YOHANA 6 - IBIBILIA INDAKATIFU MU LUTIRICHI LWITAKHO NENDE LWISUKHA

Yesu Yaliishitsa Vasatsa Tsihelefu Tsiranu

¹ Matukhu mati nikakhavira, Yesu yambukha natsia khuluveka lundi lwi Inyanza ya Galilaya, ili ni lira lindi Inyanza ya Tiberia.

² Shituma shikali shia vandu vamulonda, shichila vali nivaloli viloleshitsu vievie khuli yali nahonyinyi vandu valwala.

³ Yesu yatikulukha khu shikulu, niyikhala hasi na veechi veve.

⁴ Litukhu liu Mulukha kwa Pasaka liali nilili himbi khutukha.

⁵ Lwa Yesu yaheenza nalola shituma shia vandu vanyishi nivitsanga havundu ha yali nali, yareeva Filipu, “Khukuula khurina mikati chia vandu yava voosi vanyala khulia?”

⁶ Yesu yavoola likhuva lienelo khulu khuchelitsa Filipu; shichila ye mwene yali namanyi shindu shiatsitsanga khukhola.

⁷ Filipu yachipa, “Tsidinari tsimia tsivili shitsinyala khukuula mikati chia vandu yava vasuchila voosi tawe!”

⁸ Mulala khu veechi veve walaangwangwa Andereya, nali amwavo Simoni Petro, yavoola,

⁹ “Mwana vi shiyayi ali hanu ni mikati chiranu chialombwa khu ishayiri nende tsisutsi tsivili; navutswa vandu vanyishi shivanyala khusuchila tawe.”

¹⁰ Yesu yavoolela veechi veve, “Vooleli vandu vikhale hasi.” Havundu henaho hali hamela vunyasi vunyishi. Khulwa yako, vandu vasatsa venavo vikhalaho, voosi tsiheelefu tsiranu.

¹¹ Yesu yavukula mukati, nasanditsa Nyasaye khandi nakavulila vandu vali nivikhaleho; khandi yakhola malala mele khu tsisutsi; ma vandu nivakavulilwa mu vunyishi khuli venyanga.

¹² Lwa vikura nivakhalia, Yesu yavoolela veechi veve, “Vunjelitsi matonye ki shiukhulia shirikale, khu khuvuli khwononyinyakhu shindu shiosi.”

¹³ Veechi vavunjelitsa matonye ki mikati chiali nichirikale chialombwa khu ishayiri nikitsula mu mihinda likhomi na chivili, vandu nivakhamala khulia.

¹⁴ Lwa vandu valola shiloleshitsu shia Yesu yali nakholi, vavoola, “Ni kilikali, uyu neye muprofeti wenyekhanga ave niyitsa mu shivala.”

¹⁵ Lwa Yesu yamanya vulahi ndi vandu venavo venyanga khwitsa khumuvukula ni tsingulu khumwamihitsa, yilukha natsia mu vikulu wanyala khuva wonyene.

Yesu Yachenda khu Matsi

¹⁶ Lwa khulukolovo khwatukha, veechi va Yesu vakholomokha nivatukha khu inyanza.

¹⁷ Vinjila mu liaro, nivambukha inyanza khukalukha mu litaala lia Kaperenamu. Vutukhu vwatukha, navutswa Yesu yali nashili khukalukha khuvo.

¹⁸ Imbuutsa inditoho yahuutsanga, matsi nikaraanga khuhilikana.

¹⁹ Lwa veechi va Yesu vali nivakhisuundakhu tsikilomita tsiranu inoho sita, valola Yesu. Yesu yali nachendanga khu matsi; khandi nali himbi khutukha khu liaro. Veechi vatechela.

²⁰ Navutswa Yesu yavavoolela, “Ninzi; muvuli khuria.”

²¹ Venya khwinjilitsa Yesu mu liaro, navutswa liaro liatukha vwangu khuluchinga havundu ha vali nivatsitsanga.

Vandu Vakhava Yesu mu litaala lia Kaperenamu

²² Litukhu lialondakhu, vandu vali nivarikale khuluveka lundi lwi inyanza vamanya ndi ni liaro lilala lionyene, nalio liali nilirikaleho. Vamanya ndi Yesu shiyali nanini mu liaro, halala na veechi veve tawe; navutswa veechi veve vali nivaruliho vonyene.

²³ Malala khu maaro kali nikaruli Tiberia kitsa, nikasinjila himbi havundu ha shituma shia vandu vali nivaliililenje mukati kwa Mwami Yesu yali nasanditsi.

²⁴ Lwa shituma shia vandu valola ndi Yesu inoho veechi veve vavulaho, vinjila mu maaro kenako; nivatsia khukhava Yesu mu litaala lia Kaperenamu.

