YEREMIA 3 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Vaisraeli Vambakhana khuva Vasuuvilwa

¹ Mwami Nyasaye avoolanga, “Niiva musatsa aliitsa khulekhana nu mukhali wewe wa yahila, ma mukhali mwenoyo atsi lukhali khu musatsa wundi, aliitsa khuvula khukalukha khu musatsa wewe wali wu khuraanga. Niiva kaliitsa khwikholekha kario, shivala shinyala khwononyinywa. Navutswa Israeli, wahila vayaanze vanyishi, navutswa nunundi wenyanga khukalukha khwinzi!

² Chingula tsimoni tsiotsio ha vutoonje vwi vikulu, ulole! Ni hena ha wavula khukonakhu nu mundu? Walindilila vayaanze vovo khundulu khwi tsinjila, khuli Muarabu alindililanga shindu mu shiangalangwi. Nivi wononyinya shivala khuvirila mu likhola liolio liu vulaaya nende vindu vitamanu.

³ Nashio shivune shichilanga imbula nisinjilitswa, imbula yi shimiyu nivula khwitsa. Khali ndio, usasananga nu mukhali wu kholanga vulaaya; khali tsisoni ni shindu khu yivi tawe.

⁴ “Khali nunundi wilililanga khwinzi nunanga, ‘Tata wanje, nivi wanyanza khuraanjila nishili mwana.

⁵ Uliitsa khutsililila khungumilila vurima mihika ni mihika? Ulatsililila khuvula khuyaanzitswa ninzi mihika ni mihika?’ Israeli, nako ka mwene uvoolanga, navutswa wakhola vindu vitamanu via mwene wikombanga khukhola.”

Israeli nende Yuda Vikanile

⁶ Mumatukhu kiliamiha liu Mwami Yosia, Mwami Nyasaye yambolela, “Ulolikhu vindu via Israeli, wambakhana khuva musuuvilwa yakhola? Khuli yasimukha natsia khu shia shikulu shiraambi; khandi ha shia musala kwosi muviisi, nu kuli mwiima ku khukholelayo vulaaya.

⁷ Khali Israeli namali khukhola kenako koosi, nasuuvila anyala khukalukha khwinzi; navutswa wayambakhana khukalukha. Yuda, uli khuli mwana wi shikhana wavo muvehi shiyariakhu tawe. Navutswa ni kilikali, yasimukha nakhola vulaaya khuli Israel.

⁸ Khali Yuda yalola khuli nalekhana na Israeli; khali nimukhunga shichila yanzambakhana, manakhola vulaaya. Navutswa Yuda, nali mwana wi shikhana wanga Israeli shiyariakhu shindu shiosi tawe. Khali ye yali khuli mukhali wakholanga vulaaya.

⁹ Lwa yavukula vulaaya vwa yakholanga khuli ni shindu khuye, yononyinya shivala, lwa yasaala khu lichina nende musala.

¹⁰ Khali mu kenako koosi, mwana wi shikhana wavo Yuda yambakhana khukalukha khwinzi nu mwoyo kwosi, navutswa muvwikhola kholitsi. Inzi Mwami Nyasaye mali khuvoola.”

¹¹ Nalwo lwa Mwami Nyasaye yambolela, “Israeli wambakhana khuva musuuvilwa wamanyinya avula vutamanu vwosi khuvira Yuda muvehi woyo.

¹² Mwami Nyasaye yambolela nzi khuvoolela Israeli, ‘Yivi Israeli wambakhana khuva musuuvilwa, kalukha khwinzi vwangu. Shinyala khukhuvukulila vurima tawe; shichila ndi wi tsimbavasi, khandi mbulakhu vurima vwi mihika ni mihika. Inzi Mwami Nyasaye mali khuvoola.

¹³ Voola vutswa vutamanu vwenyu vene, khuli mwahinganyinya inzi Mwami Nyasaye, uli Nyasaye wenyu, khuli mwayaanza vanyasaye va vandu vi tsimbia tsindi hasi ha shia musala kwosi muviisi, khandi khuli mwambakhana khulonda malako kaanje. Inzi Mwami Nyasaye mali khuvoola.’

