YONA 1 - IBIBILIA INDAKATIFU MU LUTIRICHI LWITAKHO NENDE LWISUKHA

Yona Yachelitsa Khwilukha Mwami Nyasaye

¹ Litukhu lindi, Mwami Nyasaye yalomoloma khu Yona mwana wa Amitayi; navoola,

² “Simukha vwangu utsi wilwatse mu litaala lia Nineve, shichila vutamanu vwa vandu vakholamu vumali khutukha khwinzi.”

³ Navutswa Yona yaraanga luchendo lu khutsia havundu halaangwangwa Tarishishi khwenya khwilukha Mwami Nyasaye. Yakholomokha natsia mu litaala lia Yopa. Yanyolayo imeli yali nitsitsanga Tarishishi. Yarunga murungu ku luchendo, nanina mu imeli yeneyo, khutsia navo Tarishishi, khwenya khwilukha Mwami Nyasaye.

⁴ Navutswa Mwami Nyasaye yachila vushindu vwi tsingulu tsinyishi nu vuhuutsa khu inyanza, ma imbuutsa niva inditoho muno, khali imeli niva himbi khwavukhanamu.

⁵ Nalwo lwa vandu voosi vali nivali mu imeli varia; shia mulala naraanga khusaala khu nyasaye wewe. Vasiuva misiko chiali mu imeli mu inyanza, khwenya yaanguhi. Nikhali, Yona yali ukholomoshe winjile mukari mwene mwi imeli; khandi yali ukoni tsindolo tsinditoho.

⁶ Mwimilili wi imeli yatsia khuye, namureeva, “Yivi ukonanga tsindolo, shichila shina ukonanga? Vukha usaale khu nyasaye wowo! Haundi, nyasaye alakhwitsushitsa makhuvuli khutiva.”

⁷ Khulwa yako, vandu vali nivali mu imeli vavoolelana, “Hambi, leshi khukhuvi ikura khulole ni viina uchilanga vindu vitamanu yivi ni vikhukwila.” Vakhuva ikura, manikwila Yona.

⁸ Nalwo lwa varaanga khumureevishitsa, “Khuvoolele ni viina uchilanga nu khunyola matiinyu yaka? Nu muhinzilu shina kwa wu kholanga? Wivulwa hena? Urulanga mu shivala shina? Urulanga mu vandu vuluhia shina?”

⁹ Yona yachipa navoola, “Ndi Muhebrania; khandi naria Mwami Nyasaye, uli Nyasaye wu mwikulu, walomba likulu nende lilova.”

¹⁰ Vandu venavo vamanya nivaria muno, nivavoolela Yona, “Ni shina shiukholi yishi!” Vandu venavo vali vamanyi ndi Yona yilukhanga Mwami Nyasaye, shichila yali navavoolele.

¹¹ Nalwo lwa vamureeva, “Ni shina shia khunyala khukhukhola, nikanyalikha inyanza ihonjele?” Navutswa inyanza yali nitsilililanga khuvanyashitsa.

¹² Yona yavavoolela, “Mbukuli musiuvi mu inyanza. Nalwo lwa inyanza ihonjela shichila munyi; khandi manyi vulahi vwene ndi imbuutsa inditoho iyi imunyashitsanga shichila inzi.”

¹³ Khali ndio, vandu venavo vachelitsa khuluuka imeli ni tsingulu tsiavo tsiosi khuchihila khuluchinga, navutswa nivakhaywa; shichila imbuutsa yatsililila khuvanyashitsa.

¹⁴ Nalwo lwa valila nivasaala khu Mwami Nyasaye, nivavoola, “Yivi Mwami Nyasaye, khukhusayanga nuyaanza khuvuli khutivitswa, shichila vulamu vu mundu uyu. Uvuli khukhuvukula khuli nu khutsi khwachila mundu uvula vutamanu uyu nakhutsa! Mwami Nyasaye, ni lienya liolio kikholeshe kario.”

¹⁵ Vavukula Yona, nivamusiuva mu inyanza; nonoho lwi inyanza yahonjela.

¹⁶ Nalwo lwa vandu venavo vamanya nivaria muno Mwami Nyasaye. Vakholela Mwami Nyasaye misango, khali nivisuuha khumurumishila.

¹⁷ Navutswa Mwami Nyasaye yali urovole khale isutsi ingali khumiila Yona. Yona yamenya munda mwi isutsi yeneyo khumatukhu kavaka, mbasu nu vutukhu.