VAFILIPI 3 - IBIBILIA INDAKATIFU MU LUTIRICHI LWITAKHO NENDE LWISUKHA

Likhola liu Vulunji Lirulanga khu Lisuuvila

¹ Mulimalila, vasuuvili vashianje, mwikhoyele mu Mwami! Shindolakhu nu vutamanu khukalushila khuhandika ka namuhandichila khale tawe; shichila kaliitsa khuva nu vukhonyi khu munyi, niiva niitsa khukhola ndio.

² Muchelihi khurula khu yavo vakholanga vindu vitamanu, vali khuli tsisiimbwa; yavo vavoolelanga vandu visalache mivili chiavo.

³ Khutsi navo va khwanyola shishevo shiatoto, navutswa shivali vo vanyola tawe; shichila khusaalanga khu Nyasaye khuvirila mu Roho wewe; khandi khwikhoyelanga mu limenya lieru mu Yesu Kristo. Shiukhuvikhanga lisuuvilitsa lieru mu milukha chilondokhananga nu mmbili tawe.

⁴ Nikava nindio, ni kilikali nakharele lisuuvilitsa lianje mu vindu khuli vienevo. Niiva mundu akanakananga anyala khuvikha lisuuvilitsa lielie mu milukha chilondokhananga nu mmbili, inzi ndi ni vivune vinyishi vichilanga ninganakana ndio.

⁵ Nashevwa khulitukhu lia munane khurula ninzivulwa. Ndi Muisraeli mu vandu vu lwivulu, khurula mu vandu vuluhia lwa Benyamini, mundu wa masahi ka Vahebrania. Nali Mufarisayo khulondokhana na Malako ka Vayahudi;

⁶ khandi nali nayaanzilila khutambitsa likanisa. Khuli mundu anyala khukholwa khuva wi likhola liu vulunji, lwalondanga ka Malako kenyanga, mbulakhu vutamanu vwosi.

⁷ Navutswa vindu viosi via nalolanga khuli nu vukhala khwinzi, mbalitsanga ni shindu khwinzi tawe, shichila Kristo.

⁸ Shivinyala khuva ni vindu vienevo vionyene vutswa tawe; navutswa mbaliitsanga vindu viosi khuvula khuva shindu khwinzi, shichila yeshio shili nu vukhonyi muno, nuvuli vucheli vu khumanya Mwami wanje Yesu Kristo. Nalekha khukhola vindu viosi shichila ye; vivalitsanga viosi khuli nu vuchiafu, khu nyole Kristo

⁹ nu khutsililila khuva muye, vuchila khwikhola khuva wi likhola liu vulunji mwene shichila Malako; navutswa yovo vurulananga khu lisuuvila mu Kristo -- likhola liu vulunji lirulanga khu Nyasaye khandi lirulananga khu lisuuvila.

¹⁰ Nyenyanga khumanya Kristo nende tsingulu tsiachila niyisimushitswa khurula mu likhutsa, khusanga mulinyakhana lielie, mambe khuli ye mu likhutsa lielie

¹¹ khu, nikanyalikha khali inzi mwene nilisimushitswa khurula mu likhutsa.

Khunyola Shihanwa Khurula khu Yesu Kristo

¹² Shinyala khuvoola namala khukuura khale, inoho namala khukholwa khuva museletse khale tawe. Nzilililanga khuchelitsa khuli nyala nyole shihanwa shia Kristo yangurila, lwa yanomba mulonde.

¹³ Vasuuvili vashianje, shinyala khuvoola inzi mwene nanyola khale tawe. Navutswa shindu shilala shia kholanga ni yishi: nu khulekha kali inyuma wanje, nu khuchelitsa ni tsingulu khuli nyala, vuchila khuhaya haya, khu nyole shili imbeli wanje.

¹⁴ Nzilukhakanga vulunji khutukha khushili imbeli wanje, khu nyole shihanwa, nishili mulaango kwa Nyasaye khuvirila mu Yesu Kristo mu vulamu vwi mihika ni mihika.

¹⁵ Khutsi voosi va khwahindila, khuve ninganakani indala yeneyo. Navutswa niiva vandu valala khu munyi vali ninganakani yindi lukanu, Nyasaye aliitsa khumulomba mukamanye havulavu.

¹⁶ Kenyekhanga khulonde mu limenya lieru malako malala mele, ka khwamala khunyola khale.

¹⁷ Vasuuvili vashianje, mukhole ka inzi kholanga; khandi mulonde mwiima kwa vandu vamenyanga khulondokhana khu mwiima mulahi, kwa khwamumanyinya.

¹⁸ Nali namuvoolelakhu hali khanyishi makhuva yaka; khandi nunundi ngalushilanga khumuvoolela nu vuveleli mu mwoyo kwanje. Khuliho na vandu vanyishi vamenyanga khuli vatsiku, shichila likhutsa lia Kristo khu musalaba.

¹⁹ Vilitsa khumalilishila mu shihatisi, shichila musambwa kwavo, nakwo likomba liu mmbili. Vilolelanga ka venyekhanga valole ni tsisoni; khandi vakanakananga vutswa khulondokhana khu vindu vili mu shivala shinu.

²⁰ Navutswa khutsi khuli vandu valiitsa khumenya mwikulu. Khulindililanga nu mwoyo kwosi khulola Muhonyinyi weru, nali Mwami Yesu Kristo khwitsa khurula mwikulu.

²¹ Aliitsa khukalukhanyinya mivili chieru miteteshelo chiu khukhutsa, khuchilomba khusasana nu mmbili kwekwe ku vukhumi, khuvirila mu tsingulu tsichilanga niyamiha shia shindu shiosi.