VAKHALACHI 3 - IBIBILIA INDAKATIFU MU LUTIRICHI LWITAKHO NENDE LWISUKHA

Tsimbia Tsiarikala mu Shivala shienesho

¹ Khulwa yako, Mwami Nyasaye yalekha vandu vi tsimbia tsindala mu shivala shienesho khuchelitsa Vaisraeli vali nivashili khutsia khukwanakhu muliihe mu shivala shia Kanaani.

² Yakhola kenako khwechitsa shia likhula lia Vaisraeli makhuva khulondokhana khu liihe, khushila muno khwechitsa vandu vali nivashili khukwanakhu muliihe.

³ Vandu vi tsimbia vali nivalekhwa mu shivala shienesho vali vandu va mataala karanu ka Vafilisti, Vakanaani, Vasidoni, nende Vaahivi vamenyanga mu vikulu via Lebanoni khuraanjila khu Shikulu shia Baali Herimoni khali khutukha Munjila ya Hamaatsi.

⁴ Navo vali nivaheelwa vunyali vu khuchelitsa Vaisraeli khulola niiva Vaisraeli vanyala khulonda malako ku Mwami Nyasaye, ka yali niyaha vakuuka vavo khuvirila khu Musa.

⁵ Vaisraeli vamenya mu Vakanaani, Vaahitse, Vaamori, Vapeerizi, Vaahivi, nende Vayeebusi.

⁶ Vaisraeli vahila vaana vavo vi shikhana khuva vakhali vavo, khali nivavekha vaana vi shikhana vavo khu vaana vavo vi shiyayi; nivarumishila vanyasaye vavo.

Otsienieli

⁷ Vaisraeli vakhola vwoni imbeli wu Mwami Nyasaye. Vivilila Mwami Nyasaye, uli Nyasaye wavo, nivasaala khu Mabaali nende Vashiterotsi.

⁸ Mwami Nyasaye yalolela Vaisraeli vurima, khali nalekha Mwami Kushani Rishatsahimu wa Mesopotamia khuvakwana, khali navamiha khumihika munane.

⁹ Navutswa lwa Vaisraeli valila khu Mwami Nyasaye, Mwami Nyasaye mwenoyo yavarumila mundu wa vahonyinya. Mundu mwenoyo yalaangwangwa Otsienieli mwana wa amwavo mushie wa Kalebu walaangwangwa Kenazi.

¹⁰ Roho wu Mwami Nyasaye yamwimilila, nava mukhalachi wa Israeli. Otsienieli yasimukha natsia khukwana muliihe, khali Mwami Nyasaye namukuurila Mwami Kushani Rishatsahimu wa Mesopotamia.

¹¹ Milembe chiali mu shivala shienesho khumihika makhomi kane, ma Otsienieli nakhutsa.

Ehudi

¹² Vaisraeli vakhola vwoni imbeli wu Mwami Nyasaye. Mwami Nyasaye yachila Mwami Eguloni wa Moabu nakwana Israeli.

¹³ Mwami Eguloni yiyunga na Vaamoni nende Vaamaleki. Vakuura Vaisraeli, nivavukula ni tsingulu litaala lia Yeriko, liali nilili litaala li misala chia mashindu.

¹⁴ Vaisraeli varumishila Mwami Eguloni khumihika likhomi na munane.

¹⁵ Navutswa lwa Vaisraeli valila khu Mwami Nyasaye, Mwami Nyasaye mwenoyo yaruma mundu khuvahonyinya. Mundu mwenoyo yalaangwangwa Ehudi, mundu wali nu mukhono mukhali, mwana wa Gera, khurula mu vandu vuluhia lwa Benyamini. Vaisraeli varuma Ehudi khu Mwami Eguloni wa Moabu ni vihanwa viu khumuha.

¹⁶ Ehudi yalomba shivavi shiuchi mu tsimbeka tsiosi himbi tsisentimita 50. Yali washivoheela khuluveka lu mukhono kwekwe musatsa mukari mwi tsinguvu tsietsie.

¹⁷ Ehudi yahaana vihanwa khu Mwami Eguloni, wali nali mundu mukhomeelu.

¹⁸ Lwa Ehudi yali namali khumuha vihanwa vienevo, yavoolela vandu vali nivavichinji vakalushi ingo wavo.

¹⁹ Navutswa Ehudi mwene yashiamila havundu ha machina kali nikakhongwa himbi mu litaala lia Gilugali, nakalukha khu Mwami Eguloni, namuvoolela, “Mwami Eguloni, ndi ni likhuva lia nyenyanga khukhuvoolela muvwivisi yivi wonyene.” Mwami Eguloni yavoolela varumishi veve, “Ruli munu!” Voosi varula nivatsia ilwanyi.

²⁰ Khulwa yako, lwa Mwami Eguloni yali nashikhaleyo wonyene mu inzu yashindilila yikolofa, Ehudi yisuunda havundu ha yali nali namuvoolela, “Nyoli makhuva khurula khu Nyasaye ka nyenyanga khukhuvoolela.” Nalwo lwa Mwami Eguloni yasinjila.

²¹ Ehudi yasomola shivavi shieshie nu mukhono mukhali, narootsa mundu mu Mwami Eguloni munda.

²² Shivavi shiosi shiavwelela munda mwemwe, khali shindu shiukhukumilila shivavi shiosi nishivwelelamu, ma tsisinya nitsishivisa shiosi. Ehudi yalekha khushikhwesa khurula munda mu Mwami Eguloni; nishirulila mu mukongo kwekwe.

²³ Ehudi yarula ilwanyi, niyikala miliango, narakhu likafuli,

²⁴ narulaho. Varumishi vitsa nivanyola makafuli nikali khu miliango, navutswa vakanakana vutswa ndi Mwami Eguloni yali nali mukari nahulukhanga mwene.

²⁵ Valindilila khu tsisaa tsinyishi khuli vanyala, navutswa shichila yambakhana khwikula muliango, vavukula lufungu nivikula. Muruchi wavo Eguloni yali nalambile hasi, umali khukhutsa.

²⁶ Lwa vali nivashilindanga, Ehudi yilukha. Yavirila havundu ha vali nivakhonganga machina, niyilushila mu litaala lia Sehira.

²⁷ Lwa yali niyakhatukha mu shivala shi vikulu shia Efurahimu, yakhuva shisiliva khulaanga Vaisraeli muliihe; navimilila khukholomokha hasi khurula mu vikulu.

²⁸ Ehudi yavoola, “Munonde! Mwami Nyasaye umali khumuha tsingulu tsiu khukuura vatsiku venyu, nivali Vamoabu.” Valonda Ehudi khukholomokha khutsia khuvukula ni tsingulu havundu ha Vamoabu venyekhanga vakhalakanyile khwambukha Muchela kwa Yorodani. Mundu avulakhuho wa vahuchilila khwambukha muchela kwenoko.

²⁹ Viira Vamoabu himbi tsiheelefu likhomi khulitukhu lienelo. Mundu avulakhuho khali mulala khuvo wa valekha khwiira.

³⁰ Vaisraeli vakuura Vamoabu khulitukhu lienelo. Khwali ni milembe mu shivala shienesho khumihika makhomi munane.

Shamugari

³¹ Mwimilili walondanga Ehudi yalaangwangwa Shamugari mwana wa Anatsi. Khali ye mwene yahonyinya Vaisraeli, lwa yiira Vafilisti tsimia sita nu muchochi kukhulimila kwi tsihili.