TSINGANU 22 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Nu vulahi khuva ni lira lilahi khuvira miandu minyishi; khandi khuheelwa luyali khuvira ifetsa inoho itsahabu.

² Vahinda nende vamanani vasanganga shindu shilala: Ni kilikali, Mwami Nyasaye neye wa valoonga voosi.

³ Mundu wacheliha alolanga maraava avula khukwamu; navutswa muyiingwa akachayanga nivanyakhana.

⁴ Shihanwa shiu vwichehitsi khandi khuha Mwami Nyasaye luyali, nu khuva ni miandu, khuheelwa luyali nende vulamu.

⁵ Injila ya vandu vakoyanu yayitsula mavwa nende mireeko, vandu venyanga khwihonyinya khutukha vave ihale wene khurula khuyo.

⁶ Mwechitsi vaana khuli vanyala khumenya limenya lilahi, navo nivasakhula, valivula khwivililakhu mu limenya liavo.

⁷ Mundu muhinda yamihanga mumanani, navutswa mundu wikopanga shindu nu murukwa wu mundu wikopitsanga.

⁸ Mundu uranjitsa vindu vitamanu aliitsa khukwa mu matiinyu, khandi tsingulu tsietsie tsiu khukhola vindu vitamanu tsiliitsa khuvwa.

⁹ Mundu uli nu mwoyo ku khuhaana aliitsa khukasitswa, shichila asanganga na vamanani shiukhulia shieshie.

¹⁰ Khunganyinya mundu wi likhola li shihenye henye, lilembana nende manyeko kaliitsa khuva kavwele.

¹¹ Mundu uli nu mwoyo mulahi khandi makhuva malahi, aliitsa khuva mulina wu mwami.

¹² Mwami Nyasaye alindanga vucheli, navutswa ativitsanga vindu via vandu vatamanu valoshitsanga khukhola.

¹³ Mundu mukaara ahonganga hango; avoolanga ndi nikava anyala khutsia ilwanyi isimba ilamwiira.

¹⁴ Lilomoloma liu mukhali muheeyi lili khuli vwina vwatsia hasi musi; mundu wa Nyasaye alolelanga vurima neye uliitsa khukwamu.

¹⁵ Vuyiingwa vuli mu mwoyo ku mwana muti, navutswa numushuti shivoko vuyiingwa vurulanga muye.

¹⁶ Mundu uheetsanga vahinda vihanwa inoho khutambitsa vamanani khwenya khuva muhinda, aliitsa khukwa mumanani.

Livoola lia Vandu Vali nu Vusitsa

¹⁷ Hulishitsa ka vandu vali nu vusitsa vavoolanga; ukare mu mwoyo kwokwo nulondelela vucheli,

¹⁸ shichila uliitsa khuva nu vuyaanzi nukarele mu mwoyo kwokwo, khandi wirecheshe khukarumishila mulilomoloma.

¹⁹ Nyenyanga ure lisuuvilitsa liolio mu Mwami Nyasaye; Nako kachilanga nikhwechitsa nunundi.

²⁰ Mali khukhuhandichila livoola makhomi kavaka, livoola liu khukhuchelihitsa nu khukhukhonya inganakani,

²¹ khwenya khukhukhwechitsa likhola liu vulunji khandi katoto; nikanyalikha uhaane lichipu liatoto khu vandu vali nivakhuruma.

-1-

²² Uvuli khunuulakhu mumanani miandu chiechie shichila nu mumanani, inoho khwihonela mushiina vandu vanyashitswangwa;

²³ shichila Mwami Nyasaye aliitsa khuvayaalila shiyaalo, nu khutivitsa vulamu vwa vandu va vanyashitsanga.

-2-

²⁴ Uvuli khulombakhu vulina nu mundu wi lirima lialeka, inoho khuchenda halala nu mundu mululu.

²⁵ Unyala khweka mwiima kwekwe, nu khuvula khukalukhana mu likhola liolio.

-3-

²⁶ Uvuli khuva mulala khu vandu vayaanza khulaaka, vandu virulitsanga khusinjilila vandu vacheni vali na makoovi.

²⁷ Niiva unyala khukhaywa khurungakhu shindu, vanyala khuvula shitali shioshio shia ukonakhu.

-4-

²⁸ Uvuli khusuundakhu lwakho lwali lwa khale, lwasimiikhwa na vakuuka vovo.

-5-

²⁹ Mundu anyala khuva alikhuho wamanya khukhola muhinzilu kwekwe? Aliitsa khurumishila vami; shialiitsa khurumishila vandu vandi vutswa tawe.