YOHANA 5 - IBIBILIA INDAKATIFU MU LUTIRICHI LWITAKHO NENDE LWISUKHA

Lihonyinywa lia ha Litavalia

¹ Matukhu mati nikakhavira, Yesu yatikulukha natsia Yerusalemi khwikhoyela mulukha kwa Vayahudi.

² Khwali ni litavalia lia matsi mu Yerusalemi mwenomo himbi ha Shilivwa shia Makondi, liali liatiilwa ni tsirilu tsiranu, lira lindi Muluhebrania ni Betsezatsa.

³ Shituma shikali shia vandu vali nivalwala, vavekhu, valeme nende vafwokoya vamenyanga mu tsirilu tsienetso, [nivalindililanga matsi kalenjele,

⁴ shichila shia khase khosi, injelosi yu Mwami Nyasaye yatsitsanga ha litavalia lia matsi khutuvulanyinya matsi. Mulwale wu khuraanga witumbulanga mu matsi kenako ni kakhatuvukha yahonanga khurula mu vulwale vwevwe vwosi.]

⁵ Khwali nu mundu ha litavalia henaho wali niyalwala vulwale khumihika makhomi kavaka na munane.

⁶ Yesu yamulola nakoniho, namanya ndi nu mundu wali niyalwala khumihika minyishi. Yamureeva, “Wenyanga uhone?”

⁷ Mundu wali niyalwala mwenoyo yamuvoolela, “Mwami, mbulakhu mundu hanu unyala khumbila mu litavalia lia matsi yili, lwa matsi kavetsanga ni kakhatuvulwa. Lwa njelitsanga khukwamu, mundu wundi aranganga khwitumbulamu imbeli wanje nishili.”

⁸ Yesu yamuvoolela, “Sinjila! Vukula shiseelo shioshio, uchende.”

⁹ Mundu wali niyalwala mwenoyo yahona vwangu. Yavukula shiseelo shieshie naraanga khuchenda. Makhuva kenako kikholekha khulitukhu li Lisabato.

¹⁰ Khulwa yako, vimilili va Vayahudi vavoolela mundu wali nahonyinywi, “Litukhu linu ni li Lisabato. Malako keru shikahuchililanga uchinji shiseelo shioshio tawe.”

¹¹ Navutswa mundu mwenoyo yavachipa, “Mundu umbonyinyi ambolele, ‘Vukula shiseelo shioshio, uchende.’ ”

¹² Vamureeva, “Nu mundu shina wakhuvoolela, ‘Vukula shiseelo shioshio, ma usimushi utsi?’ ”

¹³ Navutswa mundu wali nahonyinywi shiyali namanyi mundu wali namuhonyinyi tawe; shichila Yesu yali uruli havundu henaho, khandi shituma shikali shia vandu shialiho.

¹⁴ Matukhu mati nikakhavira, Yesu yanyola mundu mwenoyo mu Litempeli, namuvoolela, “Lola! Uhoni nunundi. Lekhana nu vwoni, khu shindu shitamanu shindi shivuli khukhukwila.”

¹⁵ Khulwa yako, mundu mwenoyo yarulaho natsia khuvoolela vimilili va Vayahudi ndi Yesu neye wali namuhonyinyi.

¹⁶ Vimilili va Vayahudi varaanga khutambitsa Yesu, shichila yakhola shikholwa shienesho khulitukhu li Lisabato.

¹⁷ Yesu yavavoolela, “Tata wanje wamenya shia khase khosi nahinzilanga khali khutukha nunundi; khali inzi mbinzilanga khandi.”

¹⁸ Nashio shivune shiachila Vayahudi nivakhava khuli vanyala khumwiira, shikali shichila yameneka Malako ki litukhu li Lisabato konyene tawe; navutswa yali uvooli khandi ndi Nyasaye ni Tata wewe, khwilekhanyinya mwene khu Nyasaye.

Vunyali vu Mwana wa Nyasaye

¹⁹ Yesu yavavoolela, “Muvoolelanga toto ndi Mwana avulakhu vunyali vu khukhola shindu shiosi khuvirila khu tsingulu tsietsie mwene; navutswa anyala khukhola shindu shialolanga Tata wewe nakhola shionyene; shichila shia shindu shiosi shia Tata akholanga, nashio khandi shiu Mwana akholanga.

²⁰ Tata wayaanza Mwana; khandi amumanyinyanga shia shindu shiosi shia ye mwene akholanga. Aliitsa khumumanyinya khali vindu vikali viene viu khukhola khuvira yivi, khu voosi muliva nilichenya.

²¹ Khuli lwa Tata yisimushitsanga vandu vakhutsa khurula mu likhutsa, avaha vulamu, nindio khandi Mwana aheetsanga vandu vayaanzitswangwa navo vulamu.

²² Tata shiakhalachilanga mundu tawe; navutswa waha Mwana wewe vunyali vwosi vukhukhalachila vandu,

²³ khu, voosi vahe Mwana luyali, munjila indala yene khuli vaheetsanga Tata luyali. Mundu wambakhananga khuha Mwana luyali, shiaheetsanga Tata wamuruma luyali tawe.

