ZAKARIA 6 - IBIBILIA INDAKATIFU MU LUTIRICHI LWITAKHO NENDE LWISUKHA

Malolo ka Makaare ki Liihe Kane

¹ Naheenza khandi ikulu nindola makaare ki liihe kane, nikarulanga hakari hi vikulu vivili vialolekhanga khuli vialombwa khu mukasa.

² Likaare liliihe liu khuraanga liakhweswangwa ni tsifarasi tsimuuchi, likaare lia khavili ni tsifarasi tsimwamu,

³ likaare liliihe lia khavaka ni tsifarasi tsindavu, khandi lia khane ni tsifarasi tsiu vutavala.

⁴ Nalwo lwa nareeva injelosi yali nilomolome khwinzi, “Yivi mwami wanje, ni shina shia makaare kiliihe yaka kamanyinyanga?”

⁵ Nalwo lwa injelosi yanjipa, “Makaare kiliihe yaka kali khuli vushindu khurula mu tsimbeka tsine khulilova. Kali nikarula khurumishila Mwami Nyasaye wamihanga shia havundu hosi khulilova.”

⁶ Likaare liliihe li tsifarasi tsimwamu litsitsanga mu shivala shili ivuluka, li tsifarasi tsindavu litsitsanga imbo, khandi li tsifarasi tsiu vutavala litsitsanga mu shivala shili ikuvanda.

⁷ Lwa tsifarasi tsiu vutavala tsi tsingulu tsiarulaho, tsiali ni shinani shiu khurunishitsa khulu khumanya kakholekhanga shia havundu hosi khulilova. Nalwo lwa injelosi yavoola, “Simushi mutsi khuruna mumanye kakholekhanga khulilova!” Manitsikhola ndio.

⁸ Injelosi yali nilomolome khwinzi yanaanga, nivoola, “Tsifarasi tsiasimukha nitsitsia ivuluka mu shivala shia Banilonia tsimali khuchehitsa vurima vu Mwami Nyasaye.”

Lilako liu Khwamihitsa Yoshwa

⁹ Mwami Nyasaye yambolela,

¹⁰ “Vukula vihanwa via Helidai, Tobia, nende Yedaya, nivali vandu vachelele khurula mu vuhaambe Babilonia; tsia vwangu nunundi mu inzu ya Yosia mwana wa Zefania.

¹¹ Valiitsa khukhuha ifetsa nende itsahabu, yu khulomba itaachi, ya ufwala khu murwi kwa Yoshwa mwana wa Yehozadaka, wali Mukali wa vasalisi voosi.”

¹² Ulamuvoolela, “Mwami Nyasaye wi Mikaanda Chiliihe avoolanga, ‘Mundu ulaangwangwa Lusia lu musala ali hanu; shichila aliitsa khurulila havundu hehe hava nali, nu khumbakha vuyia Litempeli liu Mwami Nyasaye.

¹³ Neye uliitsa khumbakha vuyia Litempeli lianje inzi Mwami Nyasaye. Aliitsa khuheelwa luyali khuli lu mwami yenyekhanga khuheelwa nu khwamiha vandu veve. Musalisi aliitsa khwikhala himbi khu shisoko shieshie shiu vwami; vo vavili valiitsa khuhulishitsana, khali vamenye mu milembe.

¹⁴ Itaachi iliitsa khuva mu Litempeli liu Mwami Nyasaye khuli shindu shia Helidai, Tobia, Yedaya nende Yosia mwana wa Zefania valiitsa khwitsushitsilakhu.’

¹⁵ “Vandu khurula ihale wene valiitsa khwitsa khukhonyana muhinzilu ku khumbakha Litempeli liu Mwami Nyasaye; nalwo lwa muliitsa khumanya ndi Mwami Nyasaye wi Mikaanda Chiliihe neye wanduma khu munyi. Yaka kaliitsa khwikholekha, niiva muliitsa khulonda nu mwoyo kwosi malako ku Mwami Nyasaye, uli Nyasaye wenyu!”