VIKHOLWA 16 - IBIBILIA INDAKATIFU MU LUTIRICHI LWITAKHO NENDE LWISUKHA

Timoteo Yatsia na Paulu nende Sila

¹ Paulu yatsililila nu luchendo lwelwe natukha mu mataala ka Deribe nende Lusitura, ha Mukristayo walaangwangwa Timoteo yali niyamenya. Mama wa Timoteo yali musuuvili khandi Muyahudi; navutswa tata wewe yali Muguriki.

² Vasuuvili voosi mu mataala ka Lusitura nende Ikoniamu valomolomanga vulahi khu Timoteo.

³ Paulu yenya khuvukula Timoteo khutsia naye. Yamuvukula nahaana lilako ashevwi, shichila Vayahudi voosi mu mataala kenako vali vamanya ndi tata wa Timoteo yali Muguriki.

⁴ Lwa vachenda chenda mu shia litaala, vavoolela vasuuvili makhuva ka varumwa nende vasakhulu vakanila halala mu Yerusalemi vali nivaviritsi.

⁵ Khulwa yako, vandu va makanisa vatinyilitswa mu lisuuvila; khandi shia litukhu vatsililila khumeetekha mu vunyishi.

Malolo ka Paulu mu Litaala lia Turoha

⁶ Paulu nende veshie vachenda nivakhalakanyila mu mataala ka Firigia nende Galatia, shichila Roho Mutakatifu yavikalila khwilwatsakhu likhuva liosi mu lusomo lwa Asia.

⁷ Lwa vali nivakhatukha khuluveka lundi lwi litaala lia Misia, vachelitsa khwinjila mu lusomo lwa Bitsinia; navutswa Roho wa Yesu yavikalila khwinjilamu.

⁸ Khulwa yako, vachenda nivavira mu litaala lia Misia, nivakholomokha khutsia khutukha mu litaala lia Turoha.

⁹ Mu vutukhu vwenovo, Paulu yalola malolo ndi mundu wa Mekadonia wusinjile namusayanga nayaanza, “Hamba Mekadonia ukhukhonye!”

¹⁰ Lwa Paulu yalola malolo kenako, khwachelitsa khwambukha vwangu khutsia Mekadonia, shichila khwali ni lisuuvilitsa ndi Nyasaye wakhulaanga khwilwatse Ivanjeli khu vandu vamenyayo.

Likalukhanyinywa lia Lidia mu Filipi

¹¹ Khwambushila mu imeli nu khurula mu litaala lia Turoha nu khutsia vulunji khutukha mu litaala lia Samoturake; khandi khulitukhu lialondakhu nu khutsia mu litaala lia Nehapoli.

¹² Khwarulaho nu khutsia mukari nu khutukha Filipi, litaala likali liu khuraanga mu Mekadonia; lia Varoma vamihanga khandi. Khwikhalayo khumatukhu manyishi.

¹³ Khwarula mu litaala lienelo khulitukhu li Lisabato, nu khukholomokha khutsia himbi khu muchela, wa khwasuuvilanga khunyala khunyola havundu ha Vayahudi vasaalilanga. Khwikhala nu khulomoloma khu vakhali vali nivivunjelitsiho.

¹⁴ Mulala khuvo khurula mu litaala lia Tsiatira, walaangwangwa Lidia wasaalanga khu Nyasaye yakhuhulishitsa. Yakuulitsanga tsinguvu tsia sambarau. Mwami yikula mwoyo kwekwe nahulishitsa milwatso ka Paulu.

¹⁵ Lwa ye mwene nende vandu vi inzu yeye vabatiswa, ya khwinjilitsa hango hehe; navoola, “Numulolanga ni kilikali ndi mundu wasuuvila mu Mwami, hambi mumenyekhu hango hanje.” Yakhuvoolela nu khuyaanza khwinjiliho.

Paulu nende Sila Vavohwa Mucheela mu Filipi

¹⁶ Litukhu lindi, lwa khwali nu khutsitsanga havundu ha khusaalila, khwakana nu mwana wi shikhana murukwa wali ni tsingulu tsia makhumu; khandi yalerelanga varuchi veve tsisenti tsinyishi khurulana khu muhinzilu ku khuvoola makhuva kaliitsa khwikholekha.

¹⁷ Mwana wi shikhana mwenoyo yalonda Paulu nende khutsi, nalaanjilila navoola, “Vandu yava ni varumishi va Nyasaye Uli Ikulu khu Viosi! Vamwilwatsilanga makhuva khulondokhana khuli muliitsa khuhonyinywa!”

