YOSHWA 10 - IBIBILIA INDAKATIFU MU LUTIRICHI LWITAKHO NENDE LWISUKHA

Vaamori Vakuurwa

¹ Mwami Adonizedeki wa Yerusalemi, yahulila makhuva khulondokhana khuli Yoshwa yavukula ni tsingulu litaala lia Ai, khandi khulondokhana khuli yalitivitsa; khandi khuli yiira mwami walio, khuli yali nakholi litaala lia Yeriko nende mwami walio. Adonizedeki yahulila makhuva khandi khulondokhana khuli vandu vi litaala lia Gibioni, vali vakholi lilakano li milembe halala na Vaisraeli, khandi vamenyanga muvo.

² Makhuva kenako kachila vandu va Yerusalemi nivaria, shichila litaala lia Gibioni liali litaala li tsingulu tsinyishi, khuli mataala makali kandi ka vami vamihanga. Khumeeta khu kenako, liali litaala likali khuvira litaala lia Ai, khandi vandu vamenyanga mulio vali vasikali vi tsingulu.

³ Nalwo lwa Mwami Adonizedeki yaruma likhuva khu Mwami Hohamu wa Heburoni, Mwami Piramu wa Yarumutsi, Mwami Yafia wa Lakishi, khandi khu Mwami Debiri wa Eguloni, navoola,

⁴ “Hambi mukhonye khukwana litaala lia Gibioni, shichila vandu vamenyanga mulio, vakholi lilakano li milembe na Yoshwa nende Vaisraeli.”

⁵ Vami varanu va Vaamori venavo, vami va Yerusalemi, Heburoni, Yarumutsi, Lakishi, nende Eguloni, viyunga halala, nivavotokhana litaala lia Gibioni, khandi nivalikwana.

⁶ Vandu vi litaala lia Gibioni, varuma likhuva khu Yoshwa mu maheemo ka vandu vamenyamu mu litaala lia Gilugali, nivavoola, “Nuyaanza, uvuli khukhulekha khutsi varumishi vovo. Khola vwangu witsi khukhuhonyinya! Khukhonye, shichila vami voosi va Vaamori khurula mu shivala shi vikulu khwiyunga halala khukhukwana.”

⁷ Yoshwa nende vasikali veve voosi, khali vasikali vi mikaanda vali nivamanya khukwana, varula mu litaala lia Gilugali.

⁸ Mwami Nyasaye yavoolela Yoshwa, “Lekha khuvariakhu; shichila mali khukhukuurila. Mundu avulakhuho, khali mulala mu vandu venavo uliitsa khwitsa khukhukwana.”

⁹ Yoshwa yatukha khuvo vwangu, niyakhachenda vutukhu vwosi khurula mu litaala lia Gilugali.

¹⁰ Mwami Nyasaye yalomba Vaamori khutechela vutswa imbeli wa vasikali va Vaisraeli. Vaisraeli vavasinzila mu litaala lia Gibioni ni va vahitsanyinya khunjila yu mu shikulu shili mu litaala lia Betsi Horoni, ni vavakwana, khali khutsia khutukha khuluveka luli ikuvanda wa mataala ka Azeka nende Makeda.

¹¹ Vaamori vilukha vasikali va Vaisraeli, khandi lwa vali nivakholomokhanga khunjila khurula Betsi-horoni, Mwami Nyasaye yalomba imbula inyishi ya machina makali khuvakhuva, khutukha lwa vatukha mu litaala lia Azeka. Vanyishi khuvo viirwa ni imbula ya machina, khuvira va Vaisraeli viira ni shivavi.

¹² Khulitukhu liu Mwami Nyasaye yachila Vaisraeli, nivakuura Vaamori, Yoshwa yalomoloma khu Mwami Nyasaye. Yavoola imbeli wa Vaisraeli, “Yivi liuva, sinjila vulunji khu litaala lia Gibioni; Yivi mweli, uvuli khuloleshela Luhoongo lwa Ahiyaloni.”

