VIKHOLWA 8 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Saulu yaliho, manasanga khu likhutsa lia Stefano. Khulitukhu lienelo, vandu vi likanisa lia Yerusalemi vatambitswa vululu muno. Khulwa yako, vasuuvili voosi vasalanyinywa shia havundu hosi mu tsisomo tsia Yudeya nende Samaria; navutswa varumwa vali nivashili khusalanyinywa.

Saulu Yatambitsa Likanisa

² Valala khu vandu vali vihaana nu mwoyo mulala khu Nyasaye vayeveela mu shilindwa mmbili kwa Stefano, nivalila tsikhwili tsiu khumwikhula.

³ Navutswa Saulu yachelitsa khutivitsa likanisa; yachenda chenda mu shia inzu yosi, khukumila vandu vasatsa nende vakhali nu khuvavoha mucheela.

Lilwatsa li Ivanjeli mu Samaria

⁴ Mumatukhu kenako, vandu vali nivasalanyinywa vilwatsa likhuva lienelo shia havundu hosi ha vatsitsanga.

⁵ Filipu yakholomokha natsia mu litaala lia Samaria, naraanga khwilwatsila vandu makhuva khulondokhana khu Kristo.

⁶ Vituma via vandu vahulishitsa nu mwoyo mulala milwatso ka Filipu yavoolanga, lwa valola viloleshitsu via yakhola.

⁷ Matimoni karula mu vandu vanyishi nikayulanga tsikhwili; khandi vandu vanyishi vali nivafwokoya nende yavo vali nivalema nivahona.

⁸ Khulwa yako, khwali nu vuyaanzi vunyishi mu litaala likali lienelo.

⁹ Mundu walaangwangwa Simoni yali mu litaala likali lienelo, navutswa matukhu kandi yakholanga vukhumu. Yachenyinya Vasamaria lwa yichinjilila, navoola ndi wayitsula tsingulu tsinyishi.

¹⁰ Vandu vanyishi, vakali khu vati vamusuuvila, nivavoola havulavu, “Mundu uyu ni tsingulu tsia Nyasaye tsilaangwangwa ‘Tsingulu Tsinyishi.’ ”

¹¹ Vamuhulishitsa shichila yali wavachenyinya khumatukhu manyishi nu vukhumu vwevwe.

¹² Navutswa vasuuvila Filipu, lwa yilwatsa Ivanjeli khulondokhana khu Vwami vwa Nyasaye, khandi khulondokhana khu lira lia Yesu Kristo, ma vandu vasatsa nende vakhali nivabatiswa.

¹³ Khali Simoni mwenoyo yasuuvila. Namali khubatiswa, yachenda na Filipu. Yali ni lichenya, lwa yalola vindu viu khuchenyinya nende viloleshitsu viakholwangwa.

¹⁴ Lwa varumwa vali nivali Yerusalemi vahulila ndi Vasamaria vamali khuhuchilila likhuva lia Nyasaye, varuma Petro nende Yohana khwitsa khuvo.

¹⁵ Lwa vatukhaho, va vasaalila vanyole Roho Mutakatifu,

¹⁶ shichila Roho Mutakatifu yali nashili khwitsakhu khu khali mulala khuvo. Vali vabatiswa vutswa khuvirila mu lira liu Mwami Yesu.

¹⁷ Nalwo lwa Petro nende Yohana vavikha khuvo makhono kavo; ma vandu venavo, nivanyola Roho Mutakatifu.

¹⁸ Lwa Simoni yalola ndi vandu venavo vanyoli Roho, lwa varumwa vavikha khuvo makhono kavo, yachelitsa khuha Petro nende Yohana tsisenti;

¹⁹ navoola, “Mbikhu khandi tsingulu yitsi, khu mundu wambikhakhu makhono kaanje anyole Roho Mutakatifu.”

²⁰ Navutswa Petro yamuvoolela, “Utivitswi ni tsisenti tsiotsio, shichila ukanakananga unyala khukuula ni tsisenti shihanwa shia Nyasaye!

²¹ Uvulakhu shitonye inoho lisanga mu muhinzilu kweru, shichila uli nu mwoyo mutamanu imbeli wa Nyasaye.

²² Khulwa yako, wikanile khurula mu vutamanu vwovwo vwenovo, usaale khu Mwami Nyasaye, akhusemehe tsinganakani tsili mu mwoyo kwokwo tsienetso.

