VAKHALACHI 9 - IBIBILIA INDAKATIFU MU LUTIRICHI LWITAKHO NENDE LWISUKHA

Abimeleki

¹ Mwana wa Gidioni walaangwangwa Abimeleki yasimukha natsia mu litaala lia Shekemu, wa viikho va mama wewe voosi vamenyanga, navavoolela

² vareeve vandu vi litaala lia Shekemu, “Ni shina shia mwenyanga? Khwimililwa na vaana vi shiyayi makhomi saba va Gidioni inoho nu mundu mulala vutswa? Mwitsushitse khumanya ndi inzi ndi mundu wivulwa khurula mu munyi.”

³ Viikho va mama wewe valomoloma khu vandu vi litaala lia Shekemu makhuva kenako mu vwiyangu vwevwe. Vandu vi litaala lia Shekemu valonda Abimeleki, shichila yali mwiikho wavo.

⁴ Vamuha vitonye makhomi saba vi ifetsa khurula mu litempeli lia Baali wi lilakano. Yarumishila tsisenti tsietsie khusamulitsa shituma shia vandu vatamanu khwiyunga naye.

⁵ Yasimukha natsia mu inzu ya tata wewe mu litaala lia Ofura, niyiirila ikulu wi lichina lilala vamwavo veve makhomi saba, vaana va Gidioni yali niyivula. Navutswa mwana wa Gidioni mushie walaangwangwa Yotsamu yivisa nalekhwa khwiirwa.

⁶ Nalwo lwa vandu va Shekemu voosi nende va Betsi-milo vakanila halala manivasimukha khutsia ha musala mukali ku museno kuli mu litaala lia Shekemu, ha vamihitsa Abimeleki khuva mwami.

⁷ Lwa Yotsamu yavoolelwa makhuva kali nikakholeshe, yanina khu Shikulu shia Gerizimu nalaanjilila shichila vo, navoola, “Munyi vandu vi litaala lia Shekemu, mumbulishitsi, nikanyalikha Nyasaye amuhulishitsi!

⁸ Litukhu lindi, misala chiavukanila halala, khwenya khurovola musala kunyala khuchiamiha. Vavoolela musala ku musayituni, ‘Khwamihi.’

⁹ Musala ku musayituni kwa vavoolela, ‘Ndekhane nu khuhaana makura kaanje, karumikhanga khuhaana vukhumi khu vanyasaye nende vandu, khu mwamihi.’

¹⁰ Nalwo lwa misala chiavoolela musala ku mukhuyu, ‘Hamba ukhwamihi.’

¹¹ Navutswa musala ku mukhuyu kwavoola, ‘Ndekhane nu khuhaana matunda kaanje manuulu, khu mwamihi.’

¹² Misala chiavoolela musala ku musabibu, ‘Hamba ukhwamihi.’

¹³ Navutswa musala ku musabibu kwavoola, ‘Ndekhane nu khurulitsa idivai yanje, ilombanga vanyasaye nende vandu khuva nu vuyaanzi, khu mwamihi.’

¹⁴ Nalwo lwa misala chiosi chiavoolela musala kwa mavwa, ‘Hamba ukhwamihi.’

¹⁵ Musala kwa mavwa kwavoola, ‘Niiva mwenyanga khunzamihitsa khuva mwami wenyu, hambi mwikame mu tsisia tsianje; navutswa niiva mulambakhana khukhola ndio, leshi mulilu kuruli mu tsisia tsia mavwa kusambe misala chia ceda chili mu shivala shia Lebanoni!’ ”

¹⁶ Yotsamu yatsililila khuvoola, “Khulwa yako, mwali vatoto khandi valahi lwa mwamihitsa Abimeleki khuva mwami? Mwasanditsakhu ka Gidioni yakhola khandi numukholela vandu vi inzu yeye malahi, khulondokhana khu vikholwa vievie vilahi?

¹⁷ Khutukha mumanye ndi tata wanje yamukwanila. Yirulitsa khukhutsa khumuhonyinya khurula khu Vamidiani.

¹⁸ Navutswa nunundi mwakhakalukhana vandu vi inzu ya tata wanje. Mwiira vaana veve vi shiyayi, nivali makhomi saba voosi khu lichina lilala liele vutswa -- khandi shichila Abimeleki, mwana wivulwa khu mukhali murukwa neye mwiikho wenyu. Neye wa mwamihitsi khuva mwami wa Shekemu.