¹³ Liuva liasinjila vulunji khandi mweli nu kwambakhana khulolekha, khutukha lwa Vaisraeli vakuura vatsiku vavo. Yaka kahandikwa mu Shitabu shia Yashari. Liuva liasinjila vulunji mu malesi mbasu kwosi, nilivula khuyeela.

¹⁴ Khushili khuvakhuho ni litukhu liosi khuli lienelo, inoho khali nunundi, litukhu liu Mwami Nyasaye yahulila makhuva ku mundu. Ni kilikali, Mwami Nyasaye yakwanila Vaisraeli.

¹⁵ Lwa vali nivamali khukwana, Yoshwa nende vasikali veve, vakalukha mu maheemo kavo ka vamenyamu mu litaala lia Gilugali.

Vami Varanu va Vaamori Vakuurwa

¹⁶ Navutswa vami varanu va Vaamori vilukha, nivatsia khwivisa muluhangaywa luli mu litaala lia Makeda.

¹⁷ Lwa Yoshwa yavoolelwa ndi vami varanu venavo, vanyolekhane nivivisi muluhangaywa mu litaala lia Makeda,

¹⁸ Yoshwa yavoola, “Kolongominyi machina makali kakhunishi mu vwinjililu vu muluhangaywa. Vishiho vandu vukhulinda;

¹⁹ navutswa munyi vene muvuli khumenyaho. Mutsililile khuhitsanyinya vatsiku venyu, khandi muvakwane khurulila inyuma. Muvuli khuvahuchilila khwinjila mu mataala makali kavo! Mwami Nyasaye, uli Nyasaye wenyu umuheele tsingulu tsiu khuvakuura.”

²⁰ Nalwo lwa Yoshwa nende Vaisraeli viira voosi, khali niiva valala khuvo vachelitsa khunyola havundu ha vanyala khwivisa mu tsimbinga tsi litaala, nivavula khwiirwa voosi.

²¹ Vandu voosi va Yoshwa vakalukha khu Yoshwa mu maheemo kavo mu litaala lia Makeda mu milembe, vuchila khusalilitswakhu. Khali mundu avulakhuho mu shivala shienesho, walomoloma vindu vitamanu khu Vaisraeli khali hatititi hene.

²² Nalwo lwa Yoshwa yavoola, “Yikuli vwinjililu vu muluhangaywa, munderele hanu vami varanu venavo.”

²³ Vikula vwinjililu vu muluhangaywa, nivamulerela Mwami wa Yerusalemi, Mwami wa Heburoni, Mwami wa Yarumutsi, Mwami wa Lakishi, nende Mwami wa Eguloni.

²⁴ Lwa vami venavo, vali nivakhalerwa khu Yoshwa, yalaanga halala Vaisraeli voosi, navoolela vimilili vi mikaanda chia vasikali va yali nali navo, “Hambi hanu museene khu mang'ori ka vami yava.” Vitsa imbeli, nivaseena khu mang'ori ka vami venavo.

²⁵ Yoshwa yavoolela vimilili va vasikali, “Muvuli khuria inoho khukhutsa mwoyo. Muve ni tsingulu nende ikholo, shichila yaka nako makhuva ku Mwami Nyasaye, atsitsanga khukhola vatsiku venyu voosi.”

²⁶ Nalwo lwa Yoshwa yiira vami venavo; khandi navasunga khu misala chiranu, ha mivili chiavo chiahonga khutukha halukolovo.

²⁷ Lwa liuva liali nilili himbi khuyeela, Yoshwa yahaana lilako mivili chiavo chienecho chisungulwi khurula khu misala nu khusiuvwa muluhangaywa, lwa vali nivivisamu lukhuraanga yolo. Machina makali kavikhwa mu vwinjililu vu muluhangaywa. Khali machina kenako, kashiliho nunundi.

Yoshwa Yavukula Lusomo Lundi lwa Vaamori

²⁸ Yoshwa yakwana khandi navukula ni tsingulu litaala lia Makeda, nende mwami walio khulitukhu lienelo. Yiira shia mundu wosi mu litaala lienelo. Mundu avulakhuho, mu litaala lienelo warikala nashili mwoyo. Yoshwa yakhola Mwami wa Makeda, ka yali niyakhola Mwami wa Yeriko.

