YOHANA 14 - IBIBILIA INDAKATIFU MU LUTIRICHI LWITAKHO NENDE LWISUKHA

Yesu Neye Injila yu Khutsia khu Tata

¹ Yesu yavoolela veechi veve, “Muvuli khunyakhana mu mioyo chienyu. Suuvili mu Nyasaye khandi musuuvile mwinzi khandi.

² Inzu ya Tata wanje ilimu ni viko vinyishi; nikakhavele kario, shimbele namuvoolela nzitsayo khumulombela vwiyangu tawe.

³ Niiva natsia khumulombela vwiyangu vwenovo, niitsa khukalukha khumuvukula khumuhila wamba nindi, khu muve khandi wamba nindi.

⁴ Mwamanya injila itsitsanga wanzitsanga.”

⁵ Tomasi yareeva Yesu, “Mwami, khwakorwa wa utsitsanga; khu khunyala khumanya ndina injila yu khutsiayo?”

⁶ Yesu yamuchipa, “Ninzi injila, katoto, nende vulamu. Mundu avulakhuho utsitsanga khu Tata nakhavirili khwinzi.

⁷ Muva nu mwamanya inzi toto, khani mwamanya Tata wanje khandi; navutswa khuraanjila nunundi, mumali khumumanya khandi mumuloli.”

⁸ Filipu yavoolela Yesu, “Mwami, khumanyinyi Tata; nako koosi ka khwenyanga.”

⁹ Yesu yachipa, “Filipu, namenya na munyi voosi khumatukhu manyishi; navutswa kanyala khuva mwangorwa? Mundu walolakhu inzi walola Tata. Khulwa yako, unyala khuvoola munjila shina, ‘Khumanyinyi Tata’?

¹⁰ Filipu, shiunyala khusuuvilakhu inzi ndi mu Tata, na Tata ali mwinzi tawe?” Yesu yavoolela veechi veve, “Makhuva kamuvoolelanga, shikali kaanje mwene tawe. Navutswa Tata uli mwoyo mwinzi akholanga muhinzilu kwekwe.

¹¹ Musuuvili inzi, lwa muvoolelanga ndi inzi ndi mu Tata, na Tata ali mwinzi. Niiva shikali kario, musuuvile shichila mihinzilu chiakholanga.

¹² Muvoolelanga kilikali ndi mundu usuuvilanga mwinzi, aliitsa khukhola mihinzilu chia inzi kholanga khandi. Aliitsa khukhola khali mihinzilu chi tsingulu mikali khuvira chienecho, shichila nzitsanga khu Tata wanje.

¹³ Niitsa khumukholela shia shindu shiosi shiamureeva khuvirila mu lira lianje, khu Mwana akhuminyi Tata.

¹⁴ Munyala khundeva shiamwenyi shiosi khuvirila mu lira lianje, ninzi niitsa khumukholela.

Yesu Yavalaaka Roho Mutakatifu

¹⁵ “Niiva mwanyanza, muliitsa khutsililila khulonda malako kaanje.

¹⁶ Ninzi niitsa khureeva Tata, naye aliitsa khumuha Mukhonyani wundi, uliitsa khumenya na munyi mihika ni mihika.

¹⁷ Neye Roho umanyinyanga katoto. Vandu voosi mu shivala shivanyala khumuhuchilila tawe, shichila vashili khumulolakhu khandi vamukorwa. Navutswa munyi mwamumanya, shichila amenyanga na munyi, khandi ali na munyi.

¹⁸ “Lwa niitsa khutsia, shiniitsa khumulekha munyi khuli vavisandu tawe; navutswa niitsa khukalukha khu munyi.

¹⁹ Matukhu mati nikashili khuvira, vandu vu mu shivala shivaliitsa khundolakhu inzi tawe; navutswa munyi muliitsa khulola inzi. Lwandi mwoyo, khali munyi muliitsa khuva mwoyo.

²⁰ Khulitukhu lienelo, nalwo lwa muliitsa khumanya ndi inzi ndi mu Tata wanje, na munyi muli mwinzi, khuli lwa inzi ndi mu munyi.

²¹ “Mundu uhuchililanga malako kaanje, khandi akalonda neye mundu wayaanza inzi. Tata wanje aliitsa khuyaanza mundu wayaanza inzi. Khali inzi mwene niitsa khumuyaanza, nu khwimanyinya mwene khuye.”

²² Yuda (shiali Yuda Isikarioti tawe) yamureeva, “Mwami, shichila shina uli ni lienya liu khwimanyinya mwene khu khutsi, navutswa khu vandu vu mu shivala tawe?”

²³ Yesu yachipa, “Niiva mundu wayaanza inzi, alatsililila khulonda mechitso kaanje. Tata wanje alamuyanza. Inzi nende Tata wanje khuliitsa khwitsa khuye khandi khumenye naye.

²⁴ Mundu wakhayaanza inzi, shianyala khulonda mechitso kaanje tawe. Mechitso kamuhulilanga, shikali kaanje mwene tawe; navutswa ni ka Tata wanje, wanduma.

²⁵ “Muvoolele yaka, lwa shili na munyi.

²⁶ Navutswa Mukhonyani, nali Roho Mutakatifu, wa Tata aliitsa khuruma khuvirila mu lira lianje, aliitsa khumwechitsa shia shindu shiosi. Aliitsa khumwitsushitsa shia shindu shiosi shia namwechitsa.

²⁷ “Murichilanga munyi milembe. Ni milembe chianje mwene chiamuheetsanga. Shichili khuli milembe chia vandu vu mu shivala vahaananga tawe. Muvuli khunyakhana mu mioyo chienyu inoho khuria.

²⁸ Mwahulila nimuvoolela, ‘Ndulaho, navutswa niitsa khukalukha khu munyi.’ Muva numwanyanza, mwakhasangali shichila nzitsanga khu Tata wanje; lwa Tata ali nu vunyali vunyishi khumbira.

²⁹ Mali khumuvoolela nunundi makhuva yaka nikashili khwikholekha, khu, lwa kaliitsa khwikholekha, mulisuuvila.

³⁰ Shinyala khulomoloma na munyi khuluhono tawe, shichila mwimilili wamihanga shivala shinu yitsanga. Shikali ali ni tsingulu tsiu khungura tawe;

³¹ navutswa khutukha vandu vu mu shivala vamanye ndi nayaanza Tata; khandi kholanga vutswa shia shindu shiosi shia Tata ambolelanga khole. “Hambi nunundi; leshi khuruli havundu hanu.