YOHANA 16 - IBIBILIA INDAKATIFU MU LUTIRICHI LWITAKHO NENDE LWISUKHA

¹ “Muvoolele kenako koosi khu mulivula khulekha khulonda lisuuvila lienyu.

² Muliitsa khukhungwa khurula mu masinagogi. Khali ndio, ni kilikali isaa iliitsa khutukha lwa mundu aliitsa khumwiira nakanakana akholanga muhinzilu kwa Nyasaye.

³ Vandu valiitsa khumukhola vindu khuli vienevo, shichila vakorwa Tata inoho inzi.

⁴ Navutswa muvoolele vindu vienevo, khu lwa isaa iliitsa khutukha yu khukhola vindu vienevo, mulimanya ndi ninzi wamuvoolelakhu. “Shinali namuvoolelakhu vindu vienevo muliraanga tawe, shichila nali na munyi.

Muhinzilu kwa Roho Mutakatifu

⁵ Navutswa nunundi nzitsanga khu woyo wanduma; navutswa khali ndio, mundu avulakhuho khali mulala khu munyi unyala khundeva, ‘Ni hena ha utsitsanga?’

⁶ Lwa mboli nunundi vindu vienevo, muli nu vuveleli mu mioyo chienyu.

⁷ Navutswa muvoolelanga kilikali ndi nu vulahi khu munyi ninduliho, shichila nanyala khuvula khurulaho, Mukhonyani shialiitsa khwitsa khu munyi tawe. Navutswa niiva narulaho, niitsa khumurumila.

⁸ Lwa Mukhonyani aliitsa khwitsa, aliitsa khumanyinya havulavu vutamanu vwa vandu vakhola shichila vwoni, vulunji vwa vandu vakhola shichila vulunji; khandi khulondokhana khuli Nyasaye aliitsa khukhalachila vandu.

⁹ Vakorwa shia shindu shiosi khulondokhana khu vwoni, shichila vandu vayambakhana khusuuvila mwinzi.

¹⁰ Vakorwa shia shindu shiosi khulondokhana khu ku vulunji, shichila nzitsanga khu Tata, khandi shiumuliitsa khundolakhu inzi tawe.

¹¹ Vakorwa shia shindu shiosi khulondokhana khuli Nyasaye aliitsa khukhalachila vandu, shichila mwimilili wi shivala shinu wakhalachilwa khale.

¹² “Ndi na makhuva manyishi ku khumuvoolela; navutswa nunundi shiumunyala khutsililila khwikhutsila tawe.

¹³ Navutswa lwa Roho aliitsa khwitsa, umanyinyanga katoto khulondokhana khu Nyasaye, aliitsa khumwimilila mu katoto koosi. Shialiitsa khulomoloma khulondokhana khu vunyali vwevwe tawe, navutswa aliitsa khulomoloma khulondokhana khu kahulilanga, khandi avoole makhuva khulondokhana khu vindu viliitsa khwitsa.

¹⁴ Aliitsa khuhaana vukhumi khwinzi, shichila aliitsa khuhulila ka niitsa khumuvoolela khandi amuvoolele.

¹⁵ Shia shindu shiosi shia Tata wanje ali nashio ni shianje; nako kachilanga nimuvoolela ndi Roho aliitsa khuhulila ka niitsa khumuvoolela khandi amuvoolele.”

Khuvelela nende Khusangala

¹⁶ Yesu yatsililila khuvoola, “Matukhu mati karikale ka mutsitsanga khuvula khulola inzi; khandi matukhu mati nikakhavira, muliitsa khulola inzi.”

¹⁷ Valala khu veechi veve vareevana vene khuvene, “Yaka kanyala khuva kamanyinyanga shina? Akhuvoolelanga matukhu mati karikale shiukhunyala khumulolakhu tawe; khandi matukhu mati nikakhavira, khuliitsa khumulola; khali avoolanga khandi, ‘Shivune shili ndi nzitsanga khu Tata.’

¹⁸ Vatsililila khureevana, nu khuvoola shina ‘Matukhu mati karikale’? Khukorelwi shiavoolanga.”

¹⁹ Yesu yali namanyi venyanga khumureeva mareevo. Khulwa yako, yavavoolela, “Mboli, ‘Matukhu mati karikale shiumuliitsa khulola inzi tawe; khandi matukhu mati nikakhavira, muliitsa khulola inzi.’ Nako kachilanga nu mureevana vene khuvene?

²⁰ Muvoolelanga katoto ndi muliitsa khulila nu mwikhula, navutswa vandu vu mu shivala valiitsa khusangala. Muliitsa khuvelela, navutswa khuvelela khwenyu khuliitsa khuchila musangale.

²¹ Lwa mukhali avetsanga nali himbi khwivula mwana, avelelanga shichila isaa yeye yu khunyakhana ivetsanga ni yakhatukha; navutswa lwa mwana avetsanga niyakhivulwa, yivililanga linyakhana lielie, shichila ali nu vuyaanzi mwana umali khwivulwa mu shivala.

²² Nindio khandi kali khu munyi: nunundi muvelele; navutswa niitsa khukalukha khandi khumulola, mamusangale muno mu mioyo chienyu, lisangala lia mundu anyala khuvula khurulitsa khu munyi.

²³ “Lwa litukhu lienelo liliitsa khutukha, muliitsa khuvula khundevakhu shindu shiosi. Muvoolelanga katoto ndi Tata aliitsa khumuha shia shindu shiosi shiamureeva khuvirila mu lira lianje.

²⁴ Khali nunundi mushili khureevakhu shindu shiosi khuvirila mu lira lianje. Reevi, muliitsa khunyola khu muve nu vuyaanzi vwatoto.

Yesu Yakuura Shivala

²⁵ “Mali khurumishila makhuva ki tsinganu khumuvoolela vindu vienevo. Navutswa litukhu liliitsa khutukha, lwa niitsa khuvula khurumishila makhuva ki tsinganu, navutswa niitsa khulomoloma khu munyi havulavu vuchila khumuvisakhu likhuva liosi khulondokhana khu Tata.

²⁶ Lwa litukhu lienelo liliitsa khutukha, muliitsa khureeva Tata shia shindu shiosi khuvirila mu lira lianje; shikali mbolanga namureevela tawe,

²⁷ shichila Tata wamuyaanza mwene. Wamuyaanza, shichila mwanyanza khandi mwasuuvila ndi narula khu Nyasaye.

²⁸ Narula khu Tata ninzitsa mu shivala; khandi ndulanga nunundi mu shivala, khandi nzitsanga khu Tata wanje.”

²⁹ Veechi veve vamuvoolela, “Ulomolomanga havulavu nunundi vuchila khurumishila makhuva ki tsinganu.

³⁰ Khwakhamanya nunundi ndi wamanya shia shindu shiosi; khandi shiunyala khwenyakhu mundu akhureeve mareevo tawe. Yaka nako kachilanga nu khusuuvila ndi warula khu Nyasaye.”

³¹ Yesu yavareeva, “Mwakhasuuvila nunundi?

³² Navutswa litukhu lili himbi khutukha, khali liatukha khale, lwa munyi voosi muliitsa khusalanyinywa, shia mulala ingo wewe, khandi niitsa khulekhwa wonyene; navutswa katoto shindi wonyene tawe, shichila Tata wanje ali ninzi.

³³ Muvoolele ndio, khu lwa muli mwinzi, muliva ni milembe. Vandu vu mu shivala shinu valiitsa khuchila munyakhane. Navutswa mwikhutsili! Namala khukuura shivala!”