YOHANA 11 - IBIBILIA INDAKATIFU MU LUTIRICHI LWITAKHO NENDE LWISUKHA

Likhutsa lia Lazaro

¹ Mundu wundi walaangwangwa Lazaro, wi litaala lia Betsania, yali walwala. Mariya nende mwana wi shikhana wavo Malita vamenyanga mu litaala lienelo.

² Mariya, nali mbotso Lazaro walwalanga, neye wali mulala mwele wavekha vilenje viu Mwami Yesu makura; khandi niyeeya vilenje vienevo ni liswi lielie.

³ Khulwa yako, vaana vi shikhana vanga Lazaro venavo varuma likhuva khu Yesu, nivavoola, “Mwami, mulina wowo wa yivi mwene wayaanza alwalanga.”

⁴ Lwa Yesu yahulila ndio, yavoola, “Vulwale yuvu shiuvunyala khumwiira tawe; navutswa nu vulwale vuliho shichila vukhumi vwa Nyasaye, khu Mwana wa Nyasaye aheelwi vukhumi khuvirila muvwo.”

⁵ Yesu yali wayaanza Malita nende Mariya, halala na mbotso wavo Lazaro.

⁶ Khali ndio, lwa Yesu yahulila ndi Lazaro alwalanga, yatsililila khumenya havundu ha yali nali khumatukhu kandi kavili.

⁷ Yavoolela veechi veve, “Hambi khukalushi mu lusomo lwa Yudeya.”

⁸ Navutswa veechi veve vamureeva, “Mwechitsi, matukhu mati kamali khuvira, lwa Vayahudi venyanga khukhulesa na machina. Wenyanga khukalukhayo khandi toto?”

⁹ Yesu yareeva veechi veve, “Mbasu shiukuli ni tsisaa likhomi na tsivili? Mundu uchendanga mbasu nu kwakhanga shianyala khwisikarila tawe, shichila alolanga vulavu vwakhanga mu shivala shinu.

¹⁰ Navutswa mundu uchendanga vutukhu anyala khwisikarila, shichila avula vulavu.”

¹¹ Yesu yavoola ndio, nameetakhu, “Mulina weru Lazaro umali khukona tsindolo; navutswa natsiayo khumuvushitsa khurula mu tsindolo.”

¹² Veechi vachipa Yesu, “Mwami, niiva Lazaro umali khukona tsindolo, alasosa.”

¹³ Yesu yali ulomolome makhuva khulondokhana khu likhutsa lia Lazaro; navutswa veechi veve vali ninganakani ndi Yesu avoolanga Lazaro umali khukona tsindolo tsiatoto.

¹⁴ Khulwa yako, Yesu yavavoolela havulavu, “Lazaro umali khukhutsa,

¹⁵ khandi sangalanga shichila munyi, lwa mbuli khuvaho, khu nikanyalikha musuuvile. Chendi khutsi khumulola.”

¹⁶ Tomasi (wali ni lira lindi Likhwane) yavoolela veechi veshie, “Chendi khali voosi khutsi nu mwechitsi, khu nikanyalikha khuve nu khukhutsanga naye!”

Yesu neye Mwisimushitsi nende Vulamu

¹⁷ Lwa Yesu yatukhaho, yanyola Lazaro namali mu shilindwa khumatukhu kane.

¹⁸ Litaala lia Betsania liali himbi tsikilomita tsivaka khurula Yerusalemi;

¹⁹ khandi Vayahudi vanyishi vali vayitsa khuleminya mwoyo Malita nende Mariya khulondokhana khu likhutsa lia mbotso wavo.

²⁰ Lwa Malita yahulila ndi Yesu yali niyitsanga, yasimukha natsia khumwakanila; navutswa Mariya yarikala hango.

²¹ Malita yavoolela Yesu, “Mwami, niiva wakhavele hanu, mbotso wanje shiavele wakhutsa tawe!

²² Navutswa manyi ndi shia shindu shiosi shiutsitsanga khureeva khu Nyasaye, Nyasaye aliitsa khukhuha.”

²³ Yesu yamuvoolela khandi, “Mbotso wowo aliitsa khwisimukha khurula mu likhutsa.”

²⁴ Malita yamuvoolela, “Manyi ndi aliitsa khwisimukha khurula mu likhutsa, khandi khulitukhu liukhumalilikha, lwa vandu vakhutsa valiitsa khwisimushitswa khurula mu likhutsa.”

²⁵ Yesu yavoolela Malita, “Ninzi mwisimushitsi wa vandu khurula mu likhutsa nende vulamu. Mundu usuuvilanga mwinzi, alatsililila khuva mwoyo, khali niiva aliitsa khukhutsa;

²⁶ khandi mundu uli mwoyo khandi asuuvilanga mwinzi, shialiitsa khukhutsa tawe. Ni kilikali, unyala khuva usuuvilanga mu makhuva yaka?”

²⁷ Malita yamuchipa, “Mwami, ni kilikali! Ndi ni lisuuvila ndi nivi Masiha, Mwana wa Nyasaye, wenyekhanga khwitsa mu shivala.”

Yesu Yalila

²⁸ Lwa Malita yali namali khuvoola ndio, yasimukha natsia khulaanga mwana wi shikhana wavo Mariya. Yamuvoolela muvwivisi, “Mwechitsi ali hanu; khandi akhureevanga.”

²⁹ Lwa Mariya yahulila ndio, yarula vwangu natsia khumulola.

³⁰ Yesu yali nashili khwinjila mu muchitsi; navutswa yali nashili havundu ha Malita yamwakanila.

