VAKHALACHI 20 - IBIBILIA INDAKATIFU MU LUTIRICHI LWITAKHO NENDE LWISUKHA

Vaisraeli Virechekha Khukwana

¹ Vaisraeli voosi khuraanjila mu litaala lia Dani khuluveka luli ivuluka khutukha mu litaala lia Beresheba khuluveka luli ivukwi, vakanila halala. Vakanila imbeli wu Mwami Nyasaye mu litaala lia Mizupa.

² Vimilili va Vaisraeli, voosi vikhala mu visoko viavo mu shikhaalo shia vandu va Nyasaye yishi, khandi vali na vasikali tsiheelefu tsine vachendelanga khu vilenje.

³ (Vandu vuluhia lwa Benyamini vahulila ndi Vaisraeli vatikulushi khutsia mu litaala lia Mizupa.) Vaisraeli nivavoola, “Khuvoolelikhu khuli shindu shitamanu yishi shiakholekha?”

⁴ Mundu warulanga mu vandu vu lwivulu lwa Levi, musatsa mwene mukhali yali niyiirwa yavoola, “Inzi nende mukhali wanje mumenyinywa, khwasimukha nu khwitsa mu litaala lia Gibeha lili mu lusomo lwa Benyamini khukonayo vutukhu.

⁵ Vandu vi litaala lia Gibeha vaseera inzi mu vutukhu khandi nivavotokhana inzu vutukhu. Venyanga khunziira; nikhali vanyeera mukhali wanje mumenyinywa, khali nivamwononyinya, nakhutsa.

⁶ Navukula mmbili kwekwe, nikuremanyinya mu vitonye, khandi nimbana shia shitonye shiu mmbili kwenoko khu shia luhia khu vandu vi tsimbia likhomi na tsivili tsia Israeli. Vandu yava vakholi shikholwa shitamanu khandi shifwavi mu Israeli.

⁷ Voosi vamwitsi hanu ni Vaisraeli. Ni shina shia khutsitsanga khukhola shichila makhuva yaka?”

⁸ Vandu voosi vasinjila khulala nivavoola, “Khali mundu mulala khu khutsi, ave amenyanga mu liheemo inoho munzu, avuli khukalukha ingo.

⁹ Yaka nako ka khutsitsanga khukhola: khutsitsanga khukhuva ikura khurovole valala khu khutsi vanyala khutsia khukwana na vandu vi litaala lia Gibeha.

¹⁰ Vandu likhomi mu imia indala mu Vaisraeli valiitsa khuhaana shiukhulia khu vasikali, khandi vandi valiitsa khutsia khusalilitsa vandu vi litaala lia Gibeha, shichila shikholwa shiavo shi shifwavi shia vakholi mu Israeli.”

¹¹ Vaisraeli voosi vakana halala ninganakani indala yu khutsia khuseera litaala lienelo.

¹² Vandu vi tsimbia tsia Israeli varuma vandu shia havundu hosi mu vandu vuluhia lwa Benyamini khuvoola, “Nu vutamanu shina vwa mukholi yuvu?

¹³ Yirulitsi muhaane vandu vi litaala lia Gibeha vakholi vutamanu, khwiira nu khurulitsa vutamanu vwenovo mu Israeli.” Navutswa vandu vuluhia lwa Benyamini vambakhana khukhola khuli Vaisraeli veshie vali nivavavoolele.

¹⁴ Varula mu mataala koosi nivatsia mu litaala lia Gibeha khukwana Vaisraeli veshie.

¹⁵ Vandu vuluhia lwa Benyamini valaanga halala vwangu vandu tsiheelefu makhomi kavili na sita, niviyavaale vivavi khurula mu mataala kavo, khumeeta khu vandu tsimia saba, vali nivarovolwa khurula mu vandu vi litaala lia Gibeha.

¹⁶ Khurula mu vasikali venavo voosi, khwalimu na vasikali tsimia saba varovolwa vali nu mukhono mukhali; shia mulala khuvo yali wanyala khulesa lichina khu liswi vuchila khutsia haluveka.

¹⁷ Vandu vi tsimbia tsiarikala tsia Israeli vandi valaanga halala vasikali tsiheelefu tsimia tsine, niviyavaale vivavi khutsia khukwana.

