VAROMA 2 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Nyasaye Aliitsa Khukhalachila Vandu Voosi

¹ Mulina wanje, shindu shivulakhuho shiuliitsa khuvoola khulu khwishinga, lwa ukhalachilanga wundi; shichila lwa ukhalachilanga wundi, kalolekhanga ndi yivi mwene wikhalachilanga, khuvela ndi lwa uli mukhalachi yivi mwene wu kholanga vindu vilala viele, via ye akholanga.

² Khumanyi ndi Nyasaye neye wi likhola liu vulunji, lwa akhalachilanga vandu vakholanga vindu khuli vienevo.

³ Lwa yivi mulina, ukhalachilanga yavo vakholanga vindu khuli vienevo, khandi yivi mwene khuvikhola, ukanakananga Nyasaye aliitsa khuvula khukhukhalachila?

⁴ Inoho haundi uchayanga vulahi vwevwe vunyishi, vwihotselitsi vwevwe nende vwikhutsili vwevwe. Kanyala khuva ushili khumanyikhu ndi vulahi vwa Nyasaye, vunyala khuchila wikanile?

⁵ Navutswa shichila uli ninjinia khandi uli muhaaka, nivi mwene wilerelanga lisalilitswa khulitukhu lia Nyasaye, aliitsa khumanyinya vurima vwevwe nu khukhalachila vandu khulondokhana khu likhola liu vulunji.

⁶ Nyasaye aliitsa khurunga shia mundu wosi, khulondokhana khu vikholwa vievie mwene.

⁷ Vandu vachelitsanga khukhola malahi khuvirila mu vwikhutsili, nivakhava khuheelwa vukhumi, luyali, khandi khuvula khukhutsa, navo va Nyasaye aliitsa khuha vulamu vwi mihika ni mihika.

⁸ Navutswa yavo vali vimani, vambakhananga khulonda katoto, navutswa vayaanzilila khukhola vutamanu, navo va Nyasaye aliitsa khulolela vurima nu khuvasalilitsa.

⁹ Linyakhana nende isalila, viliitsa khukwila shia mundu wosi wu kholanga vindu vitamanu; Vayahudi navo valiitsa khuraanga, vandu vi tsimbia tsindi navo valiitsa khulondakhu.

¹⁰ Navutswa Nyasaye aliitsa khuha shia mundu wosi wu kholanga malahi vukhumi, luyali nende milembe; Vayahudi navo valiitsa khuraanga, vandu vi tsimbia tsindi navo valiitsa khulondakhu.

¹¹ Nyasaye shiyihonelanga vandu tawe.

¹² Vandu voosi vakholanga vwoni, shichila vavula malako, valiitsa khukhutsa shichila vavula malako; khandi yavo voosi vakholanga vwoni, shichila vali na malako, valiitsa khukhalachilwa na malako.

¹³ Shikali vandu vahulishitsanga malako navo valunji imbeli wa Nyasaye tawe; navutswa vandu vakholanga ka Malako kenyanga, navo valiitsa khukholwa khuva valunji.

¹⁴ Vandu vi tsimbia tsindi, shivali na malako tawe. Navutswa lwa vakholanga khulondokhana khu tsinganakani tsiavo, ka malako kenyanga, kalolekhanga khuli vali na malako kavo vene, khali niiva vavula malako.

¹⁵ Miima chiavo chia vakholanga chimanyinyanga ndi ka malako kenyanga nako kali mu mioyo chiavo. Khali tsinganakani tsiavo tsiu mukari tsihaananga vushiahidi, lwa tsinganakani tsiavo tsivayaalanga tsisaa tsindala, khandi tsivakalushila khuvashinga tsisaa tsindi.

¹⁶ Khulwa yako, nindio khandi kaliitsa khwikholekha khulitukhu lienelo, lwa Nyasaye aliitsa khukhalachila makhuva kaviswa ka vandu vakholanga khuvirila khu Yesu Kristo, khulondokhana khu Ivanjeli ya nzilwatsanga.

Ka Malako Kavoolanga khu Vayahudi

¹⁷ Navutswa niiva yivi mwene wilaanganga Muyahudi, mundu wasuuvilila mu malako, khandi wichinjililanga shichila vuhambani vuli navwo mu Nyasaye;

¹⁸ khandi wamanya lienya lia Nyasaye; khandi wayaanzilila likhola lilahi, shichila wayechitswa malako;

¹⁹ uli ni lisuuvila ndi uli mwimilili wa vavekhu, khandi khuli vulavu khu vandu vamenyanga mu shisuundi,

²⁰ uchelihitsanga vandu vayiingwa; khandi wechitsa vandu vakorwa shia vakhola; lwa vucheli vwosi nende katoto kanyolekhanga mu malako.

²¹ Khulwa yako, yivi wechitsanga vandi, shiunyala khwiyechitsa mwene tawe? Lwa wechitsanga vandi vavuli khuhuuva, ni kilikali unyala khuva uhuuvanga?

²² Yivi uvoolelanga vandu vavuli khukhola vuheeyi, ni kilikali unyala khuva shiukholanga vuheeyi tawe? Yivi ukayanga vandi vavuli khusaala khu misambwa, unyala khuva shiuhuuvanga mu matempeli tawe?

²³ Yivi mundu wichinjililanga wamanya malako ka Nyasaye, shiuheetsanga Nyasaye tsisoni, lwa umenekanga malako keke?

²⁴ Mahandiko Matakatifu kavoolanga, “Vandu vi tsimbia tsindi vanyekanga Nyasaye, shichila munyi Vayahudi.”

²⁵ Ni kilikali, shishevo shili nu vukhala muno, niiva mulondanga malako; navutswa niiva mumenekanga malako, vwakhavele vulahi niiva muliitsa khuvula khushevwa.

²⁶ Niiva mundu ushili khushevwa, akholanga shia shindu shiosi khulondokhana khu malako, ni kilikali Nyasaye aliitsa khumuvukula khuli mundu washevwa.

²⁷ Vandu vashili khushevwa, navutswa valondanga Malako valiitsa khukhukhalachila yivi Muyahudi uli na malako kahandikwa khandi washevwa, navutswa ukamenekanga.

²⁸ Khali ndio, mundu shianyala khuva Muyahudi watoto, nashili khushevwa tawe? Khali shishevo shiatoto, shikali ni shikholwa shiu khu mu mmbili shionyene tawe.

²⁹ Navutswa Muyahudi watoto, nu Muyahudi mukari mu mwoyo, nakhwo khuvoola, washevwa mu mwoyo. Yuku nakwo muhinzilu kwa Roho wa Nyasaye, shiukuli nu kwa Malako kahandikwa tawe. Mundu khuli mwenoyo shianyolanga litsominywa khurula khu vandu tawe; navutswa khurula khu Nyasaye.