¹⁹ Niiva kamukholele Gidioni nende vandu vi inzu yeye ni katoto khandi malahi, mwikhoyele Abimeleki, naye yikhoyele mu munyi.

²⁰ Niiva mulambakhana khumuyaanza, nzikombanga ndi mulilu kuruli mu Abimeleki, kusambe vandu va mataala ka Shekemu nende Betsi-milo. Mulilu kwashe khurula mu vandu va mataala ka Shekemu nende Betsi-milo, khali kusambe Abimeleki.”

²¹ Yotsamu yilukha, natsia havundu halaangwangwa Beheri. Yotsamu yamenyayo shichila yali waria amwavo wewe Abimeleki.

²² Abimeleki yamiha Israeli khumihika chivaka.

²³ Nyasaye yalera vuhimwa hakari ha Abimeleki nende vandu vi litaala lia Shekemu, manivamwinjilitsa.

²⁴ Yaka kikholekha khu Abimeleki nende vandu vi litaala lia Shekemu, vatsuva Abimeleki khwiira vaana va Gidioni makhomi saba, khuli shivanzilo.

²⁵ Vandu vi litaala lia Shekemu vavisa vandu mumbulimu khuhinganyinya Abimeleki ikulu wi vikulu, nivarumishila tsingulu khunuula shia mundu wosi wavirilayo shindu shiali nashio. Abimeleki yavoolelwa makhuva khulondokhana khu kenako.

²⁶ Mwana wa Ebedi walaangwangwa Gahali yitsa mu litaala lia Shekemu nende vamwavo veve, khali vandu vi litaala lia Shekemu nivara lisuuvilitswa muye.

²⁷ Voosi vasimukha nivatsia mu milimi chiavo chi misabibu, nivaraanga khwatuula matunda ku musabibu, vayenga idivai khurula khuko khandi nivava nu mulukha. Vinjila mu litempeli lia nyasaye wavo, wa valiilila shiukhulia khandi nivang'wa, khali nivaraanga khuchayilila Abimeleki.

²⁸ Gahali yavoola, “Abimeleki nu mundu shina, khandi vandu vi litaala lia Shekemu ni vandu shina, vanyala khuhuchilila avamihi? Shiali vutswa mwana wa Gidioni khandi Zebuli neye mulondecheli wewe! Kholeli kuuka wenyu Hamori muhinzilu, shichila ni tata wa Shekemu. Shichila shina khukholele Abimeleki muhinzilu?

²⁹ Vwakhavele vulahi inzi nindi mwami wa vandu yava! Nakhamali khale Abimeleki! Nakhamuvoolele, ‘Meeta vasikali vovo voosi viliihe!’ ”

³⁰ Lwa Zebuli wali mwamihi wi litaala lienelo yahulila makhuva ka Gahali mwana wa Ebedi yali navooli, yali nu vurima vululu muno.

³¹ Zebuli yaruma vandu khu Abimeleki, lwa yali nali mu litaala lia Arumaha vamuvoolele, “Gahali nende vamwavo veve vamali khwitsa mu litaala lia Shekemu, khandi vatsitsanga khukhukaya khwinjila mu litaala lienelo.

³² Khulwa yako, yivi mwene nende vandu vovo muliitsa khwitsa mu vutukhu mwivisi mwimilili nu khwivisa mu milimi.

³³ Muliitsa khuvukha mu tsindolo nu kushili mu mavwevwe mamuseere litaala lienelo. Lwa Gahali nende vandu veve valiitsa khumukwana, muliitsa khuvasalilitsa vululu muno!”

³⁴ Abimeleki nende vandu veve voosi vachenda mu vutukhu, nivivisa ihale wene khurula mu litaala lienelo mu vituma vine.

³⁵ Lwa Abimeleki nende vandu veve valola Gahali narulilanga mu shilivwa shi litaala nasinjile ha shilivwa, vavumbulikha khurula havundu ha vali nivivisi.

³⁶ Gahali yavalola navoolela Zebuli, “Lola, vandu vakholomokhanga hasi khurula ikulu wi vikulu!” Zebuli namuvoolela, “Yavo shivali ni vandu tawe; ni vinini vutswa mu vikulu.”

³⁷ Navutswa Gahali yalomoloma khandi navoola, “Lola, vandu vakholomokhanga hasi khurula hakari mu vikulu, khandi shituma shilala shirulilanga khuluveka lu musala ku museno.”

