VAEFESO 1 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Ninzi Paulu, murumwa wa Yesu Kristo khuvirila khu lienya lia Nyasaye. Mbandichilanga vandu va Nyasaye, vamenyanga mu litaala lia Efeso, nivali vasuuvilwa mu limenya liavo mu Yesu Kristo.

² Nyasaye, uli Tata weru nende Mwami Yesu Kristo vamuhe tsimbavasi nende milembe.

Tsikhaavi tsia Roho tsia Khunyolanga mu Kristo

³ Chendi khusanditsi Nyasaye, uli Tata wu Mwami weru Yesu Kristo! Neye wakhukasitsa lwa yakhuha tsikhaavi tsiosi mu roho khurula mwikulu khuvirila mu Kristo.

⁴ Nyasaye yali wa khurovola khale khuve vandu veve, khuvirila mu Kristo, khali shivala nishishili khuloongwa, khu khuve vatakatifu khandi vandu vavula imbala yosi imbeli wewe. Khurulana khu vuyaanzi vwevwe,

⁵ Nyasaye yali waviritsa khale ndi khuvirila mu Yesu Kristo, alakhukhola khuva vaana veve -- khulondokhana khu vuyaanzi vwevwe nende lienya lielie.

⁶ Chendi khwitsominyi Nyasaye, shichila tsimbavasi tsietsie tsiu vukhumi, khandi shichila shihanwa shia yakhuha shia vutswa, vuchila khurunga khuvirila mu Mwana wewe wayayaanza!

⁷ Khwavohololwa khuvirila mu masahi keke, nakhwo khuvoola, khwasemehwa vwoni vweru khuvirila khu vuhinda vwi tsimbavasi tsia Nyasaye,

⁸ tsia ya khuha mu vunyishi khuvirila mu vusitsa vwevwe vwosi nende limanya lielie.

⁹ Nyasaye ya khumanyinya shia shindu shiosi khuvirila mu vusitsa vwevwe vwosi nende limanya lielie vindu via yali niyavisa khulondokhana khu lienya lielie; khuli lwa yali niyenya kalirweshitswa khuvirila mu Kristo.

¹⁰ Inganakani yeneyo, ni yu khwenya khulera halala vindu viosi via yalomba, viosi vili mwikulu nende vili khulilova, Kristo nali mwimilili wavio, lwa litukhu lia yalaaka liliitsa khutukha.

¹¹ Vindu viosi vikholekhanga khulondokhana khu inganakani ya Nyasaye khandi khuli yenyanga; Nyasaye ya khurovola khuva vandu veve mwene khuvirila mu Kristo, khulondokhana khuli yenyanga, khurulana khu ka yali niyaviritsa khurula muliraanga.

¹² Khutsi, va khwaraanga khuva ni lisuuvilitswa mu Kristo, chendi khwitsominyi vukhumi vwa Nyasaye.

¹³ Khali munyi mwakwa vandu va Nyasaye, lwa mwahulila likhuva liatoto, nili Ivanjeli yachila nu muhonyinywa. Mwasuuvila mu Kristo, khandi Nyasaye navikha shimanyilu shieshie khu munyi, khumanyinya ndi muli vandu veve; lwa yamuha Roho Mutakatifu wa yali ni yalaaka.

¹⁴ Roho neye shimanyilu ndi khuliitsa khunyola shia Nyasaye yalaaka, aliitsa khuha vandu veve; khandi makhuva kenako ka khusuuvilitsanga ndi Nyasaye, aliitsa khuvoholola yavo vali veve munjila yatoto. Chendi khwitsominyi vukhumi vwevwe!

Lisaala lia Paulu

¹⁵ Khulwa yako, khurula nimbulila makhuva khulondokhana khu lisuuvila lienyu mu Mwami Yesu Kristo, khandi khuli mwayaanza vandu va Nyasaye voosi,

¹⁶ nzilililanga khusanditsa Nyasaye shichila munyi. Mwitsushitsanga mu lisaala lianje.

¹⁷ Nyasaye wu Mwami Yesu Kristo, uli Tata wu vukhumi amuhe Roho wewe. Roho mwenoyo aliitsa khumukhola khuva nu vusitsa; nu khumukhola khumanya vulahi vwene Nyasaye.

¹⁸ Saalanga khandi ndi tsinganakani tsienyu tsikukhi, khu mulole vulavu vwevwe, mumanye lisuuvilitswa liachila namulaanga, khuli tsikhaavi tsiu khuchenyinya tsia yalaaka vandu veve tsili tsiu vuhinda;

¹⁹ khandi khuli tsingulu tsietsie tsinyishi, tsikholanga mihinzilu mu khutsi va khwasuuvila. Tsingulu tsikholanga mihinzilu mu khutsi, tsili khuli tsingulu tsiu vunyali vwevwe,

²⁰ vwa yarumishila, lwa yisimushitsa Kristo khurula mu likhutsa; khandi namwikhalitsa mwikulu khuluveka lu mukhono kwekwe musatsa.

²¹ Kristo yamihayo khuvira vamihi vandi voosi vu mwikulu, vu vunyali, vi tsingulu, nende vami; ali ni lira liu vunyali khuvira mira kandi koosi ku vunyali mu shivala shinu, khandi mu shivala shiliitsa khwitsa.

²² Nyasaye waha Kristo tsingulu tsiu khwamiha shia shindu shiosi, khandi wamulomba khuva Mwami uli nu vunyali vu khwamiha shia shindu shiosi, shichila likanisa.

²³ Likanisa nu mmbili kwa Kristo, nilili lirweshitswa lielie lia woyo urweshitsanga mwene shia shindu shiosi shia havundu hosi.