TSINGANU 24 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Uvuli khushendeshiela vandu vatamanu, inoho khwikomba khuva navo;

² shichila vali ninganakani yu khukhola vindu viu khusalilitsa; khandi vavula shindu shilahi shia valomolomakhu.

-20-

³ Inzu yumbakhwangwa khurulana khu vusitsa, khandi isinjilitswangwa khuvirila khu limanya.

⁴ Khuvirila khu vucheli, viiko vitsulitswa vindu viu vukuuli vululu nende vuhinda vu khuyaanzitsa.

-21-

⁵ Nu vulahi khuva nu vusitsa khuvira khuva ni tsingulu; ni kilikali, nu vulahi khuva nu vucheli khuvira khuva ni tsingulu.

⁶ Khali ndio, vwimilili vu vusitsa vuchilanga liihe liraanjitswa, khandi inganakani indahi ya vanyishi vakhukhonyanga ileranga likuura.

⁷ Vusitsa vwatinyila mundu muyiingwa khumanya; avulakhu shianyala khuvoola mu shikhaalo shia vandu.

-23-

⁸ Mundu uloshitsanga khukhola vindu vitamanu, aliitsa khulaangwa mundu ulerelanga vandi vutiinyu.

⁹ Vikholwa viu mundu muyiingwa vileranga vwoni; Mundu uchayanga vandi wasinya shia mundu wosi.

-24-

¹⁰ Niiva uli muteteshele mumatukhu kuli mu matiinyu, ni kilikali, wacheha tsingulu.

-25-

¹¹ Uhonyinyi mundu uhilwangwa khwiirwa vuchila shivune; uvuli khuvalekha khwiirwa.

¹² Unyala khuvoola ndi kavula vukhonyi khu yivi; navutswa Nyasaye wamanya khandi neye ukhalachilanga kali mu mwoyo kwokwo. Neye ulindanga yivi; wakhumanya yivi. Aliitsa khukhurunga khulondokhana khu vikholwa viovio.

-26-

¹³ Yivi Mwana wanje, ukhombe vushi vwi tsinzushi shichila nu vulahi; vushi vurulanga mu mulinga nu vunuuli khukhombwa.

¹⁴ Nindio khandi khuli vusitsa vuli khu yivi; Nuvunyola, uliitsa khuva ni limenya lilahi mumatukhu kitsanga, khandi ulatsililila khuva ni lisuuvilitswa.

-27-

¹⁵ Uvuli khuva khuli mundu mutamanu uli ninganakani yu khwinjilila mundu wi likhola liu vulunji, inoho khumunuula inzu yeye.

¹⁶ Khali niiva mundu wi likhola liu vulunji aliitsa khukwa hasi hali khanyishi, alasinjila; navutswa vandu vatamanu valiitsa khutivitswa khuvirila khu matiinyu.

-28-

¹⁷ Uvuli khusangala lwa mutsiku wowo akwitsanga mu matiinyu; khandi uvuli khuva nu vuyaanzi mu mwoyo kwokwo namali khwisikarila;

¹⁸ shichila Mwami Nyasaye aliitsa khulola kenako, nu khuvula khuyaanzitswa nako; khandi avuli khumusalilitsa khuvirila mu vurima vwevwe.

-29-

¹⁹ Uvuli khuheendakhu mwoyo shichila vandu vakholanga vindu vitamanu, inoho khushendeshela vandu vatamanu;

²⁰ shichila avulakhu shilahi shia nanyole mumatukhu kali imbeli; avula shia alindililanga khulola.

-30-

²¹ Yivi mwana wanje, uhe Mwami Nyasaye nende mwami luyali. Lekhana na vandu va vahinjitsanga;

²² shichila valiitsa khutivitswa vwangu muno; Ni viina wamanya vutiinyu vwa vo vavili valiitsa khuruma?

Tsinganu Tsindi Tsinyishi

²³ Khali vandu vu vusitsa vavoola khale kenako. Khwihonela vandi mulikhalachilwa nu vutamanu.

²⁴ Mundu uvoolelanga mundu mutamanu, “Uvula vutamanu vwosi vwa wakhola,” alanyola shilaamo khurula khu vandu nu khuhimwa na vandu vi tsimbia tsindi;

²⁵ navutswa vandu vasalilitsanga vandu vatamanu valiitsa khuva nu vuyaanzi, khandi tsikhaavi tsindahi tsiliitsa khuvakwila.

²⁶ Mundu uhaananga lichipu liu vulunji lili khuli shimanyilu shiu vulina vwatoto.

²⁷ Uranje khukhola muhinzilu kwokwo. Urecheshitsi shia shindu shioshio shiosi mu mulimi; numali khukhola ndio, unyala khumbakha inzu yoyo.

²⁸ Uvuli khuhaanakhu vushiahidi vwi shikhaywa shichila mureende wowo, inoho khuvoolakhu shindu shiu vuvehi khulondokhana khuye.

²⁹ Uvuli khuvoola, “Namukhola malala mele ka yakholela! Navanzila ka yakhola!”

³⁰ Nachenda nimbirila himbi khu mulimi ku mundu mukaara, himbi ha mulimi kwi misabibu ku mundu muyiingwa.

³¹ Nali ni lichenya lwa nalola kwameela mavwa; mavaanze kali kalandamu shia havundu hosi, khandi lisisi liakwo lia machina liali liasambulwa.

³² Nalwo lwa naheenza, ninganakanakhu, nalola ninyola mivaalo.

³³ Konakhu hati; renjetsakhu hati! Linga halala makhono koko uhulushi!

³⁴ Navutswa umanye ndi nukona tsindolo, vumanani vuliitsa khukhwinjilila khuli munuuli, khandi vutakha khuli mundu wiyavaale viuchi viu khukwanila.