³⁸ Zebuli yamureeva, “Ni hena ha vwichinjililu vwovwo mulilomoloma vuli? Nivi mundu wenyanga umanye vulahi shivune shichilanga nu khukholela mundu Abimeleki uyu muhinzilu. Yava navo vandu va wachayililanga; simukha utsi khuvakwana!”

³⁹ Gahali yasimukha na vandu vi litaala lia Shekemu, nivatsia khukwana Abimeleki.

⁴⁰ Gahali yilukha, ma Abimeleki namulonda. Vandu vanyishi vasalila tsinguma, khali ha shilivwa shi litaala lia Shekemu.

⁴¹ Abimeleki yamenya mu litaala lia Arumaha, ma Zebuli niyilukhanyinya Gahali nende vamwavo veve mu litaala lia Shekemu, khu vavuli khumenyayo.

⁴² Litukhu lialondakhu, Abimeleki yavoolelwa ndi vandu vi litaala lia Shekemu vatsitsanga mu milimi;

⁴³ navukula vandu veve, nakavula mu vituma vivaka, manivivisa mu milimi, nivalindililanga. Lwa yalola vandu nivarulanga mu litaala lia Shekemu, yavumbulukha havundu ha yali niyivisi khwitsa khwiira vandu venavo.

⁴⁴ Lwa Abimeleki halala ni shituma shieshie, vilukhaka vwangu khutsia imbeli khulinda shilivwa shi litaala lia Shekemu, vituma vivili vindi yevo viaseera vandu vali mu milimi, nivaviira voosi.

⁴⁵ Liihe liatsitsachilila khulitukhu liosi. Abimeleki yakumila ni tsingulu litaala lienelo, niyiira vandu, nalisambula, khandi nasalanyinya ichumbi hasi.

⁴⁶ Lwa vandu vosi vali mu Munaara kwa Shekemu vahulila makhuva yaka, vakhava vulindi vulahi mushivisilu shi litempeli lia Baali wi lilakano.

⁴⁷ Lwa Abimeleki yavoolelwa ndi vandu venavo voosi vamali khwakanilaho, himbi khu munaara kwa Shekemu,

⁴⁸ ye mwene nende vandu veve vasimukha nivatsia khunina khu shikulu shia Zalumoni. Yavukula ihaywa nareema tsisia tsiu musala, tsia yachinjila khu maveeka keke. Yavoolela vandu va yali nali navo, “Vwangu! Kholi makhuva ka muloli inzi nikholanga!”

⁴⁹ Vandu voosi vareema tsisia tsi misala nivalonda Abimeleki. Vavavunjitsa mushivisilu, nivashihaambitsa mulilu vandu nivalimu. Vandu voosi vali nivali mu Munaara kwa Shekemu, himbi vandu vasatsa iheelefu indala na vakhali vakhutsa khandi.

⁵⁰ Abimeleki yasimukha natsia mu litaala lia Tsebezi, nalivotokhana khandi nalivukula ni tsingulu.

⁵¹ Khwaliho nu munaara kwi tsingulu tsinyishi, khali shia mundu musatsa wosi inoho mukhali wi litaala lienelo, vimilili va vandu, vilukhaka nivatsiakhu. Viyikalilamu vene manivanina khushisechese.

⁵² Lwa Abimeleki yitsa khuseera munaara, yasimukha natsia khu muliango khuhaambitsa mulilu khu munaara,

⁵³ mundu mukhali yatsakutsa lichina liu khusielelakhu khu murwi kwekwe nilisionola shihanga shiu murwi kwekwe.

⁵⁴ Abimeleki yalaanga vwangu mwana wi shiyayi wali nachinji viuchi vievie viu khukwanila namuvoolela, “Rulitsa shivavi shioshio, unziiri. Shinyenyanga vandu vavoole ndi mundu mukhali neye wanziira tawe.” Mwana wi shiyayi mwenoyo yamurootsa, nakhutsa.

⁵⁵ Lwa Vaisraeli valola ndi Abimeleki umali khukhutsa, vasimukha nivatsia ingo wavo wa varulanga.

⁵⁶ Khulwa yako, Nyasaye yavanzila Abimeleki khulondokhana khu vutamanu vwa yakholela tata wewe, lwa yiira vamwavo veve makhomi saba.

⁵⁷ Nyasaye yakhola khandi vandu vi litaala lia Shekemu khunyakhana, shichila vwoni vwavo, khuli lwa Yotsamu mwana wa Gidioni, yali niyavoola valiitsa khuva lwa ya valaama.