TSINGANU 12 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Mundu uyaanzanga khuchelihitswa, wayaanza vucheli, navutswa woyo wambakhananga khuchelihitswa nu muyiingwa.

² Mundu mulahi ayaanzitsanga Mwami Nyasaye, navutswa Nyasaye yambakhananga mundu wi likhola litamanu.

³ Mundu mutamanu shianyala khuva wasinjila ni tsingulu khurula khu vutamanu tawe; navutswa mundu wi likhola liu vulunji wasinjila ni tsingulu.

⁴ Mukhali wu mwiima mulahi ali khuli itaachi yu musatsa wewe, navutswa mukhali wi tsisoni khu musatsa wewe ali khuli likuule liu mu vikuumba livula lunyasi.

⁵ Ka mundu wi likhola liu vulunji akanakananga ni katoto; navutswa mechitso ka vandu vatamanu nu ku vuvehi.

⁶ Lilomoloma lia vandu vatamanu lileranga likhutsa, navutswa lilomoloma liu mundu wi likhola liu vulunji lihonyinyanga vandu.

⁷ Vandu vatamanu vakuurwangwa luva luvwele, navutswa vandu vi inzu yu mundu wi likhola liu vulunji valiitsa khutsililila khuvaho.

⁸ Mundu yitsominywangwa khurulana khu vucheli vwevwe vulahi, navutswa mundu musilo achaywangwa.

⁹ Nu vulahi khuva murumishi mwichehitsi wu kholanga mwene muhinzilu kwekwe khuvira khuva mundu wikholanga ali tsingulu tsinyishi navutswa inzala yenyanga khwiira.

¹⁰ Mundu wi likhola liu vulunji alindanga vulahi miruku chiechie, navutswa vandu vatamanu ni valulu khu chiavo.

¹¹ Mundu ulimanga mulimi kwekwe ni tsingulu aliitsa khuchesa shiukhulia mu vunyishi; navutswa woyo umalilanga tsisaa tsietsie khu mihinzilu chi shikhaya avula vucheli.

¹² Vandu vatamanu vikombanga khukhola vindu vitamanu, navutswa vandu vi likhola liu vulunji vatsilililanga khusinjila ni tsingulu.

¹³ Mundu mutamanu areekwangwa khurulana khu lilomoloma lielie liu vwoni, navutswa mundu wi likhola liu vulunji ahonanga khurula mu vutiinyu.

¹⁴ Mundu anyolanga murungu kwekwe khurulana khu lilomoloma lielie lilaho; khandi muhinzilu kwekwe nakwo kumuheetsanga shia yenyi.

¹⁵ Mundu muyiingwa akanakananga shia khase khosi ndi nu wi likhola liu vulunji; navutswa mundu uli nu vusitsa ahulishitsanga inganakani yu mundu amukhonyanga nayo.

¹⁶ Mundu muyiingwa alekanga vwangu, navutswa mundu mucheli yambakhananga khulondelela manyeko.

¹⁷ Mushiahidi watoto avoolanga katoto; navutswa mushiahidi wu vuvehi avoolanga vuvehi.

¹⁸ Lilomoloma li shikhaya lisalilitsanga nilikhalaka vululu khuli shivavi; navutswa makhuva ku mundu uli nu vusitsa alomolomanga kahonyinyanga.

¹⁹ Katoto kahindilanga, navutswa vuvehi shiuvuhindilanga tawe.

²⁰ Vukaati vuli mu mioyo chia vandu vakholanga vindu vitamanu; navutswa yavo valoshitsanga khukhola vindu vilahi vali nu vuyaanzi.

²¹ Shindu shitamanu shivulakhuho shikwilanga mundu wi likhola liu vulunji, navutswa mundu mutamanu avirilanga mu vutiinyu vunyishi.

²² Mwami Nyasaye wayambakhana vandu vavehi, navutswa ayaanzanga vandu vavoolanga katoto.

²³ Mundu mucheli avisanga vucheli vwevwe, navutswa mundu muyiingwa alanditsanga vusilo vwevwe shia havundu hosi.

²⁴ Khukhola muhinzilu ni tsingulu kuchilanga mundu ava mwimilili; khuva mukaara khuchilanga mundu ava murukwa.

²⁵ Liheenda mwoyo lichilanga mundu avula khuyaanzilila mu limenya lielie, navutswa likhuva lilahi limutinyilitsanga.

²⁶ Mundu wi likhola liu vulunji alekhananga ni vindu vitamanu, navutswa ka vandu vatamanu vakholanga kachilanga nivakoyana.

²⁷ Muhiitsi mukaara avulakhu khuli anyala khunyola shia ahiitsanga; navutswa mundu uli ni tsingulu mu muhinzilu kwekwe aliitsa khunyola miandu.

²⁸ Likhola liu vulunji lichilanga mundu atsililila khuva mwoyo, navutswa likhola liu vutamanu lilerelanga mundu likhutsa.