ZAKARIA 12 - IBIBILIA INDAKATIFU MU LUTIRICHI LWITAKHO NENDE LWISUKHA

Litaala Likali lia Yerusalemi Lilakuura

¹ Yaka nako ku Mwami Nyasaye, wavambalalitsa likulu, waloonga lilova, naha mundu vulamu avoolelanga Israeli,

² “Niitsa khukhola litaala likali lia Yerusalemi khuva khuli shikombe shi idivai. Vandu vi tsimbia tsimenyanga himbi nalio valiitsa khung'wa, nu khutanda khuli vandu vang'wele malwa. Lwa valiitsa khuva nivaseeranga litaala likali lia Yerusalemi, khali mataala ka Yuda kaliitsa khuseerwa.

³ Navutswa lwa matukhu kenako kaliitsa khuva nikakhatukha, niitsa khukhola litaala likali lia Yerusami khuva khuli lichina lilitoho muno; khali luhia liosi luliitsa khuchelitsa khulichinga luliitsa khusalila. Vandu vi tsimbia tsiosi mu shivala valiitsa khwiyunga halala khuvakwana.”

⁴ Nyasaye avoolanga, “Khulitukhu lienelo, niitsa khuchila tsifarasi tsiavo tsitechele, nu khulaalushitsa vahili vavo vatsihilanga voosi. Niitsa khulinda vandu va Yuda, nu khuvekhulitsa tsifarasi tsiosi tsia vatsiku vavo.

⁵ Nalwo lwa vandu vu lwivulu lwa Yuda valiitsa khwivoolela vene, ‘Vandu vi litaala likali lia Yerusalemi vanyolanga tsingulu tsiavo khurula khu Mwami Nyasaye wi Mikaanda Chiliihe, uli Nyasaye wavo.’

⁶ “Khulitukhu lienelo, niitsa khukhola vandu vu lwivulu lwa Yuda khuva khuli mulilu mu muliru, khuli mulilu mu imu yumakana. Valiitsa khutivitsa vandu vi tsimbia tsimenyanga himbi navo, navutswa vandu va Yerusalemi valiitsa khumenya mu vulindi vulahi.

⁷ “Inzi Mwami Nyasaye, niitsa khuraanga khuha vandu va Yuda likuura, khu vukhumi vwa vitsukhulu va Daudi nende vandu va Yerusalemi vaheelwa, vulivula khuva vwi tsingulu khuvira vwa vandu va Yuda.

⁸ Khulitukhu lienelo, inzi Mwami Nyasaye, niitsa khulinda vandu va Yerusalemi, valolekhanga khuva vateteshele muvo khunyola tsingulu khuli tsiali tsia Daudi yali natsio. Vitsukhulu va Daudi valiitsa khuvimilila khuli injelosi ya Nyasaye, khuli Nyasaye mwene.

⁹ “Khulitukhu lienelo, niitsa khutivitsa vandu vi tsimbia tsiosi venyanga khukwana litaala likali lia Yerusalemi.

¹⁰ “Niitsa khuchila vitsukhulu va Daudi halala na vandu vamenyanga mu Yerusalemi valiitsa khuva nu mwoyo kwi tsimbavasi khandi ku khusaala, nivaheenza khu woyo wa valivira nakhutsa. Valiitsa khumwikhula khuli mundu yikhulanga mwana wewe wonyene, inoho khuli mundu alilanga, niyikhula mwana wi shiyayi mukhulundu wewe.

¹¹ Khulitukhu lienelo, vandu valiitsa khwikhula vululu muno khuvira khuli vikhulanga havundu halaangwangwa Hadadi-rimoni mu Luhoongo lwa Megido.

¹² Shivala shiliitsa khwikhula, shia lwivulu liosi lulikhula lwene; vandu vu lwivulu lwa Daudi valiitsa khwikhula, vave vandu vasatsa halala na vakhali vavo; vandu vu lwivulu lwa Natsani valiitsa khwikhula halala na vakhali vavo.

¹³ Vandu vu lwivulu lwa Levi halala na vakhali vavo, valiitsa khwikhula. Vandu vu lwivulu lwa Shimehi, valiitsa khwikhula halala na vakhali vavo,

¹⁴ khandi vandu vi tsinzivulu tsindi tsiosi valiitsa khuva nivarikale, valiitsa khwikhula halala na vakhali vavo.”