ZAKARIA 14 - IBIBILIA INDAKATIFU MU LUTIRICHI LWITAKHO NENDE LWISUKHA

Yerusalemi nende Vandu vi Tsimbia Tsindi

¹ Loli, litukhu liu Mwami Nyasaye aliitsa khwikhala khu shisoko shieshie shiu khukhalachila lili himbi khutukha. Nalwo lwi litaala likali lia Yerusalemi liliitsa khuyaaywa shia shindu shiosi, khandi vindu via valiitsa khuva nivayaayi vilikavanwa nivalolanga.

² Mwami Nyasaye aliitsa khulera halala vandu vi tsimbia tsiosi, khwitsa khukwana litaala likali lia Yerusalemi. Litaala likali liliitsa khuvukulwa khandi tsinzu khuyaaywa, ma vandu vakhali vanyerwi. Inusu ya vandu vamenyamu, valiitsa khuhilwa mu vuhaambe, navutswa valiitsa khuva nivarikale, shivaliitsa khurulitswa mu litaala likali tawe.

³ Nalwo lwa Mwami Nyasaye aliitsa khutsia khukwana vandu vi tsimbia tsienetso khuli akwananga khulitukhu liliihe.

⁴ Mumatukhu kenako, Mwami Nyasaye aliitsa khusinjila khu Shikulu shia Misayituni, khuluveka luli ivukwi wa Yerusalemi. Nalwo lwi Shikulu shia Misayituni shilitsa khwatikhanamu hali khavili khurula ivukwi khutukha imbo khuve nu luhoongo lukalamu hakari. Inusu indala yi shikulu iliitsa khwisuunda ivuluka, na inusu yindi khwisuunda ikuvanda.

⁵ Muliitsa khwilushila mu luhoongo lwa hukhanyinyanga shikulu hali khavili. Muliitsa khwilukha khuli vakuuka venyu vakhola lwi shivala shiatechela mumatukhu ku Mwami Uzia wa Yuda. Nalwo lwa Mwami Nyasaye, uli Nyasaye wanje aliitsa khwitsa halala na vatakatifu veve voosi.

⁶ Khulitukhu lienelo, vulavu, vushindu inoho imparafu shiviliitsa khuvakhuho tawe.

⁷ Litukhu liliitsa khuva liraambi (Mwami Nyasaye neye umanyi kenako), shikali mbasu nende vutukhu tawe, shichila khuliitsa khuva nu vulavu halukolovo.

⁸ Khulitukhu lienelo, matsi kahaananga vulamu kaliitsa khurundukha khurula mu Yerusalemi, inusu ya matsi kenako kaliitsa khutsia khuluveka luli ivukwi, na inusu yindi khutsia imbo. Kaliitsa khutsililila ndio mumatukhu ki shimiyu nende vushindu.

⁹ Nalwo lwa Mwami Nyasaye aliitsa khuva mwami vuli shia havundu hosi khulilova. Khulitukhu lienelo, Mwami Nyasaye aliitsa khuva mulala wonyene khandi valiitsa khusaala khuvirila khu lira lielie wonyene.

¹⁰ Lusomo lwosi khuraanjila mu litaala lia Geba lili ivuluka khutukha havundu halaangwangwa Rimoni, nali ikuvanda haliitsa khuva lwomera. Litaala likali lia Yerusalemi liliitsa khuva hikulu havundu haliumbakhwa khuraanjila khu Shilivwa shia Benyamini khutukha havundu hi shilivwa shiukhuraanga shia vetsanga, khutukha khu Shilivwa shiu Mumbeka, khandi khurula khu Munaara kwa Hananeli khutukha havundu ha mwami aminilanga matunda keke ki misabibu.

¹¹ Vandu valiitsa khumenyayo, shichila vilaamo viliitsa khuvula khuvayo. Vandu valiitsa khumenya mu milembe mu Yerusalemi.

¹² Mwami Nyasaye aliitsa khulera vulwale vutamanu muno khu vandu vi tsimbia tsikwananga Yerusalemi. Mivili chiavo chiliitsa khukuunda nivashili mwoyo; khali tsimoni tsiavo nende tsinimi tsiavo tsiliitsa khukuunda.

¹³ Khulitukhu lienelo, Mwami Nyasaye aliitsa khukoyanyinya vandu nu khuria, khali kalombe shia mundu wosi khukumila weshie wali naye himbi, niyenyanga khumukwana.

¹⁴ Khali vandu va Yuda valiitsa khukwana litaala likali lia Yerusalemi. Miandu chia vandu vi tsimbia tsiosi tsimenyanga himbi chiliitsa khuvukulwa. Khali itsahabu, ifetsa nende tsinguvu tsiliitsa khuvukulwa mu vunyishi muno.

¹⁵ Vulwale khuli vwenovo vuliitsa khukwila tsifarasi, tsisushili, tsingamia, tsipunda, nende inyama yosi iliitsa khuva nishili mwoyo havundu ha vandu vamenyanga mu maheemo.

¹⁶ Nalwo lwa shia mundu wosi uliitsa khuva nashili mwoyo mu vandu vi tsimbia tsiosi tsiakwana litaala likali lia Yerusalemi, aliitsa khutikulukha shia khumuhika nu kuraanga khutsia khusaala khu Mwami Nyasaye wi Mikaanda Chiliihe, khandi khwikhoyela Mulukha kwa Matiili.

¹⁷ Niiva vandu vuluhia liosi mu shivala valiitsa khwambakhana khutikulukha Yerusalemi khusaala khu Mwami Nyasaye wi Mikaanda Chiliihe, valiitsa khuvula khunyola imbula.

¹⁸ Niiva Vamisri valiitsa khwambakhana khwikhoyela Mulukha kwa Matiili, Mwami Nyasaye aliitsa khuvasalilitsa nu vulwale vulala vwele, vwa aruma khu shia luhia lwosi lwambakhana khutsiayo.

¹⁹ Shivala shia Misri, halala na vandu vi tsimbia tsindi valiitsa khusalilitswa, nivambakhana khutsia khwikhoyela Mulukha kwa Matiili.

²⁰ Mumatukhu kenako, makhuva yaka nako kaliitsa khuhandikwa khu tsikengele tsi tsifarasi: “Shiatakaswa khu Mwami Nyasaye.” Tsinyungu tsia vateshelamu tsili mu Litempeli liu Mwami Nyasaye tsiliitsa khuva tsindakatifu khuli tsibakuli tsia varenjekhanga imbeli wu vwaali.

²¹ Shia inyungu yosi mu Yerusalemi nende Yuda, iliitsa khuva indakatifu khu Mwami Nyasaye wi Mikaanda Chiliihe. Vandu voosi valiitsa khwitsa khusaala, valiitsa khuva vavoholole khurumishila khali indala khu tsinyungu tsienetso khulu khuteshelamu misango chiavo. Khulitukhu lienelo, shiukhuliitsa khuvaho na vakholi vu vukhala mu Litempeli liu Mwami Nyasaye tawe.