YOSHWA 9 - IBIBILIA INDAKATIFU MU LUTIRICHI LWITAKHO NENDE LWISUKHA

Vagibioni Vakaata Yoshwa

¹ Makhuva khuli Vaisraeli, vali nivakuuri kamanyikhana khu vami voosi, vamihanga khuluveka luli imbo wu Muchela kwa Yorodani—yavo vamenyanga mu vikulu, hasi hi vikulu, khandi khuluchinga mu lwomera lwi Inyanza ya Meditarenia, khali khutsia khutukha khuluveka luli ivuluka wi shivala shia Lebanoni; yava navo vali vami va Vaahitse, Vaamori, Vakanaani, Vapeerizi, Vaahivi, nende Vayeebusi.

² Vami venavo voosi vakanila halala, nivakwana Yoshwa nende Vaisraeli.

³ Navutswa lwa vandu vi litaala lia Gibioni, vahulila makhuva khulondokhana khuli Yoshwa yali nakholi mataala ka Yeriko nende Ai,

⁴ vavoolelana khuli vanyala khumukaata khuvirila mu vupele vwavo. Vandu venavo vasimukha nivatsia, nivavukula viukhulia, nivachikha khu tsipunda tsiavo na makunia kasakhula nende maseelo ki idivai kali nikahutuukha.

⁵ Vifwala tsinguvu tsia matasi nende vilaaro viasakhula viali ni viakalushilwa khunaavwa. Mukati kwa vali nivachinji kwali kwa yumakana, khandi kwahuunyanga vukuundu vutamanu.

⁶ Vasimukha nivatsia havundu ha vandu vamenyanga mu maheemo mu litaala lia Gilugali; nivavoolela Yoshwa nende Vaisraeli, “Khuruli mu shivala ihale wene. Khwenyanga ukhole lilakano na khutsi.”

⁷ Navutswa Vaisraeli vareeva Vaahivi, “Shichila shina mwenyanga khukhole lilakano na munyi? Haundi, muli vandu vamenyanga himbi hanu.”

⁸ Vavoolela Yoshwa, “Khuli varumishi vovo.” Navutswa Yoshwa yavareeva, “Muli vanga viina? Ni hena wa murulanga?”

⁹ Vachipa Yoshwa, “Khuruli mu shivala ihale wene, shichila khwahulila makhuva khulondokhana khu Mwami Nyasaye, uli Nyasaye wenyu. Khwahulila makhuva khulondokhana khu vindu viosi, via yakhola mu shivala shia Misri,

¹⁰ khandi ka yakhola khu vami vavili va Vaamori, khuluveka luli ivukwi wu Muchela kwa Yorodani: Mwami Sihoni wa Heshiboni nende Mwami Ogu wa Bashani, vamenyanga mu litaala lia Ashitarotsi.

¹¹ Vimilili veru nende vandu voosi vamenyanga mu shivala shieru, vakhuvoolele khurecheshitsi shiukhulia shiu khutsia nashio khu luchendo lu khwitsa khukhwakanila. Vakhuvoolela khukhurumishile khandi khukhureeve nuyaanza ukhole lilakano na khutsi.

¹² Lolakhu mukati kweru. Lwa khwarula nakwo ingo weru khwitsa khukhwakanila, kwali nu kushihili. Navutswa lola! Nunundi kwakhuma, khandi kuhuunyanga vukuundu.

¹³ Lwa khwitsulitsa idivai mu maseelo yaka, kali nikashili mayia, navutswa lolakhu! Karandushi. Tsinguvu tsieru nende vilaaro vieru, vimali khusakhula shichila luchendo luraambi.”

¹⁴ Vaisraeli vahuchilila shiukhulia, navutswa vuchila khureevakhu likhuva liosi khu Mwami Nyasaye khulondokhana khushio.

¹⁵ Khulwa yako, Yoshwa yakhola navo lilakano liu khulera milembe, khuvahuchilila khumenya. Vimilili va Israel visuuha valiitsa khutsililila khumenya khulondokhana ni lilakano lienelo.

¹⁶ Lwa matukhu kavaka kavira, khurula nivakhola navo lilakano lienelo, Vaisraeli vahulila ndi vandu venavo, ni vareende vamenyanga himbi khuvo.

¹⁷ Nalwo lwa Vaisraeli vasimukha nivatsia, khandi nivatukha mu mataala kavo khulitukhu lia khavaka. Vandu venavo vali vamenya mu mataala ka Gibioni, Kefira, Beherotsi, nende Kiriatsi-yeharimu.

¹⁸ Navutswa Vaisraeli vambakhana khuviira, shichila vimilili va vandu venavo vali vavisuuhila khuvirila mu lira liu Mwami Nyasaye, uli Nyasaye wa Israeli. Vandu voosi vililila khu vimilili vavo, khulondokhana khu makhuva kenako,

¹⁹ navutswa vimilili vavo voosi vavavoolela, “Khumali khwisuuha khuvirila mu lira liu Mwami Nyasaye, uli Nyasaye wa Israeli. Shiukhunyala khuvasalilitsa nunundi tawe.

²⁰ Khutsitsanga khuvalekha, vatsililile khumenya khulondokhana khuli khwa valaaka. Niiva khulambakhana khukhola kenako, Nyasaye aliitsa khukhusalilitsa.

²¹ Lekha vamenye, khu vakhwisiachili tsikhuyi nu khukhulerela matsi.” Yaka nako makhuva ka vimilili venavo, vali nivaviritsi kikholeshe.

²² Yoshwa yalaanga halala vandu vi litaala lia Gibioni, navareeva, “Shichila shina mukhukaati, lwa mukhuvoolele ndi murulanga ihale wene, na munyi mwamenya hanu?

²³ Khulwa yako, nunundi mumali khulaamwa. Valala mu munyi, valiitsa khuva varukwa khumatukhu koosi, visiachi vi tsikhuyi khandi vu khulera matsi Havundu Hatakatifu ha Nyasaye wanje.”

²⁴ Vandu venavo vavoolela Yoshwa, “Varumishi vovo vavoolelwa havulavu khuli Mwami Nyasaye, uli Nyasaye wowo yali niyavoolela murumishi wewe Musa, akhuhe shivala shiosi nu khutivitsa vandu voosi, vamenyanga mu shivala shienesho imbeli wowo. Khulwa yako, khwaheendela vulamu vweru mwoyo shichila yivi, khandi nashio shivune shiachila nu khukhola kenako.

²⁵ Khali ndio, nunundi khuli mu makhono koko. Khukhole ka ulolanga ni malahi khandi ku vulunji.”

²⁶ Yavakholela ka venyanga, khandi navahonyinya khurula khu Vaisraeli. Vaisraeli vambakhana khuviira.

²⁷ Navutswa khuraanjila khulitukhu lienelo, Yoshwa yavakhola khuva varukwa, visiachi vi tsikhuyi khandi vandu vukhulerelanga Vaisraeli matsi, khandi khuhila matsi khu vwaali vu Mwami Nyasaye. Nakwo muhinzilu kwa vakholanga, khali nunundi havundu wu Mwami Nyasaye yarovola, khu vandu vasaale khuye.