²⁴ “Muvoolelanga toto ndi mundu uhulilanga likhuva lianje, khandi asuuvila mu woyo wanduma, ali nu vulamu vwi mihika ni mihika. Mundu khuli mwenoyo shialiitsa khukhalachilwa tawe; navutswa wanyola vulamu shichila wakuura likhutsa.

²⁵ Muvoolelanga toto ndi isaa iliitsa khutukha khali yatukha khale, lwa vandu vakhutsa khale valiitsa khuhulila mwoyo ku Mwana wa Nyasaye; khandi yavo valiitsa khukuhulila valiitsa khutsililila khuva mwoyo.

²⁶ Khuli lwa Tata ali nu vulamu muye mwene, munjila indala yeneyo, walomba Mwana wewe khuva nu vulamu muye mwene.

²⁷ Tata waha Mwana vunyali vu khukhalachila vandu, shichila neye Mwana wu Mundu.

²⁸ Makhuva yaka kakhamuchenyinyi tawe; shichila isaa iliitsa khutukha lwa vandu vakhutsa voosi valiitsa khuhulila mwoyo kwekwe

²⁹ nu khurula mu vilindwa viavo: yavo vali nivakhola malahi valiitsa khwisimukha khurula mu likhutsa khandi vatsililile khuva mwoyo. Navutswa yavo vali nivakhola vindu vitamanu, valiitsa khwisimukha khurula mu likhutsa vakhalachilwi.

Vandu Vahaana Vushiahidi khu Yesu

³⁰ “Mbulakhu shianyala khukhola mwene khuvirila khu vunyali vwanje. Khalachilanga vandu khulondokhana khuli Tata ambolelanga. Khalachilanga vandu munjila yu vulunji, shichila shinjelitsanga khukhola ka inzi mwene nzikombanga khukhola tawe; navutswa lienya lwa woyo wanduma yenyanga nonde.

³¹ “Niiva nyala khuhaana vushiahidi khulondokhana khwinzi mwene, vushiahidi vwanje shiuvuli vwatoto tawe.

³² Navutswa khuliho nu wundi umbanilanga vushiahidi; khandi ndi ni limanya ndi avoolanga katoto khulondokhana khwinzi.

³³ Waruma likhuva khu Yohana, nahaana vushiahidi khulondokhana khu katoto.

³⁴ Shimbuchililanga vushiahidi vwa vandu tawe; navutswa mbolanga makhuva yaka khumuhonyinywi.

³⁵ Yohana yali khuli itaaha yakhanga nikholitsa vulavu, khandi mwikhoyela mu vulavu vwevwe khumatukhu mati.

³⁶ Navutswa vushiahidi vwandi navwo khwinzi mwene nu vu vunyali muno khuvira vwa Yohana; shichila mihinzilu milala miele chia Tata yenyanga mbe ninarweshitsa, nichili nachio chiakholanga, chihaananga vushiahidi havulavu ndi Tata neye wanduma.

³⁷ Tata wanduma neye uhaananga mwene vushiahidi khwinzi. Mushili khuhulilakhu mwoyo kwekwe, inoho khulolakhu khuli asasanga khali hatititi hene;

³⁸ khandi likhuva lielie shikali lili mu mioyo chienyu tawe; shichila mwa yambakhana khusuuvila mu woyo wa yaruma.

³⁹ Musomanga shia shindu shiosi mu Mahandiko Matakatifu, shichila mukanakananga ndi lwa mukasomanga munyala khunyola vulamu vwi mihika ni mihika. Mahandiko Matakatifu nako kahaananga vushiahidi khwinzi!

⁴⁰ Navutswa khali ndio, mwa yambakhana khwitsa khwinzi khu munyole vulamu.

⁴¹ “Shindi ni lienya lia vandu khunzitsominya tawe.

⁴² Navutswa namanya khuli lwa muli. Khali namanya shiumwayaanza Nyasaye mu mioyo chienyu tawe.

⁴³ Namala khwitsa khuvirila mu vunyali vwa Tata wanje, navutswa mwa yambakhana khunzinjilitsa. Nikhali, niiva mundu wundi anyala khwitsa khuvirila mu vunyali vwevwe mwene, neye wa munyala khwinjilitsa.

⁴⁴ Munyala khusuuvila munjila shina niiva munyala khwenya vandi vamwitsominye, navutswa shiumuchelitsanga khunyola litsominywa khurula khu Nyasaye wonyene tawe?

⁴⁵ Muvuli khuva ninganakani ndi ninzi wa nimuyaale khu Tata. Musa neye uliitsa khumuyaala, shichila neye wa mwavikhamu lisuuvilitswa lienyu.

⁴⁶ Niiva ni kilikali mwali mwasuuvila Musa, mwakhasuuvili inzi, shichila yahandika makhuva khulondokhana khwinzi.

⁴⁷ Navutswa niiva mwayambakhana khusuuvila mu ka yahandika, munyala khusuuvila munjila shina makhuva kambolanga?”