TSABURI 90 - IBIBILIA INDAKATIFU MU LUTIRICHI LWITAKHO NENDE LWISUKHA

SHITABU SHIA KHANE Vandu Vateteshela Navutswa Nyasaye Nu Witsingulu

¹ Yivi Mwami Nyasaye, uli khuli hango heru, ha khumenyanga khumatukhu koosi.

² Nushili khali khuloonga vikulu inoho khuloonga shivala, shia khase khosi uli Nyasaye, khandi ulatsililila khuva Nyasaye mihika ni mihika.

³ Uvoolelanga mundu, “Kalukha khu malova.” Ma mundu akalukha khu malova ka yarulakhu!

⁴ Mihika iheelefu chili khuli litukhu lilala khu yivi; chili khuli mukolovo, kuvwele yoko, khuli tsisaa tsindititi mu vutukhu.

⁵ Uvuli khukhurulitsaho khuli michelelo chia matsi; shiukhunyala khumenya luhono khuvira malooro tawe. Khuli manya vunyasi vumeelanga mu mavwevwe,

⁶ vumeelanga ma vuneera, khandi vuniala nukhumakana halukolovo.

⁷ Vurima vukhulolelanga vukhumululanga; vululu vwovwo vu khutechelitsanga.

⁸ Wamanya vwoni vweru vwosi, vwoni vweru vwa khukholanga mu vwivisi havundu hulolela.

⁹ Vulamu vweru vwayimbiha shichila vurima vwovwo; vukoranga vwangu khuli miuya.

¹⁰ Mihika chieru chiu khumenya chionyene ni makhomi saba -- inoho mihika makhomi munane, inoho nukhuli nu vulamu vulahi; nikhali mihika chienecho chichilanga khunyola vutiinyu khandi khuva nu vuveleli mu mwoyo; vulamu vweru vuvwetsanga vwangu, makhukhutsa.

¹¹ Ni viina wanyolakhu vutiinyu shichila vurima vwovwo vwa wamulolela? Ni viina wamanya luyali lwa vululu vwovwo vunyala khulera?

¹² Khwechitsi khumanya ndi matukhu keru kayimbiha, khu khuve nu vusitsa.

¹³ Nu luhono shina lutsililila khulola vurima Mwami Nyasaye, lolela varumishi vovo tsimbavasi.

¹⁴ Khumanyinyi havulavu shia mu mavwevwe nu vuyaanzi vwovwo vwi mihika ni mihika, khu khukhwimbile tsinyimbo nu khusangala mu limenya lieru liosi.

¹⁵ Khulombe khusangale khumatukhu manyishi khuli wa khusalilitsa, shichila khwanyola vutiinyu khumihika minyishi.

¹⁶ Saalanga ndi khutsi, va khuli varumishi vovo, khulole vikholwa viovio viu khuchenyinya; manyinya vitsukhulu veru vunyali vu vukhumi vwovwo.

¹⁷ Mwami Nyasaye, uli Nyasaye weru, tsikhaavi tsiotsio tsive na khutsi. Khukhonye khukhole vulahi mihinzilu chieru chiosi!