TSINGANU 10 - IBIBILIA INDAKATIFU MU LUTIRICHI LWITAKHO NENDE LWISUKHA

Tsinganu tsia Solomoni

¹ Yitsi natsio tsinganu tsia Solomoni. Mwana uli nu vusitsa ayaanzitsanga tata wewe; navutswa mwana muyiingwa avelelitsanga mwoyo kwa mama wewe.

² Miandu chinyolekhanga munjila indamanu chivula vukhonyi, navutswa likhola liu vulunji lirulitsanga mundu mu likhutsa.

³ Mwami Nyasaye shianyala khulekhakhu vandu vi likhola liu vulunji khuva ni inzala tawe; navutswa yikalilanga vandu vatamanu khunyola via venyanga.

⁴ Vukara vulombanga mundu khuva mumanani, navutswa khukhola mihinzilu ni tsingulu khuchilanga mundu ava ni miandu.

⁵ Mwana uli nu vucheli avunjelitsanga viraakwa mumatukhu ki shimiyu; navutswa mwana ukonanga tsindolo mumatukhu ki lichesa anyolanga tsisoni.

⁶ Mundu wi likhola liu vulunji anyolanga tsikhaavi; navutswa lilomoloma liu mundu mutamanu livisanga tsinganakani tsiu khusalilitsa vandi.

⁷ Khwitsushitsa vandu vi likhola liu vulunji khuli ni tsikhaavi; navutswa vandu vatamanu valiitsa khwivililwa.

⁸ Vandu vu vusitsa valondanga malako; navutswa vandu vilomolominyanga mu vuyiingwa valiitsa khutivitswa.

⁹ Vandu vi likhola liu vulunji vamenyanga vulahi khandi mu vulindi vulahi, navutswa vakoyana mu limenya valiitsa khunyolekhana.

¹⁰ Mundu wikalililanga katoto khuvoolwa achilanga vutiinyu nu vunyolekha, navutswa woyo ukaretsanga havulavu vuchila khuria achilanga milembe chivaho.

¹¹ Makhuva ku mundu wi likhola liu vulunji alomolomanga kali khuli shirula shiu vulamu, navutswa lilomoloma liu mundu mutamanu livisanga liiva lielie liu khusalilitsa.

¹² Vuhimwa vuchilanga lilembana livaho; navutswa vuyaanzi vwikalilanga vutamanu vwosi.

¹³ Mundu uli ni limanya alomolomanga vindu viu vusitsa, navutswa mundu muyiingwa aliitsa khurumulwa ni shivoko.

¹⁴ Vandu vali nu vusitsa vatsilililanga khuva nu vucheli, navutswa lilomoloma lia vandu vayiingwa lichilanga vutiinyu nu vunyolekha.

¹⁵ Miandu nachio chilindanga vandu vahinda; vumanani vuchilanga mumanani ativitswa.

¹⁶ Murungu ku mundu wi likhola liu vulunji kuchilanga anyola vulamu, navutswa ku mundu mutamanu akholanga kachilanga vwoni nu vuvaho.

¹⁷ Mundu uhulishitsanga mivaalo aliitsa khutsililila khuva mwoyo, navutswa yavo vambakhananga khuchelihitswa valiitsa khukwa mu maraava.

¹⁸ Mundu uvisanga vuhimwa nu muvehi, navutswa woyo umoonyanga vandi nu muyiingwa.

¹⁹ Makhuva manyishi nikalomolomwi, vwoni vunyolekhaho, navutswa woyo wiyikalilanga khulomoloma wacheliha.

²⁰ Lilomoloma liu mundu wi likhola liu vulunji lili khuli ifetsa inyukhu; tsinganakani tsiu mundu muyiingwa tsivula vukhala vwosi.

²¹ Lilomoloma liu mundu wi likhola liu vulunji likhonyanga vanyishi; navutswa vandu vayiingwa vakhutsanga shichila ni vasilo.

²² Tsikhaavi tsiu Mwami Nyasaye natsio tsileranga miandu, khandi tsingulu tsiu mundu mu likhola muhinzilu tsivula shia tsimeetakhu.

²³ Mundu muyiingwa akholanga vindu vitamanu khuli nu muvayo khuye, navutswa mundu uli ni limanya akholanga vindu viosi khuvirila mu vusitsa.

²⁴ Shia vandu vatamanu varia, nashio shiliitsa khuvakwila; navutswa shia vandu vi likhola liu vulunji vikombanga, nashio shia valiitsa khunyola.

²⁵ Lwa imbuutsa yi shihungutsi ivetsanga nihuutsa, vandu vatamanu vahuutswa varulaho, navutswa vandu vi likhola liu vulunji vasimiikhwa ni tsingulu mihika ni mihika.

²⁶ Ukhavoolelakhu mundu mukaara akhukholele shindu tawe; aliitsa khuva mululu khuli shilulu khu miino koko inoho khuli mwooshi mu tsimoni tsiotsio.

²⁷ Khuha Mwami Nyasaye luyali, khumeetanga mihika mu limenya; navutswa mihika chia vandu vatamanu chiliitsa khwimbihitswa.

²⁸ Lisuuvilitswa lia vandu vi likhola liu vulunji lichilanga nivasangala; navutswa vandu vatamanu vavula shia valindililanga khunyola.

²⁹ Mwami Nyasaye alindanga vandu vi likhola liu vulunji, navutswa ativitsanga yavo vakholanga vindu vitamanu.

³⁰ Vandu vi likhola liu vulunji valiitsa khulindwa vulahi shia khase khosi, navutswa vandu vatamanu valarulitswa mu shivala.

³¹ Vandu vi likhola liu vulunji valomolomanga makhuva ku vusitsa, navutswa vandu valomolomanga vuvehi valakaywa.

³² Vandu vi likhola liu vulunji valomolomanga ka vamanyi kahuchililwa, navutswa vandu vatamanu vavoolanga shia khase khosi vindu viu khusalilitsa vandi.