Yesu ali Khuli Mukati ku Vulamu

²⁵ Lwa vandu vanyola Yesu nali khuluveka lundi lwi inyanza, vamureeva, “Mwechitsi, isaa shina yutushi hanu?”

²⁶ Yesu yavachipa, “Muvoolelanga toto ndi mukhavanga inzi, shikali shichila mwalola viloleshitsu tawe, navutswa shichila mwalia mikati numwikura.

²⁷ Mukhakholi mihinzilu khulu khunyola shiukhulia shionekhanga tawe; navutswa mukhole mihinzilu khulu khunyola shiukhulia shihaananga vulamu vwi mihika ni mihika. Yishi nashio shiukhulia shiu Mwana wu Mundu amuha munyi; shichila Nyasaye, uli Tata, watuuya khuye muhuuli kwekwe khumanyinya ndi wamuyaanza.”

²⁸ Nalwo lwa vandu venavo vareeva Yesu, “Shina shia khunyala khukhola khu khutsililile khukhola mihinzilu chia Nyasaye?”

²⁹ Yesu yachipa, “Muhinzilu kwa Nyasaye yenyanga mukhole, nu khusuuvila mu woyo wa yaruma.”

³⁰ Vamureeva, “Ni shiloleshitsu shina shiunyala khukhola khu khushilole khandi khusuuvile mu yivi? Nu muhinzilu shina kukhola?

³¹ Vakuuka veru valia shiukhulia shilaangwangwa maana, lwa vamenyanga mu shiangalangwi, khulondokhana khuli Mahandiko Matakatifu kavoolanga, ‘Yavaha mukati kwa valia khurula mwikulu.’ ”

³² Yesu yavavoolela, “Muvoolelanga toto ndi shiali Musa wamuha mukati khurula mwikulu tawe; navutswa Tata wanje neye umuheetsanga mukati kwatoto khurula mwikulu.

³³ Mukati kwa Nyasaye ahaananga ni woyo warula mwikulu, khandi ahaananga vulamu khu vandu mu shivala.”

³⁴ Vavoolela Yesu, “Mwami, umenye nu khuheetsanga shia khase khosi mukati kwenoko.”

³⁵ Yesu yavavoolela, “Ninzi mukati kuhaananga vulamu. Mundu witsa khwinzi shianyala khuhulila inzala tawe. Mundu wanasuuvili mwinzi, shianyala khuhulila vuluhu tawe.

³⁶ Navutswa namuvoolela ndi mumali khulola inzi; nikhali shiumunyala khusuuvila tawe.

³⁷ Shia mundu wosi wa Tata wanje amba, aliitsa khwitsa khwinzi; khandi mundu witsa khwinzi, shinyala khumukhunga tawe;

³⁸ shichila shinarula mwikulu khwitsa mu shivala khukhola lienya lianje mwene tawe; navutswa khukhola lienya lia Nyasaye yanduma khole.

³⁹ Lienya lia Nyasaye wanduma lili ndi mbuli khukoritsakhu khali mulala khu yavo voosi vayamba; navutswa visimushitsi voosi khurula mu likhutsa khulitukhu liukhumalilikha.

⁴⁰ Lienya lia Tata wanje yenyanga likholeshe nu khulola ndi shia mundu wosi ulolanga Mwana khandi asuuvila muye anyole vulamu vwi mihika ni mihika; khu ni limwisimushitsa khurula mu likhutsa khulitukhu liukhumalilikha.”

⁴¹ Nalwo lwa Vayahudi varaanga khung'ung'una, shichila Yesu yali navooli, “Ninzi mukati kwarula mwikulu.”

⁴² Khulwa yako, vireevana vene, “Shikali katoto uyu ni Yesu, mwana wa Yosefu, mundu wa khwamanya tata wewe nende mama wewe? Akhuvoolelanga munjila shina, ‘Niitsa hasi khurula mwikulu?’ ”

⁴³ Yesu yavachipa, “Leshi khung'ung'una munyi vene.

⁴⁴ Mundu avulakhuho unyala khwitsa khwinzi, Tata wanduma nakhamuleri khwinzi; khandi ninzi uliitsa khumwisimushitsa khurula mu likhutsa khulitukhu liukhumalilikha.

⁴⁵ Vaprofeti vahandika, ‘Vandu voosi valiitsa khwechitswa na Nyasaye.’ Shia mundu wosi uhulilanga likhuva lia Tata khandi yeka khurula khuye neye witsanga khwinzi.

⁴⁶ Mundu avulakhuho walola Tata, nikakhali woyo warula khu Nyasaye; neye wonyene walola Tata.

