TSINGANU 27 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Uvuli khwichinjililakhu khulitukhu lia mukamba, shichila uvula vunyali vu khumanya katsitsanga khwikholekha litukhu lienelo nilishili khutukha.

² Lekha vandu vandi vakhwitsominyi yivi, khali vandu vacheni khuvira mwene khwiyitsominywa.

³ Lichina nende muyeeshe vivulakhu vulitoho vwosi nusasanyinya khu vutiinyu vwa vuyiingwa vuleranga.

⁴ Vululu nu vu khusalilitsa, khali vurima vutivitsanga; navutswa ni viina unyala khukuura imbotokha?

⁵ Nu vulahi khuchelihitsa mundu havulavu khuvira khumukaata wamuyaanza.

⁶ Mulina yitsukhananga nakholi, khali niiva alakhusalilitsa; navutswa lwa mutsiku akhukhumbelelanga - uve mucheli!

⁷ Mundu umali khwikura yambakhananga khali vushi vwi tsinzushi, navutswa woyo uli ni inzala, khali shiukhulia shilulu ni shilahi khuye.

⁸ Mundu wahalalila khurula hango hehe ali khuli linyonyi liahalalila khurula mu shitsu shialio.

⁹ Makura ku khwivekha nende vubani vichilanga mundu asangala, navutswa vutiinyu vuvelelitsanga mwoyo ku mundu.

¹⁰ Uvuli khwivililakhu mulina wowo inoho mulina wa tata wowo nende mama wowo; uvuli khutsiakhu khuchendelela mwiikho wowo hango hehe nuli mu vutiinyu. Mureende wa hahimbi nu mulahi khuvira mwiikho wumenyanga ihale wene.

¹¹ Yivi Mwana wanje, uve nu vusitsa, unombe sangale; mbe ni lichipu liu khuchipa mundu wenyanga khunjaya.

¹² Mundu mucheli alolanga maraava nikali imbeli macheliha; navutswa mundu muyiingwa achendanga yinjila muko asalila.

¹³ Mundu muyiingwa ulaakanga khusinjilila likoovi liu mundu mucheni yikopanga, utushili khunuulwa miandu chiechie khulu khurunga likoovi lia yasinjililanga.

¹⁴ Unyala khali khulaama mulina wowo lwa uvukhanga mu tsindolo nu kushili mu mavwevwe nu khumushelitsa milembe ikulu muno.

¹⁵ Mukhali wamenya nalembananga ali khuli imbula ikhuvanga ninyilila.

¹⁶ Unyala khumuhonjelitsa munjila shina? Wachelitsakhu khusinjilitsa vushindu inoho khali khukumilakhu makura mu makhono?

¹⁷ Vandu veekanga khurula khu vandi; khuli shivia shiyakalanga shivia shindi.

¹⁸ Mundu wosi usembelelanga musala kwa makhuyu alalia matunda kakwo. Murumishi ulindanga vulahi muruchi wewe alaheelwa luyali.

¹⁹ Vwoni vwovwo navwo vulolanga nu vulolekha mu matsi, khandi liiva liolio nalio lia ulolanga mu mwoyo kwokwo.

²⁰ Mikomba ku mundu ali nako kali khuli shihatisi - vwiyangu vushilimu khu kandi.

²¹ Mulilu kuchelanga itsahabu nende ifetsa; luyali lu mundu aheelwangwa lunyala khuchelitswa khandi.

²² Khali niiva unyala khurumula mundu muyiingwa, khali ave nali himbi khukhutsa, shiuliitsa khuva nurulitsi vuyiingwa vwosi muye tawe.

²³ Linda vulahi makondi koko nende tsing'ombe tsiotsio khuli unyala khunyala,

²⁴ shichila miandu shichinyala khuvaho mihika ni mihika tawe. Khali vwamihi vwi shivala vuliitsa khuvula khuvaho khumatukhu koosi.

²⁵ Unyala khukhalaaka vunyasi khundulu khwi vikulu nushilindilila vunyasi vundi khumeela.

²⁶ Unyala khulomba tsinguvu tsia wanyola numali khukuulitsa tsindala khu vwoya vwa makondi koko, nukuula mulimi ni tsisenti tsiuliitsa khuva nu wakuulitsilila tsimbuli tsiotsio.

²⁷ Uliitsa khushela maveele khurula mu tsimbuli tsiliitsa khuva nitsirikale, nikali koko nende ka vandu vi inzu yoyo; khandi ka varumishi vovo vi shikhana.