Liihe na Vandu Vuluhia lwa Benyamini

¹⁸ Vaisraeli vasimukha nivatsia mu litaala lia Betseli, nivareevishitsa makhuva khu Nyasaye. Vareeva, “Nu luhia shina khu vandu vi tsimbia tsieru luva lukhuraanga khutsia khukwana vandu vuluhia lwa Benyamini?” Mwami Nyasaye yavavoolela “Luhia lwa Yuda nalwo luliitsa khuva lukhuraanga khutsia.”

¹⁹ Litukhu lialondakhu, nu kushili mu mavwevwe, Vaisraeli vasimukha nivatsia khusimiikha maheemo kavo ku khumenyamu himbi mu mataala lia Gibeha.

²⁰ Vasimukha nivatsia khukwana vasikali vuluhia lwa Benyamini, nivasinjilitsa vasikali khuluveka lu khuheenza vulunji mu litaala lienelo.

²¹ Vasikali vuluhia lwa Benyamini varula mu litaala lienelo, khandi lwa vwali nuvushili khwila, vali nivamali khwiira vasikali tsiheelefu makhomi kavili na vavili va Vaisraeli.

²² Navutswa Vaisraeli vatinyilitsana vene khuvene nivatsililila khusinjila havundu ha vali nivasinjilekhu khale yaho, nivaheenzanga vulunji mu litaala lia Gibeha khulitukhu liali liu khuraanga yelo.

²³ Vaisraeli vatikulukha nivatsia khwikhulila imbeli wu Mwami Nyasaye khutukha halukolovo, nivareevishitsa makhuva khu Mwami Nyasaye. Vareeva, “Khutikulushi khutsia khandi khukwana vashieru vandu vuluhia lwa Benyamini?” Mwami Nyasaye yavavoolela, “Tikulushi mutsi khuvakwana.”

²⁴ Vasikali va Vaisraeli vasimukha nivatsia khukwana vandu vuluhia lwa Benyamini.

²⁵ Vasikali vuluhia lwa Benyamini vitsa lwa khavili khurula Gibeha, niviira khulitukhu lienelo vasikali tsiheelefu likhomi na munane va Vaisraeli vali niviyavaale.

²⁶ Nalwo lwa Vaisraeli voosi vatikulukha nivatsia mu litaala lia Betseli khwikhulilayo. Vikhalayo imbeli wu Mwami Nyasaye, vuchila khulia shindu shiosi khutukha halukolovo. Vahaana vihanwa viu khusambwa nende viu khulera milembe khu Mwami Nyasaye.

²⁷ Vaisraeli vareevishitsa makhuva khu Mwami Nyasaye. (Mumatukhu kenako, Lisanduku li Lilakano lia Nyasaye liali nililiho.

²⁸ Finiasi mwana wa Eliazari, wali mwana wa Haruni neye wakholanga muhinzilu imbeli walio.) Vareeva, “Khukalushi khandi khutsi khukwana vandu vuluhia lwa Benyamini inoho khuvuli khutsia khuvakwana?” Mwami Nyasaye yavavoolela, “Tikulushi mutsi khukwana navo. Nzitsanga khumuha tsingulu tsiu khuvakuura khulitukhu lia mukamba.”

²⁹ Vaisraeli vavisa vasikali valala himbi mu litaala lia Gibeha.

³⁰ Vakwana vasikali vuluhia lwa Benyamini khulitukhu lia khavaka, nivasinjilitsa vasikali vavo khuluveka lu khuheenza vulunji mu litaala lia Gibeha, khuli vali nivakholikhu khale.

³¹ Vandu vuluhia lwa Benyamini vitsa khuvakwana khandi ni vilukhanyinywa khurula mu litaala lienelo. Manya khuli lwa vali nivakholi lukhuraanga, varaanga khwiira Vaisraeli valala mu vikuri khu muhaanda kutsitsanga mu litaala lia Betseli, khandi khu muhaanda kutsitsanga Gibeha. Viira himbi va Vaisraeli makhomi kavaka.

³² Vandu vuluhia lwa Benyamini vavoola, “Khumali khuvakuura khuli khwavakuura lukhuraanga yolo.” Navutswa Vaisraeli vali nivaloshitsi khukalukha inyuma, nu khuvarulitsa khurula mu litaala lia Gibeha, khuvalera khu mihaanda.

