VIKHOLWA 15 - IBIBILIA INDAKATIFU MU LUTIRICHI LWITAKHO NENDE LWISUKHA

Shikhaalo mu Yerusalemi

¹ Navutswa vandu valala varula mu lusomo lwa Yudeya nivaraanga khwechitsa vasuuvili, “Numushili khushevwa khulondokhana khuli Malako ka Musa kavoolanga, shiumunyala khuhonyinywa tawe.”

² Paulu nende Baranaba varaanga khuhangalitsana mulilomoloma, nivareevana mareevo shichila kenako. Khulwa yako, Paulu nende Baranaba, halala na vasuuvili valala varovolwa khutsia Yerusalemi khulola varumwa nende vasakhulu khulondokhana khu lireevo lienelo.

³ Likanisa nalio lia varuma khutsia. Lwa vakhalakanyila mu mataala ka Foenike nende Samaria, vavoolela vandu makhuva khulondokhana khuli vandu vi tsimbia tsindi vakalukhanyanyinywa nivasuuvila mu Nyasaye. Makhuva kenako kachila vasuuvili voosi nivava nu vuyaanzi.

⁴ Lwa vatukha Yerusalemi, likanisa, varumwa nende vasakhulu vavinjilitsa; nivavavoolela koosi ka Nyasaye yali navakholele.

⁵ Navutswa valala khu vasuuvili vu mukaanda kwa Vafarisayo vasinjila nivavoola, “Khutukha vandu vi tsimbia tsindi vashevwi, nu khwechitswa khuli vanyala khulonda Malako ka Musa.”

⁶ Varumwa nende vasakhulu vakana halala khureevana lireevo lienelo.

⁷ Nivamali khulomoloma khuluhono khulondokhana khu likhuva lienelo, Petro yasinjila navavoolela, “Vasuuvili vashianje, mwamanya ndi mumatukhu kakhale Nyasaye yandovola khurula mu munyi khwilwatsa Ivanjeli khu vandu vi tsimbia tsindi, khu vahulile nu khusuuvila.

⁸ Nyasaye, wamanya kali mu mwoyo ku mundu, neye umali khuvahuchilila, lwa yavaha Roho Mutakatifu, khuli lwa ya khuha khutsi.

⁹ Shikali yalera vwavukhani hakari heru nende vo tawe. Yavatakasa mu mioyo chiavo khuvirila mu lisuuvila.

¹⁰ Khulwa yako, shichila shina mwenyanga khuchelitsa Nyasaye, lwa mutiukhanga vasuuvili misiko militoho khu mikongo chiavo, chia vakuuka veru, inoho khali khutsi vene shiukhwali khwanyala khuchinga tawe?

¹¹ Khali ndio, khuli ni lisuuvila ndi khuliitsa khuhonyinywa khuvirila mu tsimbavasi tsiu Mwami Yesu, khuli vo khandi valiitsa khuhonyinywa.”

¹² Vandu vi shikhaalo voosi vahonjela, lwa vahulishitsa Baranaba nende Paulu nivavoolanga makhuva khulondokhana khu viloleshitsu nende vindu viu khuchenyinya, via Nyasaye yakhola mu vandu vi tsimbia tsindi khuvirila khuvo.

¹³ Lwa vali nivamali khulomoloma, Yakobo yavoola, “Vasuuvili vashianje, mumbulishitsi!

¹⁴ Simoni umali khuvoola vulahi vwene makhuva khulondokhana khuli Nyasaye yamanyinya lukhuraanga wayaanza vandu vi tsimbia tsindi, lwa yarovola khurula muvo vandu veve mwene.

¹⁵ Makhuva ka vaprofeti valomoloma katsianakananga nako; khuli Mahandiko Matakatifu kavoolanga,

¹⁶ ‘Mwami Nyasaye avoolanga, Niitsa khukalukha yaka nikamali khuvira, khandi niitsa khumbakha vuyia inzu ya Daudi yali niyakwa. Niitsa khuchiumbakha vuyia khuraanjila ha yapomolwa khuchilomba khusinjila.

¹⁷ Vandu vandi voosi mu shivala valiitsa khukhava inzi Mwami Nyasaye, vandu vi tsimbia tsindi voosi va mwene nalaanga khuva vaanje.

¹⁸ Nindio inzi Mwami Nyasaye mbolanga, wachila likhuva yili nilimanyikhana khurula khale.’ ”

¹⁹ Khulwa yako, Yakobo yatsilila navoola, “Khulwanje, ndolanga nu vutamanu khunyashitsa vandu vi tsimbia tsindi vasuuvilanga mu Nyasaye.

