VIKHOLWA 6 - IBIBILIA INDAKATIFU MU LUTIRICHI LWITAKHO NENDE LWISUKHA

Vandu Saba Varovolwa Khukhonya Varumwa

¹ Mumatukhu kenako, lwa veechi vameetekhanga mu vunyishi, valala khu Vayahudi valomolomanga Luguriki varaanga khulembana na Vayahudi valomolomanga Luheburania, shichila vakhutsakhali va Vayahudi valomolomanga Luguriki shivaheelwa shiukhulia shia vaheelwangwa khu shia litukhu tawe.

² Khulwa yako, varumwa likhomi na vavili venavo valaanga halala shituma shia vasuuvili voosi; nivavoola, “Nu vutamanu khu khutsi khulekha muhinzilu ku khwilwatsa likhuva lia Nyasaye, khutsia khukavula shiukhulia khu vandu.

³ Khulwa yako, vasuuvili vashieru, murovole khurula mu munyi vene vandu vasatsa saba vali ni lira lilahi, vitsula Roho Mutakatifu khandi vali nu vusitsa, va khutsitsanga khuha vunyali vu khukhola muhinzilu yuku.

⁴ Khutsi vene, khuliitsa khuvukula vwiyangu vweru khusaala nu khukhola muhinzilu ku khwilwatsa likhuva.”

⁵ Makhuva ka vavoola kayaanzitsa shituma shia vandu voosi. Varovola Stefano, mundu wali niyitsula lisuuvila, khandi wali niyitsula Roho Mutakatifu. Varovola khandi Filipu, Purokora, Nikanori, Timona, Parumenasi, nende Nikolasi wi litaala lia Antiokia, wali niyakholwa khulonda idini ya Vayahudi.

⁶ Shituma shia vandu vavahila khu varumwa. Varumwa vasaala nivavikha khuvo makhono kavo.

⁷ Likhuva lia Nyasaye liatsililila khulanda shia havundu hosi. Veechi vameetekha mu vunyishi mu Yerusalemi; khali vasalisi vanyishi nivahuchilila lisuuvila.

Stefano Yakumilwa

⁸ Nyasaye yali walolela tsimbavasi Stefano; khandi yali wamuha tsingulu tsinyishi tsiu khukhola viloleshitsu vinyishi nende vindu viu khuchenyinya mu vandu.

⁹ Navutswa valala khu vandu vi lisinagogi lia Vandu Vavoholole (khuli valaangwangwa) vahinganyinya Stefano. Valala khu vandu venavo vali Vayahudi khurula mu mataala ka Kurene nende Alekisandaria, khandi yavo varulanga mu tsisomo tsia Kilikia nende Asia. Vandu venavo varaanga khuhangalitsa Stefano mulilomoloma.

¹⁰ Navutswa vakhaywa khukuura Stefano; shichila Stefano yali nu vusitsa khandi Roho ya mwimililanga mulilomoloma.

¹¹ Khulwa yako, vahaana asoya khu vandu valala vavoole, “Khumuhulile nalomolomanga manyeko khulondokhana khu Musa khandi khu Nyasaye!”

¹² Vavwanyinya mulilu mu vandu nende vasakhulu, halala na veechitsi va Malako. Vakumila Stefano nivamuhila imbeli wi Shikhaalo.

¹³ Valeramu vashiahidi vu vuvehi nivavoola, “Shia khase khosi mundu uyu wamenya nalomolomanga manyeko khulondokhana khu Litempeli lieru litakatifu khandi khu Malako ka Musa.

¹⁴ Khumuhulile navoolanga ndi Yesu wa Nazareti uyu, aliitsa khupomolanyinya Litempeli nu khukalukhanyinya miima chia khwechitswa khurula khu Musa.”

¹⁵ Vandu vi Shikhqalo voosi varaangalala tsimoni tsiavo khu Stefano, nivalola yang'ang'anga mumoni mwemwe khuli injelosi.