³³ Lwa vasikali va Israeli voosi varula havundu ha vali nivivisi, vakanila halala mu litaala lia Baali Tamari; vasikali vali nivavotokhane litaala lia Gibeha vilukha vwangu nivatsia mu shivala shi vikulu himbi mu litaala lia Gibeha.

³⁴ Vandu tsiheelefu likhomi, varovolwa vulahi vwene khurula mu Vaisraeli voosi, vaseera litaala lia Gibeha; khandi liihe lilulu muno. Vasikali vuluhia lwa Benyamini vakorwa khumanya vali himbi khwiirwa.

³⁵ Mwami Nyasaye yaha vasikali va Israeli tsingulu tsiu khukuura vasikali vuluhia lwa Benyamini. Vasikali va Israeli viira vasikali va vatsiku vavo tsiheelefu makhomi kavili na varanu khulitukhu lilala lienelo,

³⁶ ma vasikali vuluhia lwa Benyamini nivamanya ndi vakuurilwi. Vasikali vene vutswa va Israeli vakalukha inyuma khurula khu vasikali vuluhia lwa Benyamini, shichila vali nivasuuvilile vandu va vali nivavisi mu litaala lia Gibeha.

Khuli Vasikali va Israeli Vakuura

³⁷ Vasikali venavo vilukhaka vwangu nivatsia mu litaala lia Gibeha; vasalana shia havundu hosi mu litaala lienelo, niviira shia mundu wosi wamenyanga mu litaala lienelo.

³⁸ Vasikali vene vutswa va Israeli halala na vandu vali nivivisi vali vamanyinyane shimanyilu. Lwa valola mwooshi mukali nu kutuumanga khurula mu litaala lienelo,

³⁹ vasikali va Israeli vali nivakwananga vishevukha nivakalukha inyuma. Khutukha khu tsisaa tsienetso, vasikali vuluhia lwa Benyamini vali nivamali khwiira vasikali makhomi kavaka va Israeli. Vavoolelana vene khuvene, “Khumali khuvakuura khuli khwavakuura lukhuraanga lwene.”

⁴⁰ Lwa shimanyilu shienesho shiaranga khulolekha, mwooshi mukali kwene kwaraanga khutuuma khurula mu litaala lienelo. Vasikali vakuheenza lwa vishevukha munyuma, nivachenya lwa valola litaala liosi niliha mbanga mulilu.

⁴¹ Nalwo lwa vasikali va Israeli vavakwana, ma vasikali vuluhia lwa Benyamini nivaraanga khutechela, shichila vali nivamanyi ndi vakhava himbi khukwa mu matiinyu.

⁴² Vilukha khurula khu vasikali va Israeli nivatsia khuluveka luli mwichendanyama, navutswa vakhaywa khwilukha muliihe. Vanyolekhana vali hakari ha vasikali vene va Israeli, khandi vandu vali nivarulanga mu litaala lia Gibeha, nivavativitsa.

⁴³ Vasikali va Israeli vakumila vatsiku vavo, khandi nivavilukhanyinya vuchila khuhulukha, khali khutukha khuluveka luli ivukwi wi litaala lia Gibeha, nivaviira lwa vali ni va vahitsanyinyanga.

⁴⁴ Vasikali tsiheelefu likhomi na munane vuluhia lwa Benyamini viirwa, voosi vali vayechela khukwana.

⁴⁵ Vasikali valala khuvo vilukha nivatsia mwichendanyama khutsia khutukha khu lwanda luli havundu halaangwangwa Rimoni. Vasikali tsiheelefu tsiranu khuvo, viirilwa khu mihaanda. Vasikali va Israeli vatsililila khwilukhanyinya valala khutsia khutukha mu litaala lia Gidomu, haviriila vasikali vuluhia lwa Benyamini tsiheelefu tsivili.

⁴⁶ Vasikali tsiheelefu makhomi karanu na kavili vuluhia lwa Benyamini vakhutsa, voosi vali vayechela khukwana.

⁴⁷ Navutswa vasikali tsimia sita khuvo vilushila mwichendanyama, khutsia khutukha khu lwanda lwa Rimoni, wa vamenya khumieli chine.

⁴⁸ Vaisraeli vakalukha nivakwana vasikali vuluhia lwa Benyamini, nivavativitsa voosi -- vandu vasatsa, vakhali, nende vaana, khali ni miruku chiavo. Vasamba nu mulilu shia litaala liosi havundu henaho.