¹⁴ “Munyi vandu vamushili khuva vasuuvilwa, kalushi; shichila ninzi muruchi wenyu; niitsa khuvukula shia mulala khurula mu litaala, vavili khurula mu vandu vu lwivulu, nu khumulera mu Sayoni.

¹⁵ “Niitsa khumuha vayi va nayaanzitswa navo; valiitsa khumwimilila nu vucheli nende limanya.

¹⁶ Mumatukhu kenako, lwa muliitsa khuva numwivulana mu vunyishi mu shivala shienesho, vandu valiitsa khulekha khuvoolakhu shindu shiosi khu Lisanduku li Lilakano liu Mwami Nyasaye. Mundu avulakhuho uliitsa khukanakanakhu shindu shiosi inoho khwitsushitsakhu makhuva koosi khulondokhana khulio. Khali shivaliitsa khwenya Lisanduku li Lilakano lienelo, inoho khulomba lindi khusasa khuli lienelo tawe.

¹⁷ Mumatukhu kenako, litaala likali lia Yerusalemi liliitsa khuva shisoko shiu vwami vu Mwami Nyasaye. Vandu vi tsimbia tsiosi valiitsa khwitsa imbeli wanje inzi Mwami Nyasaye.

¹⁸ Mumatukhu kenako, vandu va Yuda valiitsa khwiyunga na Vaisraeli; khandi valiitsa khwitsila khulala khurula mu shivala khuluveka luli ivuluka, shia nali ninaha vakuuka venyu vamenyemu khuli miandu chiavo.”

Vandu va Nyasaye Vasaala khu Misambwa

¹⁹ Mwami Nyasaye avoolanga, “Israeli, ninzi wakhwivula, vwakhavele vulahi nikhwikhalitsi mu vaana vaanje, makhuhe shivala shilahi shiene, miandu chinyala khuvula khuvwa mu vandu vi tsimbia tsindi tsiosi. Nali ninganakani muliitsa khunanganga, ‘Tata’, khu muvuli khunzivilila.

²⁰ Khali ndio, khuli lwa mukhali wambakhana khuva mu vusuuvilwa alekhananga nu musatsa wewe, nindio khandi yivi Israeli wambakhana khuva musuuvilwa khwinzi. Inzi Mwami Nyasaye mali khuvoola.

²¹ “Mwoyo kuhulilikhananga mu vikulu, nu kuvoola, Vaisraeli valilanga nivikhula, shichila vakoyana mu vikholwa viavo, vanzivilila inzi Mwami Nyasaye, uli Nyasaye wavo.

²² Munyi voosi vamwambakhana khuva vasuuvilwa, kalushi; niitsa khumuhonyinya khumukhola khuva vasuuvilwa.” Munyi muvoolanga, “Lola! Khwitsanga khu yivi Mwami Nyasaye, shichila uli Nyasaye weru.

²³ Ni kilikali, khwakoyana muno lwa khusaalanga khu vikulu khuli nu musambwa khandi khwakaatwa mu likhola kenako; ni kilikali Mwami Nyasaye, uli Nyasaye weru neye uhonyinyanga Israeli.

²⁴ “Navutswa vindu viosi via vakuuka veru vakhola tsingulu nivarweshitsa, miruku chiavo, viayo viavo via makondi, vaana vavo vi shiyayi nende vi shikhana, viayononyinywa khuraanjila mu vuvukha vweru.

²⁵ Nu vulahi khukwa mu tsisoni, nu khuvula khuheelwa luyali, shichila khutsi nende vakuuka veru khwakhola vwoni imbeli wu Mwami Nyasaye, uli Nyasaye weru, khuraanjila mumatukhu ka khwali nu khushili vavukha khutukha nunundi; khandi khwayambakhana khulonda malako ku Mwami Nyasaye, uli Nyasaye weru.”