TSINGANU 14 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Mukhali uli nu vusitsa yumbakhanga inzu yeye, navutswa mukhali muyiingwa asambulanga mwene na makhono keke inzu yeye.

² Mundu wumenyanga limenya liu vulunji aheetsanga Mwami Nyasaye luyali, navutswa woyo uli nu mwiima mutamanu amuchayanga.

³ Mundu musilo aliitsa khusalilitswa shichila lilomoloma lielie liu vusilo; navutswa lilomoloma liu mundu uli nu vusitsa liliitsa khumulinda vulahi.

⁴ Vuchila khuva ni tsihili, khuvula lichesa lilahi, navutswa lichesa li viraakwa linyolekhanga shichila tsihili tsiu khulimila.

⁵ Mushiahidi musuuvilwa avoolanga katoto; navutswa mushiahidi muvehi alomolomanga vuvehi.

⁶ Mundu wi shihenye henye akhavanga vusitsa vuchila khuvunyola, navutswa mundu uli nu vucheli anyala khumanya vwangu.

⁷ Rula mu shikhaalo shia vandu vayiingwa, shichila likhuva liu vusitsa linyala khuvula khunyolekhayo.

⁸ Vusitsa vu mundu wacheliha vumukholanga khumanya shia kholanga, navutswa vusilo vu mundu muyiingwa vumukaatanga mwene.

⁹ Vandu vayiingwa vavulakhu liheenda mwoyo liosi nivakholi vwoni, navutswa vandu valahi venyanga khusemehwa.

¹⁰ Mundu neye umanyi khuli asalilanga vululu mu mwoyo kwekwe, mundu mucheni shianyala khusanga mu vuyaanzi vu mundu mwenoyo tawe.

¹¹ Inzu yu mundu mutamanu iliitsa khutivitswa, navutswa liheemo liu mundu wi likhola liu vulunji lilatsililila khuvaho.

¹² Injila yulolekhanga nindahi khu mundu, lukhumalilikha inyala khukhuhila mu likhutsa.

¹³ Khali vandu nivasekhanga, mwoyo nakwo kuvelelanga; navutswa vuyaanzi nu vwakhavwa matiinyu kanyolekhanga.

¹⁴ Mundu mutamanu aliitsa khunyola ka atushili khuheelwa; navutswa mundu mulahi aliitsa khurungwa shihanwa shieshie.

¹⁵ Mundu muyiingwa asuuvilanga mu shia shindu shiosi, navutswa mundu mucheli avukulanga vwiyangu khulola shia ye mwene akholanga.

¹⁶ Mundu uli nu vusitsa nu mucheli khandi alekhananga ni vindu vitamanu, navutswa mundu muyiingwa nu mwangu mu likhola khandi avula shia kholanga.

¹⁷ Mundu uvukulanga vurima vwangu akholanga shindu mu vusilo; navutswa mundu vali nu vucheli yikhutsilanga.

¹⁸ Vandu vayiingwa vanyolanga vusilo; navutswa vandu vacheliha vaheelwangwa vucheli.

¹⁹ Vandu vakholanga vindu vitamanu vasikamilanga vandu valahi; nu khuvareeva nivayaanza vavakholele ka venyanga mu vwichehitsi.

²⁰ Mumanani wayambakhanwa khali nu mureende wewe; navutswa muhinda washila valina vanyishi.

²¹ Mundu uchayanga mureende wewe akholanga vwoni; navutswa ali ni ikhaavi woyo wu kholelanga vamanani kali malahi.

²² Kanyala khuva mundu uloshitsanga khukhola vindu vitamanu neye mutamanu? Yavo vakholanga vindu vilahi navo vayaanzwa khandi vasuuvilwa.

²³ Khuhinzila ni tsingulu mu shia muhinzilu kwosi kuleranga vukhala, navutswa makhuva makhaya kaleranga vumanani.

²⁴ Itaachi ya vandu vali nu vusitsa vanyolanga nu vusitsa vwavo, navutswa vuyiingwa nashio shihanwa shia vayiingwa.

²⁵ Mushiahidi uli watoto ahonyinyanga vulamu vwa vandu, navutswa mushiahidi ulomolomanga vuvehi atsamanga vandu.

²⁶ Khuha Mwami Nyasaye luyali khuchilanga mundu ava ni lisuuvila lilahi muno, khandi vandu vi inzu yeye valiitsa khwilushila muye.

²⁷ Khuha Mwami Nyasaye luyali nakwo musinji ku vulamu, khu mundu alekhane ni mireeko chichilanga likhutsa nilivaho.

²⁸ Mwami anyolanga vukhumi khurulana khu vunyishi vwa vandu va yamihanga; vuchila vandu ye ni shindu tawe.

²⁹ Mundu mwikhutsili ali ni limanya linyishi, navutswa woyo uvukulanga vurima vu vwangu amanyinyanga khuli ali muyiingwa.

³⁰ Mundu umenyi mu milembe avetsanga mulamu, navutswa lishiendekha lili khuli likuule khu mmbili.

³¹ Mundu utambitsanga mumanani anyeekanga muloonji wewe; navutswa mundu wu kholelanga mumanani malahi amuheetsanga luyali.

³² Mundu mutamanu ativitswangwa khuvirila mu likhola lielie litamanu, navutswa vandu valahi valindwangwa vulahi khurulana khu vucheli vwavo.

³³ Vusitsa vunyolekhanga mu mundu uli ni limanya, navutswa mundu muyiingwa wavukorwa.

³⁴ Likhola liu vulunji lichilanga shivala shinyola tsingulu; navutswa vwoni vuchilanga vandu vanyola tsisoni.

³⁵ Murumishi wu kholanga muhinzilu kwekwe nu vusitsa ayaanzitswangwa nu mwami wewe, navutswa asalilitsanga woyo umulerelanga tsisoni.