TSINGANU 26 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Luyali khuheelwa mundu muyiingwa ni shikhaya; ali vutswa khuli imbula yi imparafu mumatukhu ki shimiyu, inoho khuli imbula mu tsinyinga tsiu khuchesa.

² Shilaamo shivula shivune shiosi, shivula washikwilanga; shili vutswa khuli liroleletsi lili khu luchendo, khuli iminyi ipulukhanga,

³ Ifarasi irumulwa nu mushaliti, ipunda isukumwa, navutswa khutukha mundu muyiingwa ashiutwi ni shivoko.

⁴ Uvuli khuchipakhu mundu muyiingwa shichila vuyiingwa vwevwe, nukhola ndio, munyala khusasana naye.

⁵ Chipa mundu muyiingwa khulondokhana khu vuyiingwa vwevwe, avuli khwivukula ndi neye uli nu vusitsa khukhuvira.

⁶ Mundu urumanga mundu muyiingwa khuhila havundu likhuva, ali khuli mundu wireemanga vilenje vievie inoho wilerelanga vutiinyu.

⁷ Mundu muyiingwa anyala khurumishila tsinganu khuli lwa yenyanga, khuli mundu wafwokoya arumishilanga vilenje vievie.

⁸ Khuha mundu muyiingwa luyali, kali vutswa khuli uvikhanga lichina mu ifandili.

⁹ Mundu muyiingwa uchelitsanga khurumishila tsinganu, ali vutswa khuli mutandi yihanga livwa mu mukhono kwekwe.

¹⁰ Muruchi usamuliitsanga mundu muyiingwa inoho mutandi, ali khuli mundu ulesanga vura wu salilitsanga shia mundu wosi.

¹¹ Mundu muyiingwa ukalushilanga mu vuyiingwa vwevwe; ali khuli isiimbwa ikalukhananga ilia masali kayo.

¹² Unyala khuva walolakhu mundu wivukulanga ali nu vusitsa? Mundu muyiingwa ali ni lisuuvilitswa khumuvira ye.

¹³ Mundu mukaara avoolanga, “Isimba ili ilwanyi; shinyala khutsiayo tawe.”

¹⁴ Khuli muliango kukalukhanilanga mu vwichapi, nindio khandi mundu mukaara yikalukhanilanga mu shitali shieshie.

¹⁵ Mundu mukaara atuumbanga mu shiukhulia mukhono kwekwe, navutswa avula tsingulu tsiu khulia.

¹⁶ Mundu mukaara yivukulanga khuva nu vusitsa khuvira vandu saba vahaananga vivune vilahi khu ka vavooli vene.

¹⁷ Mundu winjililanga mulilembana likhali lielie ali vutswa khuli mundu ukumilanga maroyi ki isiimbwa iviranga khu muhaanda.

¹⁸ Khuli mulalu avayanga ni tsimemo tsiu mulilu, inoho mivanu chi likhutsa,

¹⁹ nindio khandi ali mundu ukaatanga mureende wewe, navoola, “Kholikhu vutswa!”

²⁰ Vuchila khuva ni tsikhuyi, mulilu kutsimanga; vuchila khumoonyana, khulembana khuvulaho.

²¹ Khuli mandaa inoho tsikhuyi vichilanga mulilu nu kwakha, nindio khandi khuli mundu wayaanza khulembana raanjitsanga khulembana.

²² Makhuva ku mumoonyi kali khuli shiukhulia shilahi; shikholomokhanga nishitsia munda.

²³ Khuli ilaanji yavekhwa khu inyungu yang'ang'anga, nindio khandi khuli makhuva malahi ki likhola litamanu kali.

²⁴ Mundu wu vuhimwa, alomolomanga makhuva malahi, navutswa avisanga vutamanu vwali navwo mu mwoyo kwekwe.

²⁵ Nalomolome vulahi, uvuli khumusuuvila, navutswa wayitsula vuhimwa mu mwoyo kwekwe.

²⁶ Anyala khuvula khumanyinya vuhimwa vwevwe, navutswa likhola lielie litamanu lilamanyikhana khu vandu voosi.

²⁷ Mundu uyeevanga vwina aliitsa khukwamu mwene, khandi woyo ukolongominyanga lichina liliitsa khumukalukha.

²⁸ Mundu uvoolanga vuvehi avulakhu mundu wa yayaanza khu vavoolelanga; khandi woyo ukaatanga vandi na makhuva malahi aleranga litivitswa.