⁴⁷ Muvoolelanga kilikali ndi mundu usuuvilanga, neye uli nu vulamu vwi mihika ni mihika.

⁴⁸ Ninzi mukati kuhaananga vulamu.

⁴⁹ Vakuuka venyu valia shiukhulia shia maana, lwa vamenyanga mu shiangalangwi, navutswa khali ndio vakhutsa.

⁵⁰ Navutswa yuku nakwo mukati kwarula mwikulu, kwa mundu anyala khulia avuli khukhutsa.

⁵¹ Ninzi mukati kuli mwoyo kwarula mwikulu. Niiva mundu aliitsa khulia mukati yuku, alatsililila khuva mwoyo mihika ni mihika. Mukati kwambananga shichila vulamu vwa vandu mu shivala nu mmbili kwanje.”

⁵² Khulwa yako, Vayahudi varaanga khuhangalitsana vene khuvene, nivavoola, “Mundu uyu yakhakhuha munjila shina mmbili kwekwe khulii?”

⁵³ Yesu yavavoolela, “Muvoolelanga toto ndi nu mukhalia mmbili ku Mwana wu Mundu, khandi mung'wi masahi keke, shiumuli nu vulamu mu munyi vene tawe.

⁵⁴ Mundu uliakhu mmbili kwanje khandi ang'wi masahi kaanje ali nu vulamu vwi mihika ni mihika; khandi niitsa khumwisimushitsa khurula mu likhutsa khulitukhu liukhumalilikha.

⁵⁵ Mmbili kwanje ni shiukhulia shiatoto khandi masahi kaanje ni shiu khung'wa shiatoto.

⁵⁶ Mundu uliakhu mmbili kwanje khandi ang'wikhu masahi kaanje atsilililanga khuva mwinzi; ninzi mwene muye.

⁵⁷ Khuli Tata uli mwoyo wanduma, khandi ndi mwoyo shichila Tata, khu mundu uliakhu inzi, alatsililila khuva mwoyo shichila inzi.

⁵⁸ Khulwa yako, yuku nakwo mukati kwarula mwikulu. Shiukuli khuli mukati kwa vakuuka venyu valia nivakhutsa tawe; navutswa mundu uliitsa khuliakhu mukati yuku, alatsililila khuva mwoyo mihika ni mihika.”

⁵⁹ Yesu yavoola likhuva lienelo, niyechitsanga mu lisinagogi mu litaala lia Kaperenamu.

Makhuva Kahaananga Vulamu vwi Mihika ni Mihika

⁶⁰ Lwa valala khu veechi va Yesu vahulila navoolanga ndio, vavoola, “Liechitso yili ni litinyu muno. Ni viina unyala khulihuchilila?”

⁶¹ Navutswa lwa Yesu yamanya mu mwoyo kwekwe ndi veechi vilililanga khulondokhana khu likhuva lienelo, yavareeva, “Kamboli kamunyashitsanga mu mioyo?

⁶² Khulwa yako, nikave karina lwa mulilola Mwana wu Mundu nakalukhanga mwikulu mwa yamenyanga?

⁶³ Roho neye uhaananga vulamu; tsingulu tsiu mmbili tsivula vukhonyi vwosi. Makhuva kamuvoolele nako kachilanga numunyola Roho nende vulamu.

⁶⁴ Navutswa khali ndio, vandu valala vali mu munyi vakhasuuvilanga tawe.” Yesu yali wamanya khurula muliraanga mundu uliitsa khuvula khusuuvila; khandi mundu uliitsa khumutsama.

⁶⁵ Yesu yatsililila khuvavoolela, “Yishi nashio shivune shichili nimuvoolela ndi mundu avulakhuho unyala khwitsa khwinzi niyakharumwa na Tata.”

⁶⁶ Khuraanjila lwenolo, valala khu veechi va Yesu, vakalukha inyuma nivambakhana khuchendanga naye.

⁶⁷ Yesu yareeva veechi veve, “Khali munyi mwenyanga khunzivala?”

⁶⁸ Simoni Petro yamuchipa, “Mwami Yesu, ni viina wa khutsiakhu? Nivi uli na makhuva kahaananga vulamu vwi mihika ni mihika.

⁶⁹ Khusuuvili khandi khwakhamanya nunundi ndi nivi Mutakatifu warula khu Nyasaye.”

⁷⁰ Nalwo lwa Yesu yavareeva, “Shinamurovola likhomi na vavili? Navutswa khali ndio, mulala khu munyi wakwa Ibilisi.”

⁷¹ Yesu yalomoloma makhuva khulondokhana khu Yuda, mwana wa Simoni Isikarioti. Khali niiva Yuda, yali mulala khu veechi likhomi na vavili, neye wali natsitsanga khutsama Yesu.