TSINGANU 30 - IBIBILIA INDAKATIFU MU LUTIRICHI LWITAKHO NENDE LWISUKHA

Makhuva ka Aguri Yavoola

¹ Makhuva ka Aguri mwana wa Yakehi yavoola. Mechitso ka yavoolela Itsieli, ni kilikali, Itsieli nende Ukali “Nyasaye ali ihale wene khurula khwinzi, Nyasaye ali ihale wene khurula khwinzi; khandi mbula havundu hanyala khunyola vukhonyi.

² Ni kilikali, ndi vutswa muyiingwa khuvira vandu vandi voosi; Mbulakhu limanya manya khuli liu mundu.

³ Mbulakhu shindu shiosi shia namanya khulondokhana khu vusitsa, inoho vucheli khulondokhana khu Nyasaye Mutakatifu.

⁴ Ni viina watsiakhu mwikulu nakalukha hasi? Ni viina wakumilakhu imbuutsa na makhono keke mele? Ni viina walinjilakhu matsi mu inguvu yeye? Ni viina wraanjitsa mipaka chiosi chiu khulilova? Alaangwangwa viina, khandi lira liu mwana wewe ni viina? Ni kilikali, munyi vene mwamanya!

⁵ “Shia likhuva lirulanga khu Nyasaye ni liatoto; Ali khuli ingavo khu vandu voosi vilushilanga muye.

⁶ Uvuli khumeetakhu likhuva liosi khu makhuva keke, inoho alakhukondeshela khandi akhunyole nuli muvehi.

Tsinganu Tsindi Tsinyishi

⁷ “Yivi Nyasaye wanje, nzikombanga umbe vindu vivili yivi, umbe nishili khukhutsa.

⁸ Unzikalile khukaata inoho khuvoola vuvehi; uvuli khumba vumanani inoho vuhinda, navutswa umbe shiukhulia shianje shia khase khosi.

⁹ Nimbele navio mu vunyishi, nyala khukhwambakhana yivi nimbola, ‘Ni viina Mwami Nyasaye?’ Inoho nyala khuva mumanani, nu khuhuuvila vandu, khwononyinya lira lia Nyasaye wanje.

¹⁰ “Uvuli khumoonyakhu murumishi khu muruchi wewe, nikakhavele kario, anyala khukhusalilitsa, unyoleshe ukholi vutamanu.

¹¹ Khuliho na vandu valaamanga vatata vavo khandi vambakhana khusanditsa vamama vavo.

¹² Khuliho na vandu vivukulanga khuva ni valahi navutswa vatsilililanga khukhola shifwavi.

¹³ Khuliho na vandi -- vivukulanga khuva valahi, vachayanga shia shindu shiosi shia valolanga.

¹⁴ Khuliho na vandu vihonelanga vamanani nende vatakha; nindio khandi vanyolanga shia valia mu limenya liavo.

¹⁵ “Mukhaala kuli na vaana vi shikhana vavili. Valilanga nivavoola, ‘Khuhe! Khuhe!’ Khuliho ni vindu vivaka vinyala khuvula khwikura, vine vinyala khuvula khuvoola, ‘Luvwele’;

¹⁶ Shihatisi, mukhali mukuumba, malova kavulanga khunyalikha matsi, nende mulilu kunyala khuvula khuvoola, ‘Luvwele!’

¹⁷ “Mundu wu kholelanga tata wewe shihenye henye inoho khuchaya mama wewe nali mushele, likhokho liu mu luhoongo liliitsa khumurulitsa tsimoni, inditsu iliitsa khulia tsimoni tsienetso.

¹⁸ “Khuliho ni vindu vivaka viu khuchenyinya viaviswa khwinzi khumanya: ni kilikali, vindu vine via nakorwa:

¹⁹ khuli shilitsa nilipulukhanga mwikulu, inzukha imolakanga khu lwanda, imeli niyelemanga khukhalakanyila mu inyanza, mundu musatsa nu mukhali nivimali khuyaanzana.

²⁰ “Nindi khuli mukhali muheeyi akholanga: aheeyanga, yisinga na matsi, navoola, ‘Mbulakhu shindu shitamanu shiakholi.’

²¹ “Khuliho ni vindu vivaka vichilanga lilova ni litechela:

²² Murukwa wamihitswi khuva mwami, mundu muyiingwa uli ni shiukhulia shinyishi,

²³ mukhali wahimwa nanyoli musatsa unyala khumuhila, khandi murumishi wi shikhana ukalukhananga mukhali wu muruchi wewe.

²⁴ “Khuli ni vindu vine khulilova khunu vili vitititi, navutswa viacheliha vili nu vusitsa vunyishi:

²⁵ Mavalu: kavula tsingulu tsinyishi, navutswa kavunjitsanga shiukhulia mumatukhu ki shimiyu.

²⁶ Vikamania; khali vivula tsingulu; navutswa viumbakhanga tsinzu tsiavo mu lwanda.

²⁷ Tsisichi: tsivula mwami utsiamihanga; navutswa tsiroonjelanga mu vituma mu tsimbaso.

²⁸ Masiakali: munyala khukumila lilala mu makhono kenyu, navutswa kamenya mu tsinzu tsiu vwami.

²⁹ “Khuliho ni vindu vivaka lwa muviheenzanga nivichenda viyaanzitsanga; ni kilikali, khuli ni vindu vine vichendanga vulahi.

³⁰ Isimba, inyama ili ni tsingulu tsinyishi khuvira tsindi tsiosi; khali shinyala khuria inyama yindi tawe;

³¹ imbuli ikhole, itaywa ilakulanga, khandi mwami nasinjile imbeli wa vandu veve.

³² “Khali nikava wali muyiingwa nu khwitsominya mwene, inoho khali nikava waloshitsanga khukhola vindu vitamanu, wilinde mulilomoloma liolio.

³³ Niiva ulavohitsa maveele, unyolanga ichilimi. Niiva ularumula mundu muulu keke, kaliitsa khurula masahi. Niiva ularanga khuva nu vurima, ulakwa mu vutiinyu.”