³¹ Lwa Vayahudi vali nivali munzu nivaleminyanga mwoyo Mariya, valola Mariya natsitsanga ilwanyi; vamulonda, nivakanakana atsitsanga ha shilindwa khulililaho.

³² Mariya yatukha havundu ha Yesu yali nali; khandi lwa yalola vwangu Yesu, yakwa ha vilenje hehe; navoola, “Mwami, niiva wakhavele hanu, mbotso wanje shiavele wakhutsa tawe.”

³³ Lwa Yesu yamulola nalilanga; khandi Vayahudi va yali nachendi navo nivalilanga, yavelela mu mwoyo kwekwe, nanyakhana.

³⁴ Yavareeva, “Ni hena hamumurele mmbili kwekwe?” Vachipa, “Mwami, hamba ulole.”

³⁵ Yesu yalila.

³⁶ Nalwo lwa Vayahudi vavoola, “Lolikhu khuli yali niyamuyaanza!”

³⁷ Navutswa valala khuvo vavoola, “Nikava mundu uyu yahonyinya mundu muvekhu, yakhikalili Lazaro khukhutsa.”

Lazaro Yisimushitswa Khurula mu Likhutsa

³⁸ Lwa Yesu yali navelele muno mu mwoyo kwekwe khandi, yatukha ha shilindwa; shilindwa shienesho shiali luhangaywa, khandi lichina liali ni likhunishwi mu vwinjililu vwi shilindwa tsana.

³⁹ Yesu yavavoolela, “Rulitsikhu lichina yili.” Malita, wali nali mbotso wa Lazaro yavoolela Yesu, “Mwami, matukhu kakhavira kane khurula nu khumura mu shilindwa; vukuundu vulahuunya vutamanu muno!”

⁴⁰ Yesu yamuvoolela, “Shimbele nikhuvoolele ndi niiva unyala khusuuvila, uliitsa khulola vukhumi vwa Nyasaye!”

⁴¹ Vandu vali nivaliho varulitsakhu lichina. Yesu yaheenza mwikulu navoola, “Tata wanje, khusanditsanga shichila umali khumbulishitsa.

⁴² Namanya ndi shia khase khosi umbulishitsanga; navutswa mbolanga yaka khukhonya vandu vasinjile hanu, khu vasuuvili ndi nivi wanduma.”

⁴³ Lwa Yesu yali namali khuvoola ndio, yalaanga nu mwoyo mukali, “Lazaro, rula mu shilindwa!”

⁴⁴ Mukhutsu mwenoyo yarula ilwanyi, makhono keke nende vilenje nivivoheelwi ni tsinguvu tsi shilindwa, khandi shilaka nishivoheelwi khuvotokhana khu vweni vwevwe. Yesu yavavooleela, “Muvohololi atsi.”

Khuli Valoshitsa Khwiira Yesu

⁴⁵ Khulwa yako, Vayahudi vanyishi vali nivitsa khucheniha Mariya, khandi vali nivaloli ka Yesu yali nakholi, vasuuvila mu Yesu.

⁴⁶ Navutswa valala khuvo vasimukha nivatsia khulola Vafarisayo; nivavavoolela ka Yesu yali nakholi.

⁴⁷ Nalwo lwa Vafarisayo halala na vasalisi vakali vakana nende vandu vi Shikhaalo; nivavoola, “Ni shina shia khunyala khukhola? Lolikhu viloleshitsu vinyishi viu mundu uyu akholanga vutswa!

⁴⁸ Niiva khulamulekha atsililile khukhola khuli akholanga, shia mundu wosi alatsililila khusuuvila muye; khandi Varoma vanyala khwitsa khwononyinya Litempeli lieru nende shivala shieru!”

⁴⁹ Mulala khu Vafarisayo venavo, walaangwangwa Kayafa wali nali Mukali wa vasalisi voosi khumuhika kwenoko, yavavoolela, “Shindu shivulakhuho shia mwamanya!

⁵⁰ Shiumumanyikhu nu vulahi khulekha mundu mulala khukhutsila vandu voosi, khuvira shivala shieru shiosi khutivitswa.”

⁵¹ Shiyavoola kenako khuvirila khu vunyali vwevwe mwene tawe; navutswa shichila yali nali Mukali wa vasalisi voosi khumuhika kwenoko. Yaprofetanga ndi Yesu aliitsa khukhutsila Vayahudi;

⁵² khandi shikali shichila vo vonyene tawe, navutswa khulera mu mmbili mulala vandu va Nyasaye vali ni vasalanyinywa shia havundu hosi.

⁵³ Khuraanjila khulitukhu lienelo, vimilili va Vayahudi valoshitsa khuli vanyala khwiira Yesu.

⁵⁴ Khulwa yako, Yesu, shikali yachendakhu havulavu mu lusomo lwa Yudeya tawe; navutswa yarula natsia havundu handi himbi mu shiangalangwi natukha mu litaala lialaangwangwa Efurahimu, ha yamenya na veechi veve.

⁵⁵ Lwa litukhu liu Mulukha kwa Pasaka lia Vayahudi liali nilili himbi khutukha, vandu vanyishi varula mu mataala kavo, nivatikulukha Yerusalemi khutsiayo khukhola mwiima ku khwinihitsa, mulukha nu kushili khutukha.

⁵⁶ Khulwa yako, vatsililila khukhava Yesu nivavoolelana vene nivali mu Litempeli, “Ni shina shia mukanakananga khukhola? Ni katoto shianyala khwitsa mu mulukha tawe?”

⁵⁷ Vasalisi vakali nende Vafarisayo vali nivahaani lilako ndi mundu alikhuho unyala khumanya havundu ha Yesu ava nali, avavoolele khu vatsiyo khumukumila.