bubanje bukulu nkani ukubuchila ubwako.’ U mwene u Devedi akafughama nukwanda pakwiputa bo ali pachitala chache.

⁴⁸ Po akati, ‘Apaliwanje u Mwene u Chala uwa ba Izilayeli, yuyo anyitikizya ukuti ilelo imwennye umuntu yuyo akwiza pakwikala pachitengo chane icha bumwane.’ ”

⁴⁹ Bunubu abayeni bosi aba Adoniya bakanda pakutetema nubogha, po bosi bakasatana.

⁵⁰ Loli u Adoniya akanda pakumunyila nkani u Solomoni, po akinjila mu Chisakasa icha Mwene pakulema impembe izya chighemo.

⁵¹ U Solomoni akabuziwa ukuti, “U Adoniya akukunyila nkani, umwakuti alemite impembe izya chighemo. Akunena akuti, ‘U mwene u Solomoni alape ilelo ukuti atakwiza pakungogha ane ne wambombo wache nupanga.’ ”

⁵² U Solomoni akamula akati, “Nanti angaba muntu musubiliwa, ntakwiza pakumubombela nachimochimo ichintu ichibibi, loli nanti aghiwa ukuti muntu mubibi, akwiza pakughoghiwa.”

⁵³ U mwene u Solomoni akabatuma abantu, po bakamwefyapo u Adoniya pachighemo pala. U Adoniya akiza nukufughama pamaso pa mwene u Solomoni. Po u Solomoni akamubuzya akati, “Bwelagha.”