ZAKARIA 3 - IBIBILIA INDAKATIFU MU LUTIRICHI LWITAKHO NENDE LWISUKHA

Malolo ka Khane

¹ Mwami Nyasaye yamanyinya mu malolo kandi Mukali wa vasalisi voosi Yoshwa, wali nasinjile imbeli wi injelosi yeye; khandi Shetani yali nasinjile khuluveka lu mukhono musatsa kwa Yoshwa khumuyaala.

² Injelosi yu Mwami Nyasaye yavoolela Shetani, “Shetani, Mwami Nyasaye akhukondeshele! Mwami Nyasaye warovola Yerusalemi akhukondeshele! Mundu uyu ali vutswa khuli shisala shiarulitswa mu mulilu!”

³ Khulitukhu lienelo, Mukali wa vasalisi voosi Yoshwa yali nasinjile imbeli wi injelosi, niyifwali tsinguvu tsihuunyanga likuunda.

⁴ Nalwo lwi injelosi yavoolela vandu vali nivasinjile imbeli wa Yoshwa, “Navuli Yoshwa tsinguvu tsihuunyanga likuunda.” Injelosi yeneyo yavoolela Yoshwa, “Lola, mali khurulitsaho vwoni vwovwo; khandi nzitsanga khukhufwala tsinguvu tsindahi tsimpia.”

⁵ Nalwo lwa yavavoolela, “Mufwali shilemba shiyia khu murwi kwekwe.” Vamufwala shilemba shiyia khu murwi kwekwe, khandi nivamufwala tsinguvu. Injelosi yu Mwami Nyasaye nisinjileho.

⁶ Injelosi yu Mwami Nyasaye yasuuvilitsa Yoshwa, nivoola,

⁷ “Mwami Nyasaye wi Mikaanda Chiliihe avoolanga, ‘Niiva uliitsa khulonda malako kaanje nu khukhola mihinzilu chia nakhuha, nalwo lwa uliitsa khutsililila khusinjilila Litempeli lianje halala ni tsilwanyi tsialio. Niitsa khuhulila lisaala liolio, khuli mbulilanga lisaala li tsinjelosi tsisinjilanga imbeli wanje.

⁸ Yivi Mukali wa vasalisi voosi Yoshwa, nende vasalisi veshie vikhale imbeli wowo, vali khuli shimanyilu shi vindu vilahi viliitsa khwitsa, numuyaanza mumbulishitsi: Niitsa khulera murumishi wanje uli khuli Lusia lu musala.

⁹ Mbikhanga imbeli wa Yoshwa lichina lilala, lili ni tsimbeka saba. Niitsa khuchora muhuuli khulio, ndulitsiho vwoni vwa vandu vi shivala yishi khulitukhu lilala lionyene. Inzi Mwami Nyasaye wi Mikaanda Chiliihe mali khuvoola.

¹⁰ Khulitukhu lienelo, shia mulala khu munyi aliitsa khwinjilitsa mureende wewe, khwitsa khwikhoyela milembe nende vulindi vulahi mu mulimi kwekwe kwi misabibu nende mikhuyu.’ ”