VAFILIPI 4 - IBIBILIA INDAKATIFU MU LUTIRICHI LWITAKHO NENDE LWISUKHA

Mivaalo

¹ Khulwa yako, vasuuvili vashianje, mwanyanzitsa khandi ndi namahulu ku khumulolakhu! Munombanga mba nu vuyaanzi, nu khwilola shichila munyi! Vasuuvili vashianje va nayaanza, nindio khandi mwenyekhanga musinjile ni tsingulu mu limenya lienyu mu Mwami.

² Eyodia nende Sintike, musayanga numuyaanza muhulishitsane khuli vasuuvili mu Mwami.

³ Khali yivi khandi, muhinzili washianje musuuvilwa, nyenyanga ukhonye vakhali yava; shichila vakhola mihinzilu ni tsingulu ninzi khwilwatsa Ivanjeli, khali Kilementi nende vahinzili vashianje vandi voosi, va mira kavo kahandikwa mu shitabu shiu vulamu.

⁴ Mwikhoyele mu Mwami shia khase khosi. Ngalushilanga khuvoola: Mwikhoyele!

⁵ Nu vulahi numumanyinyi mwoyo ku vuhoma khu shia mundu wosi. Mwami aliitsa khukalukha vwangu yuvu.

⁶ Muvuli khuheendakhu mwoyo khulondokhana khu shia shindu shiosi; navutswa mu lisaala lienyu liosi mureeve Nyasaye shia shindu shiosi shia mwenyanga, shia khase khosi mumureevenje nu mwoyo ku khusanditsa.

⁷ Milembe chirulanga khu Nyasaye, chiavira limanya liosi liu mundu, chilalinda vulahi mioyo chienyu nende tsinganakani tsienyu khuvirila mu Yesu Kristo.

⁸ Mulimalila, vasuuvili vashianje, mure mu tsinganakani tsienyu vindu vinyala khumukhola khwitsominywa; nivili vindu vilondokhana nu vwatoto, vindu vichilanga luyali nu lunyolekha, vindu vichilanga likhola liu vulunji nilikholwa, vindu vichilanga vunihu nu vuvaho, vindu vichilanga vuyaanzi nu vuvaho, khandi vindu vichilanga tsimbavasi nitsivaho.

⁹ Mure mu vikholwa shia shindu shiosi, shia mweka khandi numuhulila khurula khwinzi. Shia shindu shiosi, shia mwahulila khandi numulola nikholanga. Nyasaye uchilanga nu khumenya mu milembe, aliitsa khuva na munyi.

Paulu Yasanditsa Vakristayo va Filipi Shichila Vamukhonya

¹⁰ Ndi nu vuyaanzi vunyishi muno mu Mwami, lwa mwakhanzitsushitsa khukhonya khandi lukhumalilikha. Ni kilikali, mwakhonyanga; navutswa shiumwali mwanyola vwiyangu vu khumanyinya mwenyanga khukhonya tawe.

¹¹ Shinyala khuva mbolanga ndio, shichila nyenyanga mukhonye tawe; navutswa nayinalitsa mwiima ku khwikhutsila mushitititi shiandi nashio.

¹² Namanya vulahi vwene liiva liu khuvula khuva ni shindu, khandi liiva liu khuva navio mu vunyishi khuvira shichelo. Nayeka kaviswa yaka, kave kakholeshe shia havundu hosi, mumatukhu koosi mbe nayinalitsa, kave nayikura inoho ndi ni inzala, inoho khali nindi navio mu vunyishi inoho vitititi.

¹³ Nyala khukhola shia shindu shiosi khuvirila mu woyo uchilanga nimba ni tsingulu.

¹⁴ Navutswa mwakhola vulahi muno, lwa mwakhonya mu vutiinyu vwanje.

¹⁵ Munyi Vafilipi mwamanya vulahi vwene ndi lwa narula mu lusomo lwa Mekadonia mumatukhu ku khuraanga ku khwilwatsa Ivanjeli, munyi navo vandu vi likanisa vonyene vamwakhonya. Munyi navo vonyene va khwasanga navo mu vindu via nanyolelakhu vukhala khandi via nakoritsa.

¹⁶ Khali lwa nali nindi mu litaala lia Tesalonike, mwandumila hali khanyishi vukhonyi.

¹⁷ Shinyala khuva njelitsanga khwenya khunyola vihanwa vionyene tawe; navutswa njelitsanga khwenya khulola vukhala nuvumeeteshi khu livishilu lienyu.

¹⁸ Mali khunyola murungu kwosi, khali khuvira hawenaho. Ndi navio mu vunyishi khuli kenyekhananga, lwa Epafrodita yakhanderela vihanwa vienyu viosi, nivili khuli shindu shihuunyanga mwayu mulahi shimali khukholelwa khuli musango, nu kuli musango kwa Nyasaye yahuchilila khandi kumuyaanzitsanga.

¹⁹ Nyasaye wanje aliitsa khumuha shia shindu shiosi shia mwenyanga khurulana khu vunyishi vu vuhinda vwevwe khuvirila mu Yesu Kristo.

²⁰ Vukhumi vuve khu Nyasaye, uli Tata weru mihika ni mihika! Amina.

Milembe Chiukhumalilikha

²¹ Muhaane milembe khu vandu va Nyasaye voosi mu Yesu Kristo. Vasuuvili vamenyi navo hanu vamuheele milembe chiavo.

²² Vandu va Nyasaye voosi vali hanu vamuheele milembe, khushila muno, vandu varulanga mu inzu yu Mwami wa Roma.

²³ Tsimbavasi tsiu Mwami Yesu Kristo tsive na munyi voosi.