¹⁸ Mwana wi shikhana mwenoyo yatsililila khukhola ndio khumatukhu manyishi. Navutswa lukhumalilikha, Paulu yaleka mu mwoyo, niyishevukha nakondeshela litimoni lienelo, navoola, “Khukondeshelanga khuvirila mu lira lia Yesu Kristo, rula muye.” Litimoni lienelo liarula mu mwana wi shikhana mwenoyo isaa yeneyo.

¹⁹ Navutswa lwa varuchi veve valola ndi vwiyangu vu khunyola tsisenti vumali khuvwa, vakumila Paulu nende Sila. Vavakhwesa nivavahila musokoni imbeli wa vimilili vali nivaliyo.

²⁰ Lwa vavahila khu vakhalachi, vavoola, “Vandu yava ni Vayahudi khandi valeranga vutundanu vwi shileeche mu litaala likali lieru.

²¹ Vechitsanga miima chia malako keru, ka khutsi Varoma khulolanga nu vutamanu nu khuhuchilile inoho khulonda.”

²² Shituma shia vandu voosi viyunga navo, lwa vinjilila Paulu nende Sila. Vakhalachi vahaana lilako liu khunavulwa tsunguvu nu khushutwa vivoko.

²³ Lwa vali nivakhashutwa vululu, vahilwa mucheela; ma musikali wu mucheela navoolelwa avalinde vulahi.

²⁴ Lwa musikali wu mucheela yanyola mivaalo kenako, yavahila mukari mwene mucheela, manavoha vilenje viavo hakari mu tsifulemu tsi misala tsinditoho.

²⁵ Navutswa himbi mu vutukhu hakari, lwa Paulu nende Sila vali nivasaalanga nivimba tsinyimbo tsiu khwitsominya Nyasaye; vavohe vandi va vahulishitsanga.

²⁶ Nonoho lwa shivala shiatechela, ma icheela nitechela misinji chiayo. Miliango chicheela chiosi chikukha, ma minyololo nichikwa hasi khurula khu vavohe voosi vwangu.

²⁷ Musikali wu mucheela yavukha; khandi lwa yanyola miliango chicheela chiosi nichikukhi, yakanakana ndi vavohe vamali khwilukha. Khulwa yako, yasomola shivavi shieshie nachelitsa mwene khwenya khwiyiira.

²⁸ Navutswa Paulu yalaanjilila nu mwoyo mukali navoola, “Lekha mwene khwisalilitsa! Voosi khuli hanu!”

²⁹ Musikali wu mucheela yalaanga vamulerele itaaha, niyinjilamu vwangu. Yakwa ha vilenje via Paulu nende Sila natechelanga.

³⁰ Yavahila ilwanyi navareeva, “Vandu munyi, shina shianyala khukhola khumbonyinywi?”

³¹ Paulu nende Sila vamuchipa, “Yivi nende vandu vi inzu yoyo, musuuvile mu Mwami Yesu, muhonyinywi.”

³² Paulu nende Sila vilwatsila musikali mwenoyo likhuva liu Mwami, khali khu vandu vandi voosi vali nivamenya munzu mwemwe.

³³ Musikali mwenoyo yavavukula mu tsisaa tsiu vutukhu tsienetso, manavochitsa makuule kavo. Ye mwene nende vandu vandi voosi vali nivamenya munzu mwemwe vabatiswa vwangu.

³⁴ Musikali wu mucheela mwenoyo yavahila munzu mwemwe, navaha shiukhulia. Ye mwene nende vandu vi inzu yeye voosi vali nu vuyaanzi, shichila yali umali khusuuvila mu Nyasaye.

³⁵ Litukhu lialondakhu mu mavwevwe, vakhalachi varuma vasikali, nivavoola, “Vohololi vandu yavo.”

³⁶ Khulwa yako, musikali wu mucheela yavoolela Paulu, “Vakhalachi vakhurumi khwitsa khumuvoholola khurula mucheela. Munyala khurula mutsi mu milembe.”

³⁷ Navutswa Paulu yavoolela vasikali venavo, “Vakhushuta havulavu mu vandu vuchila khukhukhalachila, khali niiva khuli Varoma, khandi nivakhuvoha mucheela. Venyanga khukhulakhula muvwivisi? Shikanyala khwikholekha kario tawe! Leshi vene vakhuhile ilwanyi.”

³⁸ Vasikali vavoolela vakhalachi makhuva kenako. Varia, lwa vahulila ndi Paulu nende Sila ni Varoma.

³⁹ Khulwa yako, vasimukha nivatsia khuvareeva vusemehwi. Vavarulitsa mucheela, ni vavavoolela varuli mu litaala likali.

⁴⁰ Lwa Paulu nende Sila varula mucheela, vatsia hango ha Lidia. Vakanayo na vasuuvili valala, nivavatinyilitsa. Vasimukha nivarulaho.