²³ Ni kilikali, kali havulavu ndi wayitsula imbotokha, khandi vwoni vwa khukhola khuva murukwa.”

²⁴ Simoni yavoolela Petro nende Yohana, “Numuyaanza saalilikhu khu Mwami Nyasaye, khu vindu via muvooli vienevo vivuli khungwila.”

²⁵ Lwa Petro nende Yohana vavoola makhuva kavo khandi nivamali khwilwatsa likhuva liu Mwami, vakalukha Yerusalemi. Nivali khu luchendo lwavo, vilwatsa Ivanjeli mu michitsi minyishi chia Samaria.

Filipu Yabatisa Mulala khu Varumishi va Etsopia

²⁶ Injelosi yu Mwami Nyasaye yavoolela Filipu, “Rula utsi khuluveka luli ikuvanda khu muhaanda kurulanga Yerusalemi nu kutsia mu litaala lia Gaza.” Muhaanda kwenoko kuli mu shiangalangwi.

²⁷ Khulwa yako, Filipu yasimukha natsia. Nali khu muhaanda kwenoko, yakana nu Muetsopia, wali nali shitsili khandi mwimilili wi livishilu liu Muruchi wi shikhali wa Etsopia. Mundu mwenoyo yali watsia khusaala Yerusalemi;

²⁸ khandi yali nakalukhanga ingo wewe niyikhale khu likaale lielie nasomanga shitabu shiu Muprofeti Isaya.

²⁹ Roho Mutakatifu yavoolela Filipu, “Simukha utsi uchendele himbi khu likaare yelo.”

³⁰ Filipu yilukhaka natsia khu likaare lienelo. Yahulila mundu mwenoyo nasoma mu shitabu shiu Muprofeti Isaya. Filipu yamureeva, “Unyala khuva wamanya makhuva ka usomanga?”

³¹ Mundu mwenoyo yamuchipa, “Nyala khukamanya munjila shina, mundu nakhambolele shia kavoolanga?” Khulwa yako, mundu mwenoyo yalaanga Filipu khwitsa khwikhala naye.

³² Tsimbaso tsia Mahandiko Matakatifu ku mundu mwenoyo yali nasomanga tsiali, “Yali khuli likondi lihilwangwa khutsia khusinzwa, khuli shimeme shi likondi shihonjelu lwa shikhalakwa vwoya, livulakhuho likhuva lia yavoola.

³³ Vamuha tsisoni, vuchila khukholelwa katoto. Mundu avulakhuho uliitsa khuvoolakhu shindu shiosi khulondokhana khu vitsukhulu veve? Shichila warulitswa khulilova.”

³⁴ Mundu wali shitsili mwenoyo yareeva Filipu, “Nuyaanza, mbolela nu mundu shina wu muprofeti alomolomakhu? Alomolomanga khuye mwene inoho khulondokhana khu mundu wundi?”

³⁵ Khulwa yako, Filipu yaraanga khulomoloma; yaraanjila khu tsimbaso tsia Mahandiko Matakatifu, manamwilwatsila Ivanjeli khulondokhana khu Yesu.

³⁶ Lwa vali nivachendanga khu muhaanda, vatukha havundu ha matsi kali nikali. Mundu wali shitsili mwenoyo yavoolela Filipu, “Lola, matsi kali hanu! Shiakhachila mbuli khubatiswa na matsi ni shina?” [

³⁷ Filipu yamuvoolela, “Niiva unyala khusuuvila nu mwoyo kwosi, unyala khubatiswa.” Mundu wali shitsili mwenoyo yavoolela Filipu, “Ndi ni lisuuvila Yesu Kristo nu Mwana wa Nyasaye.” ]

³⁸ Khulwa yako, yahaana lilako likaare lienelo lisinjilitswi, ma voosi vavili, ye mwene nende Filipu nivinjila mu matsi; ma Filipu namubatisa.

³⁹ Lwa varula mu matsi, nonoho lwa Roho wu Mwami Nyasaye yarulitsa Filipu hawenaho. Mundu wali shitsili mwenoyo shiyalolakhu khandi Filipu tawe; navutswa yatsililila nu luchendo lwelwe nu vuyaanzi.

⁴⁰ Navutswa Filipu yanyolekha nali mu litaala lia Azota. Nali khu luchendo lwelwe, yilwatsa Ivanjeli mu mataala koosi khutukha lwa yatukha mu litaala lia Kaisaria.