YOHANA 2 - IBIBILIA INDAKATIFU MU LUTIRICHI LWITAKHO NENDE LWISUKHA

Mulukha kwi Shiselelo shiu Khuhilana mu Litaala lia Kana

¹ Matukhu kavili nikakhavira, khwali ni shiselelo shiu khuhilana mu litaala lia Kana, lili mu lusomo lwa Galilaya. Mama wa Yesu yaliho.

² Yesu nende veechi veve vali valaanjilwi khandi mushiselelo shiu khuhilana shienesho.

³ Lwa idivai yali nivwele, mama wa Yesu yavoolela Yesu, “Idivai yavo ivwele.”

⁴ Yesu yamuvoolela, “Mukhali yivi, nivi unyala khumbolela kakhola? Isaa yanje ishili khutukha.”

⁵ Mama wa Yesu yavoolela varumishi, “Kholi shia shindu shiosi shia amuvoolela mukhole.”

⁶ Khwaliho ni tsinyungu sita tsia matsi himbi hawenaho; shia indala tsikalani makhomi kavili na tsindi makhomi kavaka, khulondokhana khu mulukha kwa Vayahudi vakholanga ku khwinihitsa.

⁷ Yesu yavoolela varumishi venavo, “Tsukhi matsi khutukha lwa kitsula mu tsinyungu yitsi.” Navo vitsulitsa khutukha lwa kitsula mu tsinyungu tsienetso.

⁸ Yesu yavavoolela, “Teehikhu matsi mati nunundi mukahile khu mundu wusinjililanga mulukha kwi shiselelo shiu khuhilana.” Vamuhilila matsi,

⁹ kali ni kakalukhane khukwa idivai natsanzamakhu. Shiyali umanyikhu ha idivai yeneyo yali niruli tawe (navutswa, varumishi vali nivateehi matsi, navo vali nivamanyi). Khulwa yako, yalaanga musatsa uselelanga mwiiha

¹⁰ namuvoolela, “Shia mundu wosi aranganga khuhaana idivai indahi, vacheni nivakhang'wa nivakhikura, alera idivai ya shia khase khosi; navutswa uvishi idivai indahi khutukha nunundi!”

¹¹ Yesu yakhola shiloleshitsu shiukhuraanga shienesho mu litaala lia Kana, lili mu lusomo lwa Galilaya; wa yamanyinya vukhumi vwevwe, ma veechi veve nivasuuvila muye.

¹² Lwa Yesu yali namali khukhola ndio, yasimukha na mama wewe, vamwavo veve, nende veechi veve nivatsia mu litaala lia Kaperenamu, wa vamenya khumatukhu mati.

Yesu Yatsia mu Litempeli

¹³ Lwa Mulukha kwa Pasaka kwa Vayahudi kwali nu kuli himbi khutukha, Yesu yasimukha natsia Yerusalemi.

¹⁴ Yinjila mu Litempeli nanyola vandu vakuulanyilamu tsing'ombe, makondi, nende vinamusotsi; khandi vakalukhanyinyi vi tsisenti nivikhale ha tsimesa tsiavo.

¹⁵ Yesu yalomba shivoko khurula khu mikoye nakhunga miruku chiosi khurula mu Litempeli, khali makondi nende tsing'ombe. Yatikaalitsa tsimesa tsia vakalukhanyinyi vi tsisenti, nasalanyinya hasi tsisenti tsiavo;

¹⁶ navoolela vandu vali nivakuulitsanga vinamusotsi, “Rulitsi vindu yivi munu! Leshi khukhola inzu ya Tata wanje khuva musokoni!”

¹⁷ Veechi veve vitsushitsa ka Mahandiko Matakatifu kavoolanga, “Nyasaye, vuyaanzi vwanje shichila inzu yoyo vwakhanga mwinzi khuli mulilu.”

¹⁸ Vimilili va Vayahudi vareeva Yesu, “Ni shiloleshitsu shina shiunyala khukhola khumanyinya ndi uli nu vunyali vu khukhola vindu yivi?”

¹⁹ Yesu yachipa, “Pomoli Litempeli yili, ninzi mbe niliumbakhanga khumatukhu kavaka.”

²⁰ Khulwa yako, Vayahudi vamureeva, “Litempeli yili liavukula mihika makhomi kane na sita khumbakhwa, nivi utsitsanga khuliumbakha khumatukhu kavaka?”

²¹ Navutswa Litempeli lia yalomoloma khulondokhanakhu kwali mmbili kwekwe.

²² Lwa Yesu yisimushitswa khurula mu likhutsa, veechi veve vitsushitsa ndi yali wa vavoolela ndio; vasuuvila mu Mahandiko Matakatifu nende makhuva ka Yesu yali navooli.

Yesu Wamanya Kali mu Mioyo chia Vandu Voosi

²³ Lwa Yesu yali nali mu Yerusalemi khulitukhu liu Mulukha kwa Pasaka vandu vanyishi vasuuvila muye, lwa valola viloleshitsu via yali nakholi.

²⁴ Navutswa Yesu shiyali wa vasuuvila tawe, shichila yali wa vamanya voosi.

²⁵ Shiyenya mundu wosi khumuvoolelakhu shindu khulondokhana khuvo tawe, shichila yali wamanya kali mu mioyo chiavo.