VAROMA 16 - IBIBILIA INDAKATIFU MU LUTIRICHI LWITAKHO NENDE LWISUKHA

Milembe chia Paulu

¹ Mbikhanga mu makhono kenyu mwana wi shikhana weru Fwebe, uli murumishi wi likanisa lia Kengureha.

² Mumwinjilitsi khuvirila mu lira liu Mwami, khuli vandu va Nyasaye vakholanga. Mumukhonye shia shindu shiosi shia yenyanga mumuhe; shichila wakhonya vandu vanyishi, khali inzi mwene nanyolakhu vukhonyi khurula khuye.

³ Mbananga milembe chianje khu Prisila nende Akwila, nivali vahinzili vashianje mu muhinzilu kwa Yesu Kristo.

⁴ Vihonolokha khukhutsa shichila inzi. Shikali ninzi wonyene wenyanga khuvasanditsa tawe; navutswa khali makanisa koosi ka vandu vi tsimbia tsindi nako ka vasanditsanga.

⁵ Mbananga milembe khu likanisa livukanilanga mu inzu yavo. Muhaane milembe khu mulina wanje wa nayaanza Epaheneta, wali wukhuraanga mu lusomo lwa Asia khusuuvila mu Kristo.

⁶ Muhaane milembe khu Mariya, wakhola muhinzilu kwekwe ni tsingulu shichila munyi.

⁷ Muhaane milembe khandi khu Andulonika nende Yunia, nivali Vayahudi vashianje va khwavohwa navo mucheela. Ni vandu vamanyikhana muno mu varumwa; khandi navo vali vu khuraanga khuva Vakristayo inzi nishili.

⁸ Muhaane milembe chianje khu Ampiliata, mulina wanje wa nayaanza mu Mwami.

⁹ Muhaane milembe khandi khu Uribanu, uli murumishi washianje mu muhinzilu kwa Kristo; khandi khu Sitaku, uli mulina wanje wa nayaanza.

¹⁰ Muhaane milembe khu Apele, uli musuuvilwa wayaanza Kristo. Muhaane milembe chianje khu vandu voosi varulanga mu inzu ya Arisitobula.

¹¹ Muhaane milembe khu Herodioni, uli Muyahudi washianje; khandi khu Vakristayo vali mu inzu ya Narikisu.

¹² Muhaane milembe chianje khu Turufena nende Turufosa, vakholanga muhinzilu ku Mwami; khandi khu mulina wanje wa nayaanza Perisi, wakhola ni tsingulu tsiosi muhinzilu ku Mwami.

¹³ Muhaane milembe chianje khu Rufu, wamanyikhana akholanga ni tsingulu muhinzilu ku Mwami; khandi khu mama wewe, umbukulanga shia khase khosi khuli mwana wewe.

¹⁴ Muhaane milembe chianje khu Asinikurita, Fulekoni, Herime, Paturoba, Herima, nende vasuuvili vandi vamenyanga navo.

¹⁵ Muhaane milembe khu Filoloku, Yulia, Nireha nende mbotso wewe, khandi khu Olimpa khandi khu vandu va Nyasaye voosi vamenyanga navo.

¹⁶ Muheelelane vene khuvene milembe chi shimanyilu shiu vuyaanzi. Makanisa koosi ka Kristo kamuheele milembe.

Mivaalo Kukhumalilikha

¹⁷ Vasuuvili vashianje, musayanga numuyaanza: Muheenze mumanye vandu valeranga liavukhana khandi vakoyanyinya lisuuvila lia vandu khwambakhana khulonda mechitso ka mwechitswa. Muve ihale wene khurula khuvo!

¹⁸ Vandu vakholanga vindu khuli vienevo, shikali varumishilanga Mwami weru Kristo tawe; navutswa likomba li mivili chiavo vene. Valomolomanga vulahi nivakaatilitsa vandu vavula vutamanu vwosi.

¹⁹ Shia mundu wosi wahulila makhuva khulondokhana khuli muli vasuuvilwa khu Ivanjeli; khandi shichila shivune shienesho ndi nu vuyaanzi vunyishi shichila munyi. Navutswa nyenyanga muve nu vusitsa khu kali malahi, khandi muvuli khuva nu vutamanu mu vindu vitamanu. [

²⁰ Nyasaye, uli shirula shieru shi milembe, aliitsa khumukhonya khukuura Shetani. Timbavasi tsiu Mwami weru Yesu tsive na munyi voosi.]

²¹ Muhinzili washianje Timoteo, umuheele milembe chiechie; khali Lukia, Yasoni, nende Sosipateri, nivali Vayahudi vashianje, vamuheele milembe.

²² Inzi Teritia, uli muhandichi wahandika ibarwa iyi, muheele milembe chianje khuvirila mu Mwami.

²³ Mundu wa nzinjilitsa ulaangwangwa Gayo, wi likanisa livukanilanga munzu mwemwe umuheele milembe chiechie. Erasito, mundu uvikhanga tsisenti mu litaala likali, halala nu musuuvili washieru Kwarita, vamuheele mulembe chiavo. [

²⁴ Tsimbavasi tsiu Mwami weru Yesu Kristo tsive na munyi voosi].

Lisaala Liukhumalilikha liu Khwitsominya

²⁵ Chendi khuhaane vukhumi khu Nyasaye! Ali nu vunyali vu khumulomba khuva ni tsingulu mu lisuuvila lienyu, shichila Ivanjeli ya nzilwatsanga khulondokhana khu Yesu Kristo; khandi khuli khwamanyinywa katoto kali nikaviswa mumatukhu kavira.

²⁶ Navutswa nunundi, katoto kenako kalerwa havulavu khuvirila mu mahandiko ka vaprofeti; khandi khuvirila mu lilako lia Nyasaye wi mihika ni mihika kamanyikhane khu vandu vi tsimbia tsiosi mu shivala, khu voosi valisuuvila khandi valikalonda.

²⁷ Nyasaye, uli nu vusitsa vwosi, aheelwi vukhumi khuvirila mu Yesu Kristo mihika ni mihika. Amina.