YOHANA 13 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Yesu Yasavitsa Veechi Veve Vilenje

¹ Khulitukhu liu Mulukha kwa Pasaka nu kushili khutukha, Yesu yali umanyi ndi isaa yeye yakhatukha khurula mu shivala shinu khutsia khu Tata. Yali wayaanza vandu veve vu mu shivala; khali yavayaanza khutukha lukhumalilikha.

² Yesu nende veechi veve vali nivaliitsanga shiukhulia shia halukolovo. Ibilisi yali navishi khale mu mwoyo kwa Yuda, mwana wa Simoni Isikarioti, inganakani yu khutsama Yesu.

³ Yesu yali wamanya ndi Tata wamuha vunyali vu khusinjilila shia shindu shiosi; khandi yali wamanya ndi yarula khu Nyasaye khandi akalukhanga khu Nyasaye.

⁴ Khulwa yako, yasinjila lwa yali naliitsanga shiukhulia, nanavula inguvu yeye ya yali niyifwali khwikulu, niyivoha itahulu mu shisiindi mwemwe.

⁵ Niyakhakhola kenako, yatsukha matsi khu lukalayi, naraanga khusavitsa veechi veve vilenje, khandi naveeya nitahulu ya yali niyivohi mu shisiindi mwemwe.

⁶ Yesu yisuunda khu Simoni Petro, ma Petro namureeva, “Mwami, unyala khusavitsa vilenje vianje?”

⁷ Yesu yamuchipa, “Shiunyala khumanyikhu nunundi shia kholanga tawe; navutswa uliitsa khumanya khale.”

⁸ Petro yamuvoolela, “Shiunyala khusavitsakhu vilenje vianje khali hati hene tawe.” Yesu yamuvoolela, “Niiva nyala khuvula khukhusavitsa vilenje viovio, shiunyala khuva mweechi wanje tawe.”

⁹ Simoni Petro yachipa, “Mwami, uvuli khusavitsa vilenje vianje vionyene, navutswa usavitse khali makhono kaanje nende murwi kwanje!”

¹⁰ Yesu yamuvoolela, “Mundu umali khwisinga asavanga vilenje vievie vionyene; mmbili kwekwe kwosi nu munihu. Munyi muli vanihu, khali niiva munyi voosi shiumuli vanihu tawe.”

¹¹ Yesu yali wamanya khale mundu wali natsitsanga khumutsama; khandi nako kachila navoola, “Munyi voosi shiumuli vanihu tawe.”

¹² Lwa Yesu yali namali khusavitsa veechi veve vilenje viavo, yifwala tsinguvu tsietsie tsiu khwikulu nakalukha havundu ha yali niyikhale, lwa valiitsanga shiukhulia hamesa. Yesu yavareeva, “Munyala khumanya kakholi munyi?

¹³ Munyi munaanganga Mwechitsi khandi Mwami; nu vulahi lwa mukholanga ndio, shichila nindio ndi.

¹⁴ Niiva inzi, Mwami wenyu khandi Mwechitsi wenyu, mali khumusavitsa vilenje vienyu, munyi khandi khutukha musavitsane vilenje vienyu.

¹⁵ Mali khumumanyinya mwiima kwa munyala khulonda numukhola, khuli lwa inzi mwene mukholele munyi.

¹⁶ Muvoolelanga kilikali ndi murumishi avulakhuho uli ni tsingulu tsinyishi khuvira muruchi wewe; khandi murumwa avulakhuho uli ni tsingulu tsinyishi khuvira woyo wamuruma.

¹⁷ Lwa mumanyi nunundi vindu yivi, muliitsa khukasitswa, niiva muliitsa khuvikhola!

¹⁸ “Shinyala khuva nomolomanga makhuva yaka shichila munyi voosi tawe; navutswa manyi vulahi yavo va narovola. Kikholekha kario khu Mahandiko Matakatifu karweshitswi kavoolanga, ‘Mundu wa khwasanga naye khulia, neye wangalukhana.’