²⁹ Lwa Yoshwa yali namali khukhola kenako, yavukula vasikali veve khurula mu litaala lia Makeda, nivatsia mu litaala lia Libuna khandi nalikwana.

³⁰ Mwami Nyasaye yaha Vaisraeli khandi tsingulu tsiu khukuura litaala lienelo, nende mwami walio. Viira shia mundu wosi mu litaala lienelo. Mundu avulakhuho, warikala nashili mwoyo mu litaala lienelo. Yoshwa yakhola Mwami wa Libuna, ka yali niyakhola Mwami wa Yeriko.

³¹ Lwa Yoshwa yali namali khukhola kenako, yavukula vasikali veve khurula mu litaala lia Libuna, nivatsia mu litaala lia Lakishi. Yalivotokhana khandi nalikwana.

³² Mwami Nyasaye yaha Vaisraeli tsingulu tsiu khukuura litaala lia Lakishi mu litaala lienelo, khulitukhu lia khavili li liihe, khuli vali nivakholi litaala lia Libuna. Mundu avulakhuho warikala nashili mwoyo mu litaala lienelo. Navutswa viira shia mundu wosi.

³³ Nalwo lwa Mwami Horamu wa Gezeri yatukhaho, khwitsa khukhonyanila vandu vi litaala lia Lakishi. Yoshwa yamukuura nende vasikali veve, niyiira shia mundu wosi.

³⁴ Lwa Yoshwa yali namali khukhola kenako, yavukula vasikali veve khurula mu litaala lia Lakishi, nivatsia mu litaala lia Eguloni. Yalivotokhana khandi nalikwana.

³⁵ Vavukula ni tsingulu litaala lienelo khulitukhu lienelo, niviira shia mundu wosi, khuli yali niyakhola litaala lia Lakishi.

³⁶ Lwa Yoshwa yali namali khukhola kenako, yavukula vasikali veve khurula mu litaala lia Eguloni, nivavirila mu vikulu khutsia khutukha mu litaala lia Heburoni. Yalikwana

³⁷ khandi nalivukula ni tsingulu. Viira Mwami wa Heburoni nende vandu voosi mu litaala lienelo, khali vandu mu mataala kali himbi khulio. Yoshwa yaviritsa khuyeelitswa khwi litaala lienelo, khuli yali niyakhola litaala lia Eguloni. Mundu avulakhuho nashili mwoyo warikala mu litaala lienelo.

³⁸ Nalwo lwa Yoshwa nende vasikali veve, vakalukha nivakwana vandu vi litaala lia Debiri.

³⁹ Vavukula ni tsingulu litaala lienelo, halala nu mwami walio nende michitsi chialio chia himbi. Viira shia mundu wosi mu litaala lienelo. Yoshwa yakhola litaala lia Debiri nende mwami walio, ka yali niyakhola Heburoni, khali litaala lia Libuna nu mwami walio.

⁴⁰ Yoshwa yakwana nakuura shivala shiosi. Yakuura vami vi shivala shi vikulu, vikulu vili khuluveka luli ivukwi, nende vivala vili hasi hi shikulu khuluveka luli imbo, khali vami vali mu shivala shiumakana khuluveka luli ikuvanda. Mundu avulakhuho, mu litaala lienelo warikala nashili mwoyo. Yaka nako ku Mwami Nyasaye wa Israeli yali navooli kaliitsa khwikholekha.

⁴¹ Yoshwa yamulula vandu vi litaala lia Kadeshi-bareneha khuluveka luli ivukwi khutsia khutukha mu litaala lia Gaza, khali mu lusomo lwa Gosheni, khali khutukha mu litaala lia Gibioni.

⁴² Yoshwa yakuura vami venavo voosi, nende tsisomo tsiavo khulitukhu lilala, shichila Mwami Nyasaye, uli Nyasaye wa Israeli yakhonya Vaisraeli khukwana.

⁴³ Khulwa yako, Yoshwa nende vasikali veve, vakalukha mu maheemo kavo ka vamenyamu mu litaala lia Gilugali.