YAKOBO 4 - IBIBILIA INDAKATIFU MU LUTIRICHI LWITAKHO NENDE LWISUKHA

Vulina ni Vindu viu mu Shivala

¹ Ni shina shichilanga liihe nu khurindilana khukholekhanga mu munyi nu khuvaho? Khurulanga khu likomba lienyu liu khuyaanzitsa vivelo vi mivili chienyu, likwananga shia khase khosi mu munyi.

² Mwikombanga khunyola vindu, navutswa lwa muvulanga khuvinyola, mwirechekhanga khali khwiira. Mwikombanga khuva ni vindu nu mwoyo kwosi; navutswa lwa muvulanga khuvinyola, murindilana numukwana. Muvula vindu via mwenyanga muve numuli navio, shichila shiumureevanga Nyasaye amuhe tawe.

³ Lwa mureevanga amuhe, shiumunyolanga tawe, shichila mureevanga munjila indamanu, khulu khwenya khurumishila khukhola ka yaanzitsanga likomba lienyu li mivili.

⁴ Munyi vandu vambakhana khuva vasuuvilwa! Munyala khuva mwakorwa ndi khukhola vulina ni vindu viu mu shivala, kamanyinyanga ndi muli vatsiku va Nyasaye? Khulwa yako, mundu wenyanga khulomba vulina ni vindu viu mu shivala, yikholanga mwene khuva mutsiku wa Nyasaye.

⁵ Mukhakanakani Mahandiko Matakatifu kavula vwatoto, lwa kavoolanga, “Roho wa Nyasaye yakhuha wayitsula likomba liu vululu.”

⁶ Navutswa tsimbavasi tsia Nyasaye akhuheetsanga tsili ni tsingulu tsinyishi. Nashio shivune shichilanga Mahandiko Matakatifu nikavoola, “Nyasaye wayambakhana vandu vilola, navutswa alolelanga tsimbavasi vandu vichehitsi.”

⁷ Khulwa yako, munyi vene mwihaane khu Nyasaye. Mwambakhane Ibilisi, neye aliitsa khumwilukha.

⁸ Mwisuundie khu Nyasaye, neye aliitsa khwisuunda khu munyi. Munyi vooni, mukololoshitsi limenya lienyu! Munyi va mwikhola kholitsanga khuva valunji, muve vanihu mu mioyo chienyu!

⁹ Muve nu vuveleli mu mioyo, mulili numwikhula. Nu vulahi nu mukalukhanyinyi khusekha khwenyu khuva khwikhula; vuyaanzi vwenyu khuva khutuunya!

¹⁰ Muve vichehitsi imbeli wu Mwami, naye aliitsa khumuha tsingulu.

Ukhakhalachila Wundi Tawe

¹¹ Vasuuvili vashianje, muvuli khulomoloma vindu vitamanu khulondokhana khu vandi. Mundu ulomolomanga vindu vitamanu khulondokhana khu wundi, inoho ukhalachilanga wundi, alomolomanga shindu shitamanu khulondokhana khu malako khandi akhalachilanga Malako. Navutswa niiva unyala khukhalachila Malako, shiunyala khukhola shia Malako kenyanga tawe; navutswa ukakhalachilanga.

¹² Nyasaye neye wonyene uhaananga malako khandi nu mukhalachi. Ye wonyene ali nu vunyali vu khuhonyinya khandi khutivitsa. Navutswa ukanakananga unyala khuva uli viina, lwa ukhalachilanga mureende wowo?

Khuleshe Khwichinjilila

¹³ Mbulishitsikhu, munyi vamuvoolanga, “Nunundi inoho mukamba khulatsia khuchenda mu litaala likali lindi, wa khuliitsa khumenya khumuhika mulala khandi khukholeleyo mihinzilu chieru nu khunyola vukhala.”

¹⁴ Khali shiumumanyikhu shindu shiosi khulondokhana khu katsitsanga khwikholekha mukamba tawe! Vulamu vwenyu ni shina? Muli vutswa khuli mwooshi mutititi, kutuumanga hatititi vutswa, makukora.

¹⁵ Nikhali, mwenyekhanga muvoole, “Niiva ni lienya liu Mwami, khulamenya makhukhole yaka inoho yako.”

¹⁶ Khuli kalolekhanga, munyi mwayilola khandi mwayichinjilila. Vwichinjilili khuli vwenovo nu vutamanu.

¹⁷ Khulwa yako, mundu wambakhananga khukhola shikholwa shilahi, shia yenyekhanga ave nakholanga, avetsanga nakholi vwoni.