²⁰ Navutswa khutukha khuhandichi ibarwa yu khuvavoolela vavuli khulia shiukhulia shioneshe, nishimali khuhaanwa khu misambwa. Valeshe khuheeya; khandi valeshe khulia inyuma yu muruku kumali khwisunga inoho khung'wa masahi koosi.

²¹ Malako ka Musa kasomwangwa mu masinagogi shia litukhu li Lisabato khumihika minyishi, khandi makhuva keke ka yilwatswa mu shia litaala.”

Ibarwa khu Vasuuvili vi Tsimbia Tsindi

²² Nalwo lwa varumwa nende vasakhulu, halala na vandu vi likanisa liosi, vaviritsa varovole vandu valala khurula muvo vene. Vavaruma na Paulu nende Baranaba khutsia mu litaala lia Antiokia. Varovola Yuda (wali ni lira lindi Barasaba) nende Sila, nivali vandu vavili vimililanga vasuuvili.

²³ Varulaho ni ibarwa iyi, “Khutsi, varumwa nende vasakhulu, vasuuvili veshie, khuhaananga milembe khu vasuuvili vashieru vivulwa mu vandu vi tsimbia tsindi vamuli Antiokia, mu shivala shia Siria, nende Kilikia.

²⁴ Khuvoolelwi likhuva ndi vandu valala khurula mu shituma shieru vamuvoolele makhuva ku khumanyishitsa nu khukoyanyinya tsinganakani tsienyu, khali niiva vavula mivaalo koosi ka vali nako khurula khu khutsi.

²⁵ Khulwa yako, khuviritsi khularovola vandu valala vakhuruma khu munyi, halala na valina veru va khwayaanza Paulu nende Baranaba --

²⁶ nivali vandu virulitsa khali khukhutsa shichila lira liu Mwami Yesu Kristo.

²⁷ Khulwa yako, khumurumilanga Yuda nende Sila. Vene valiitsa khumuvoolela makhuva malala mele.

²⁸ Roho Mutakatifu, halala na khutsi vene khuhuchilitsane khuleshe khumutiukha musiko kundi kwosi mulitoho khuvira makhuva ku vukhonyi ka khwenyanga mulonde yaka,

²⁹ Muleshe khulia shiukhulia shihaanilwi khu misambwa; muleshe khung'wakhu masahi koosi; muleshe khulia inyama yosi yu muruku kumali khwisunga; khandi muleshe khuheeya. Niiva muliitsa khulekhana ni vindu yivi, muliitsa khuva numukholi vulahi. Khumwenyelanga malahi.”

³⁰ Varumwa venavo vaseevulwa khurulaho, nivakholomokha khutsia mu litaala lia Antiokia. Lwa valaanga halala shituma shiosi shia vasuuvili, vavaha ibarwa yeneyo.

³¹ Lwa vandu vasoma ibarwa yeneyo, vali nu vuyaanzi vunyishi shichila ya vatinyilitsa.

³² Yuda nende Sila, shichila vali vaprofeti vivaalila vasuuvili makhuva manyishi ku khuvatinyilitsa.

³³ Lwa Paulu nende Sila vali nivakhamenyayo khumatukhu mati, vaseevulwa khutsia mu milembe, navutswa vasuuvili khukalukha khu yavo vali nivavarumi. [

³⁴ Navutswa Sila yalola nu vulahi khurikalayo.]

³⁵ Navutswa Paulu nende Baranaba varikala mu litaala lia Antiokia, wa vo vene nende vandi vanyishi veechitsa, khandi nivilwatsa likhuva liu Mwami.

Paulu nende Baranaba Vavukhana

³⁶ Matukhu mati nikakhavira, Paulu yavoolela Baranaba, “Chenda khukalushi khulola vasuuvili vashieru mu shia litaali lia khwilwatsamu likhuva liu Mwami; khandi khulole khuli vatsilililanga mu limenya liavo.”

³⁷ Baranaba yenya vatsi na Yohana wi lira lindi Mariko;

³⁸ navutswa Paulu yalola ndi nu vutamanu khutsia naye, shichila yilukha nivali mu litaala lia Pamufilia; khandi navula khuvakhonya khukhola muhinzilu kwa vakholanga.

³⁹ Vahingalitsana vululu mulilomoloma, khali nivavukhana. Baranaba yavukula Mariko manivambukha khutsia Saipurasi;

⁴⁰ navutswa Paulu yarovola Sila, nivarulaho, khali vasuuvili nivamusaalila anyole tsimbavasi tsiu Mwami.

⁴¹ Nali khu luchendo lwelwe, yakhalakanyila Siria nende Kilikia, natinyilitsanga makanisa.