Biblia Todo Logo
Bìoball air-loidhne

- Sanasan -

VAEFESO 5 - IBIBILIA INDAKATIFU MU LUTIRICHI LWITAKHO NENDE LWISUKHA


Khumenya mu Vulavu

1 Khulwa yako, lwa muli vaana va Nyasaye yayaanza, muchelitsi khuli munyala mumenye khuli ye mwene.

2 Limenya lienyu lienyekhanga live nilimililwangwa nu vuyaanzi, manya khuli Kristo yakhuyaanza, khandi niyihaana khukhutsa shichila khutsi, nava khuli shihanwa shihuunyanga mwayu mulahi khandi musango ku mwayu kuhuunyanga nu kuyaanzitsa Nyasaye.

3 Lwa muli vandu va Nyasaye, shiuvuli vulahi khuhulila makhuva khulondokhana khu mwiima kwi shifwavi shiu khukona halala shiu musatsa nu mukhali nivashili khuhilana inoho miima chindi mitamanu inoho vung'wang'wa khuhulilikhana mu vandu va Nyasaye tawe.

4 Inoho shiuvuli vulahi khulomoloma makhuva kaleranga tsisoni, ku vusilo inoho tsimbakha tsi shifwavi tawe. Nikhali, mwenyekhanga musanditse Nyasaye.

5 Muve nu mumanyi ndi mundu wu kholanga mwiima mutamanu ku musatsa nende mukhali vakholanga nivashili khuhilana inoho shifwavi inoho vung'wang'wa (shichila vung'wang'wa ninjila indala yu khusaala khu misambwa), aliitsa khuvula khunyolakhu vwiyangu mu Vwami vwa Kristo nende vwa Nyasaye.

6 Mundu avuli khumukaatakhu na makhuva ku vuyiingwa. Vindu khuli yivi, navio vichilanga Nyasaye nava nu vurima khu vandu vambakhananga khulonda malako keke.

7 Khulwa yako, leshi khusangana na vandu khuli venavo.

8 Munyi vene mwamenyanga khale mu shisuundi, navutswa nunundi lwa mwakhava vandu vu Mwami, mumenyanga mu vulavu. Mwenyekhanga mumenye khuli vandu vamenyanga mu vulavu;

9 shichila vulavu navwo vuleranga vuhinda vwi shia lichesa liosi lilahi, li likhola liu vulunji nende liatoto.

10 Muchelitsi khweka khukhola ka yaanzitsanga Mwami.

11 Muvuli khusangakhu mu likhola li vindu vivula vukhonyi, via vandu vakholelanga mu shisuundi. Navutswa mwenyekhanga khuvilera havulavu mu vulavu.

12 Khali ni tsisoni muno khulomoloma makhuva khulondokhana khu vindu via vakholanga muvwivisi.

13 Navutswa shia shindu shiosi shilerwangwa mu vulavu, shilolekhanga,

14 shichila vulavu, navwo vuchilanga shia shindu shiosi nishilolekha. Nako kachilanga nikavoolwa: “Yivi mundu ukonanga tsindolo, vukha, khandi wisimushi khurula mu likhutsa; Kristo aliitsa khukhwashila.”

15 Muve vacheli khulondokhana khuli mumenyanga. Muvuli khumenya khuli vandu vavula vusitsa, navutswa mumenye khuli vandu vali nu vusitsa.

16 Murumishile vulahi vwiyangu vwa muli navwo, shichila khumenyanga mumatukhu ka vandu vakholanga vindu vitamanu.

17 Khulwa yako, muvuli khuva vandu vayiingwa; navutswa muchelitsi khukhava mumanye ku Mwami yenyanga mukhole.

18 Muvuli khutandakhu idivai, shichila iliitsa khumwononyinya vutswa; nikhali, leshi Roho atsililile khuva mwoyo mu munyi.

19 Mulomolome khu shia mulala, numurumishilanga makhuva ki tsitsaburi, tsinyimbo nende tsinyimbo tsindakatifu; mwimbe tsinyimbo ni tsitsaburi khu Mwami nu mwoyo ku khwitsominya.

20 Shia khase khosi musanditse Nyasaye, uli Tata khu shia shindu shiosi, khuvirila mu lira liu Mwami weru Yesu Kristo.


Khuli Mukhali nu Musatsa Vamenya

21 Muve vichehitsi, shichila nakhwo khuha Kristo luyali.

22 Munyi vakhali, muve vichehitsi khu vasatsa venyu, khuli mwichehitsilanga Mwami.

23 Mundu musatsa ali nu vunyali khu mukhali wewe, khuli Kristo ali nu vunyali khu likanisa lielie; khandi Kristo mwene neye Muhonyinyi wi likanisa, lili khuli mmbili kwekwe.

24 Khulwa yako, vakhali venyekhanga vichehitsili vasatsa vavo, khuli likanisa lichehitsilanga Kristo.

25 Munyi vasatsa, muyaanze vakhali venyu khuli Kristo yayaanza likanisa, khandi nakhutsa mwene shichila lio;

26 khwenya khulikhola khuva litakatifu, namali khuliochitsa na matsi khuvirila mu likhuva lielie.

27 Kristo yakhola vindu vienevo, khulu khwenya khuva ni likanisa liu vukhumi khandi litakatifu, lili khuli mundu uvula vutamanu vwosi inoho imbala yosi inoho vurima inoho vutamanu vundi vwosi.

28 Vandu vasatsa venyekhanga vayaanze vakhali vavo, khuli vene vayaanza mivili chiavo. Mundu uyaanzanga mukhali wewe, yiyaanzanga mwene.

29 Mundu avulakhuho mwene unyala khuchaya mmbili kwekwe. Nikhali, akuliishitsanga shiukhulia, makulinda vulahi vwene khuli Kristo akholelanga likanisa;

30 shichila khuli vivelo viu mmbili kwekwe.

31 Khuli Mahandiko Matakatifu kavoolanga, “Khulondokhana khu shivune yishi, mundu musatsa aliitsa khulekha tata wewe nende mama wewe, mavahambane nu mukhali wewe; khandi vavili venavo, valiitsa khukwa mmbili mulala.”

32 Khuli na makhuva katoto kaviswa kali mu Mahandiko Matakatifu kenako, kamanyi kavoolanga makhuva khulondokhana khu Kristo nende likanisa.

33 Navutswa kavoolanga khandi makhuva khulondokhana khu munyi: Mundu musatsa yenyekhanga ayaanze mukhali wewe, khuli mwene yiyaanza; khandi mundu mukhali yenyekhanga ahe musatsa wewe luyali.

© The Bible Society of Kenya, 2013

Bible Society of Kenya
Lean sinn:



Sanasan