VAEFESO 4 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Khwitsanga Khuva Mmbili Mulala mu Kristo

¹ Khulwa yako, musayanga numuyaanza, lwandi khuli muvohe wu Mwami, mumenye khulondokhana khuli Nyasaye yenyanga mumenye khurula namulaanga.

² Shia khase khosi muve vichehitsi, vahoma khandi vitsumishitsi. Manyinyi vuyaanzi vwenyu khu shia mulala, vuchila khulolelakhu vandi vurima.

³ Muchelitsi khuli munyala mulole ndi mulindanga vulala vwa Roho ahaananga khuvirila mu milembe, chichilanga numumenya halala.

⁴ Khuliho nu mmbili mulala khandi Roho mulala, khuli khuliho ni lisuuvilitswa lilala liachila Nyasaye namulaanga.

⁵ Khuliho nu Mwami mulala, lisuuvila lilala, libatiswa lilala.

⁶ Khuliho na Nyasaye mulala, uli Tata wa vandu voosi, khandi Mwami wa vandu voosi, wu kholanga muhinzilu khuvirila mu vandu voosi, khandi uli mwoyo mu vandu voosi.

⁷ Shia mulala khu khutsi waheelwa shihanwa shi tsimbavasi shienyekhananga khulondokhana khuli Kristo yamuha.

⁸ Khulwa yako, Mahandiko Matakatifu kavoolanga, “Lwa yatsia ikulu mwikulu, yavukula vandu vanyishi vali nivavohwa; naha vandu vihanwa.”

⁹ Likhuva “Yatsia ikulu mwikulu” nakhwo khuvoola shina? Lukhuraanga lwene livoolanga, yikha mulilova mwene hasi.

¹⁰ Woyo wikha hasi, neye mulala mwele watsia mwikulu, khu ave shia havundu hosi mwikulu nende khulilova.

¹¹ Neye woyo “Wahaana vihanwa”; yarovola valala khuva varumwa, vandi khuva vaprofeti, vainjilisti, vandi khuva vilwatsi, na vandi khuva veechitsi.

¹² Yakhola ndio, khulu khwenya khwirecheshitsa vandu va Nyasaye voosi khukhola muhinzilu ku Vukristayo, khwenya vumbashe mmbili kwa Kristo.

¹³ Khulwa yako, khuliitsa khuhaambana mu vulala vwenovo mu lisuuvila lieru, khandi mu vucheli vweru mu Mwana wa Nyasaye. Khuliitsa khuva vandu vahindila, khu khuve vaseletse khuli Kristo yali museletse.

¹⁴ Shiukhuliitsa khuva khuli vaana vatititi, vachingwangwa na maruundu khandi va imbuutsa ihuutsanga iyi neyo tawe, shichila mechitso karulanga khu vandu vu vuvehi, vachilanga vandu nivakhola vindu vitamanu khurulana khu vupeele vwavo vwa valombanga.

¹⁵ Navutswa, nu khulomoloma katoto khuvirila mu mwoyo ku vuyaanzi, khunyala khuhindila mu shia shindu shiosi mu Kristo, uli khuli murwi ku mmbili.

¹⁶ Khuvirila mu vwimilili vwevwe, vivelo viosi viu mmbili lukanu na lukanu viahaambana halala; khandi mmbili kwosi kwahambanyinywa ni shikuumba shiosi shili khu mmbili kwenoko. Lwa shia shivelo shiosi shikholanga muhinzilu khuli kenyekhanga, mmbili kwosi kuhindilanga, khandi kwiyumbakha kwene khuvirila mu vuyaanzi.

Limenya Liyia mu Kristo

¹⁷ Muchelihitsanga khuvirila mu lira liu Mwami ndi muvuli khutsililila khumenya khuli vandu vi tsimbia tsindi vamenyanga, vavula tsinganakani tsindahi;

¹⁸ khandi vi tsinganakani tsiavo tsili mu shisuundi. Shivaliitsa khusangakhu mu vulamu vwa Nyasaye ahaananga tawe; shichila shindu shivulakhuho shia vamanyi khandi ni vandu vahaaka.

¹⁹ Vavulakhu tsisoni tsiosi tsia valolanga; vakholanga miima mitamanu khandi vakhola vindu vindi vi shifwavi, vuchila khulola ni vindu vi shifwavi.

²⁰ Yaka shikanyala khuva nako kamweka khulondokhana khu Kristo tawe!

²¹ Ni kilikali, mwahulila likhuva khulondokhana khuye; khandi khuli lwa muli valondi veve, mwechitswa katoto kali mu Yesu.

²² Khulwa yako, leshi khumenya limenya lia mwamenyanga khale, liachila numumenya khuli mwamenyanga -- limenya lia khale liononyinywa khuvirila mu likomba liu vuvehi.

²³ Mwenyekhanga khukholwa khuva vayia mu mioyo chienyu, khandi mu tsinganakani tsienyu;

²⁴ ma mumenye limenya liyia, lialoongwa mu likoondo lia Nyasaye, khandi limanyinyanga liene mu limenya liatoto li likhola liu vulunji khandi litakatifu.

²⁵ Khulwa yako, nu vulahi shia mulala khu munyi nalekhane na makhuva ku vuvehi; navutswa alomolome katoto khu mureende wewe, shichila khutsi voosi khuli vivelo viu mmbili mulala.

²⁶ Niiva mundu anyala khuva nu vurima, vurima vwovwo vu khakhwimilila khukhola vwoni, inoho khutsililila khuva nu vurima khutukha lwa liuva liyeela tawe.

²⁷ Muvuli khuha Ibilisi vwiyangu.

²⁸ Mundu wali niyamenya nahuuvanga aleshe khuhuuva; navutswa nu vulahi khukhola muhinzilu na makhono keke mwene, khulu khunyola shiukhulia shianyala khusanga na vamanani.

²⁹ Muleshe khulomoloma makhuva kanyala khusalilitsa vandi; navutswa makhuva kanyala khuvakhonya konyene, khandi kanyala khumbakha nu khuvaha shia venyanga, nikanyalikha makhuva koosi kamuvoola kalikhonya yavo vamuvoolela.

³⁰ Muvuli khuvelelitsa Roho Mutakatifu wa Nyasaye. Roho neye shimanyilu, shimanyinyanga muli vandu va Nyasaye, shiu khumusuuvilitsa ndi Litukhu liliitsa khutukha lia Nyasaye aliitsa khumuvoholola.

³¹ Mulekhane nu vululu vwosi, khwikomba nende vurima. Muvuli khulembana inoho khunyekana. Muvuli khuva ni tsinganakani tsiu khuhimana.

³² Navutswa mulolele vandi mwoyo mulahi khandi kwi tsimbavasi. Musemehane vene khuvene, khuli Nyasaye yamusemeha munyi khuvirila mu Kristo.