¹⁹ Muvoolelanga makhuva yaka nunundi nikashili khwikholekha, khu lwa kaliitsa khwikholekha, mulisuuvila, ‘Ninzi ye.’

²⁰ Muvoolelanga kilikali ndi mundu winjilitsakhu mundu wanaruma, yinjilitsanga khandi inzi. Mundu winjilitsanga inzi, yinjilitsanga woyo wanduma.”

Yesu Yavoola Matukhu Nikashili Mundu Wanamutsame

²¹ Lwa Yesu yali namali khuvoola ndio, yanyakhana mu mwoyo kwekwe navoola havulavu, “Muvoolelanga kilikali ndi mulala khu munyi atsitsanga khunzama!”

²² Veechi veve vaheenzana vene, nivavula khumanya mundu wa Yesu yalomolomanga khulondokhanakhu.

²³ Mulala khu veechi va Yesu, wa Yesu yali niyayaanza yali wikhale himbi khu Yesu.

²⁴ Simoni Petro yamusima, namuvoolela, “Mureeve akhuvoolele mundu wavoolanga.”

²⁵ Khulwa yako, mwechi mwenoyo yisuunda himbi khu Yesu namureeva, “Mwami, ni viina?”

²⁶ Yesu yachipa, “Nu mundu wa nzitsanga khuha shitonye shiu mukati yuku, lwa mba ninakhakwina mu ibakuli.” Lwa yinikha shitonye shiu mukati mu ibakuli, yaha Yuda Isikarioti, mwana wa Simoni.

²⁷ Lwa Yuda yavukula vwangu mukati kwenoko, Shetani yinjila muye. Yesu yavoolela Yuda, “Khola ka wenyanga khukhola vwangu.”

²⁸ Mundu avulakhuho khu yavo vali nivaliitsanga shiukhulia hamesa wali namanyi shivune shichilanga Yesu namuvoolela ndio.

²⁹ Valala khu veechi venavo vakanakana, Yesu yamuvoolelanga, “Kuula vindu via khurumishila mu mulukha” inoho “Haa vamanani shindu,” shichila Yuda neye wavikhanga shisiko shi tsisenti.

Lilako Liyia

³⁰ Lwa Yuda yavukula vwangu shitonye shiu mukati, yasimukha natsia ilwanyi vwangu; manuvuva vutukhu.

³¹ Lwa Yuda yarulaho, Yesu yavoola, “Mwana wu Mundu umali khuheelwa vukhumi nunundi, khandi Nyasaye ukhuminywi khuvirila muye.

³² Niiva Nyasaye ukhuminywi khuvirila muye, Nyasaye alakhuminya Mwana wu Mundu khuvirila muye mwene, khandi alamukhuminya vwangu.

³³ Munyi vamuli khuli vaana vaanje, natsililila khumenya halala na munyi khumatukhu mati konyene. Muliitsa khukhava inzi, navutswa muvoolelanga nunundi ka navoolela Vayahudi, ‘Shiumunyala khwitsa wanzitsanga tawe.’

³⁴ Muheetsanga lilako liyia nunundi: Muyaanzane vene. Khutukha muyaanzane vene, khuli inzi namuyaanza.

³⁵ Niiva mulayaanzana vene munjila iyi, nalwo lwa vandu voosi valiitsa khumanya ndi muli veechi vaanje.”

Yesu Yavoola Kushili Khuli Petro Amwambakhana

³⁶ Simoni Petro yareeva Yesu, “Mwami, ni hena ha utsitsanga?” Yesu yachipa, “Shiunyala khunonda nunundi wa nzitsanga tawe; navutswa uliitsa khunonda khale.”

³⁷ Petro yareeva Yesu, “Mwami, Shichila shina mbuli khukhulonda nunundi? Nzirecheshe khukhutsa shichila yivi!”

³⁸ Nalwo lwa Yesu yamureeva, “Ni kilikali, wirecheshe khukhutsa shichila inzi? Khuvoolelanga katoto ndi itaywa nishili khulakula, uliitsa khuvoola hali khavaka wakorwa shindu shiosi khulondokhana khwinzi.”