YOSHWA 16 - IBIBILIA INDAKATIFU MU LUTIRICHI LWITAKHO NENDE LWISUKHA

Lusomo Luli Imbo Lwaheelwa Efurahimu nende Manaase

¹ Lusomo khu mupaka khuluveka luli ikuvanda wi shivala shienesho, lwaheelwa vitsukhulu va Yosefu, kwraanjila khu Muchela kwa Yorodani himbi mu litaala lia Yeriko, havundu handi khuluveka luli ivukwi wi tsisieveye tsia matsi tsia Yeriko, nu kutsia mu shiangalangwi. Kwarula Yeriko nu kutikulukha khu shivala shi vikulu, nu kutsia khutukha mu litaala lia Betseli.

² Mupaka kwenoko kwarula mu litaala lia Betseli, nu kutsia khutukha mu litaala lia Luzi, nu kuvirila mu litaala lia Atarotsi Adari, wa vandu vuluhia lwa Araachi vamenyanga.

³ Nalwo lwa mupaka kwenoko, kwatsililila khutsia khuluveka luli imbo khutukha havundu ha vandu vuluhia lwa Yafuleti vamenyanga, khutsia khutukha khu shivala khuluveka luli ikuvanda wi litaala lia Betsi Horoni. Mupaka kwenoko kwatsililila khurula hawenaho nu kutsia khutukha mu litaala lia Gezeri, nu kumalilishila mu Inyanza ya Meditarenia.

⁴ Vitsukhulu va Yosefu, nivali vandu vi tsimbia tsia Efurahimu nende Manaase khuluveka luli imbo vanyola shivala shienesho, khuva shiavo vene.

Lusomo lwa Vandu Vuluhia lwa Efurahimu Vaheelwa

⁵ Yulu nalwo lwali lusomo lwa vandu vi inzu vuluhia lwa Efurahimu vanyola: Mupaka kwavo kwraanjilanga mu litaala lia Atarotsi Adari, khutsia khutukha khuluveka luli ivukwi ivuluka wa Betsi-horoni,

⁶ nu kutsililila khutsia khutukha mu Inyanza ya Meditarenia. Litaala lia Michumetsatsi khuluveka luli ivuluka wakwo. Khuraanjila khuluveka luli ivukwi hawenaho, mupaka kwenoko kwatsililila khutukha mu litaala lia Tahanatsi Shilo, nu kuvirila khuluveka luli ivukwi, khutsia khutukha mu litaala lia Yanoha.

⁷ Mupaka kwenoko kwakholomokha khurula mu litaala lia Yanoha, khutsia khutukha mu mataala ka Atarotsi nende Nahara, nu kutiila mu litaala lia Yeriko khandi nu kurulila mu Muchela kwa Yorodani.

⁸ Mupaka kwenoko kwarula mu litaala lia Tapuha, khuluveka luli imbo nu kutsia khutukha khu Muchela kwa Kana, khandi nu kumalilishila mu Inyanza ya Meditarenia. Yishi nashio shiali shivala shiaheelwa vandu vi inzu ya vandu vuluhia lwa Efurahimu, shia inzu.

⁹ Vandu vuluhia lwa Efurahimu vali khandi na mataala nende michitsi mu lusomo lwa Manaase.

¹⁰ Navutswa vandu vuluhia lwa Efurahimu shivakhungakhu Vakanaani vamenyanga mu litaala lia Gezeri tawe. Khulwa yako, khali Vakanaani vamenyanga nunundi mu vandu vuluhia lwa Efurahimu, navutswa Vakanaani vanikwa khukholela vandu vuluhia lwa Efurahimu muhinzilu khuli varukwa vavo.