TSABURI 95 - IBIBILIA INDAKATIFU MU LUTIRICHI LWITAKHO NENDE LWISUKHA

Lwimbo lu Khwitsominya Nyasaye

¹ Hambi, chendi khwitsominyi Mwami Nyasaye! Chendi khwimbile Nyasaye, ukhulindanga nu vuyaanzi!

² Hambi khuye nu mwoyo ku khusanditsa nu khumwimbila tsinyimbo tsiu khumwitsominya.

³ Mwami Nyasaye ni Nyasaye uli nu vunyali muno, Mwami uli nu vunyali vunyishi muno khuvira vanyasaye vandi voosi.

⁴ Yamihanga lilova liosi, khuraanjila hasi mu luhangaywa khutsia khutukha khu vutoonje ikulu khu vikulu.

⁵ Yamihanga inyanza, ya mwene yalomba; khali lilova, lia ye mwene yalomba.

⁶ Hambi, khumwinamile nu khusaala khuye; hambi khusikamile Mwami Nyasaye wakhuloonga!

⁷ Ni Nyasaye weru; khuli vandu veve valindanga, vali khuli shiayo shieshie shia makondi shia yayitsanga. Hulili ka avoolanga nunundi numuyaanza:

⁸ “Muvuli khuhingana, khuli vakuuka venyu vakhola nivali Meriba, khuli vakhola lwa vamenyanga mu Shiangalangwi shia Masa,

⁹ havundu ha vanjela nu khunjelitsa, khali niiva valola vindu via navakholela.

¹⁰ Nasinyishila vandu venavo khumihika makhomi kane; navoola, ‘Ni vandu vavirililu muno, khandi shivalondanga malako kaanje tawe.’

¹¹ Nali nu vurima khandi ninzisuuha: ‘Shiumuliitsa khwinjila mu shivala shia nali namuha muhulushilimu tawe.’ ”