TSABURI 85 - IBIBILIA INDAKATIFU MU LUTIRICHI LWITAKHO NENDE LWISUKHA

Lisaala liu Khwenya Khumenya mu Milembe

¹ Mwami Nyasaye, nivi wakholela shivala shioshio ki tsimbavasi; nivi wakalushitsila Vaisraeli vuhinda vwavo.

² Nivi wasemeha vandu vovo vwoni vwavo nusisulula vutamanu vwavo.

³ Nivi walekha khuvalolela vurima khali nukumila vululu vwovwo.

⁴ Yivi Nyasaye, uli Muhonyinyi weru, khukalushitsi khuli khwavetsanga, lekha khukhusiinyishila!

⁵ Unyala khutsililila khukhulolela vurima mihika ni mihika? Vurima vwovwo vunyala khutsilila khuvaho khumatukhu koosi?

⁶ Khuhe tsingulu mu vulamu vweru khandi, ma khutsi, va khuli vandu vovo, khutsililile khukhwitsominya.

⁷ Yivi Mwami Nyasaye, khumanyinyi vuyaanzi vwovwo vwi mihika ni mihika, nu khuhonyinya.

⁸ Mbulilanga makhuva ku Mwami Nyasaye avoolanga; akhulaakanga khunyole milembe, khutsi va khuli vandu veve mwene, niiva khulalekha khuva vayiingwa khuli khwavetsanga.

⁹ Ni kilikali, Nyasaye wayirechekha khuhonyinya yavo vamuheetsanga luyali, khali vukhumi vwevwe vutsililile khuva mu shivala shieru.

¹⁰ Vuyaanzi nende vusuuvilwa viliitsa khwakana halala; vulunji nende milembe viliitsa khukhumbelana.

¹¹ Vusuuvilwa vu mundu mu shivala vuliitsa khumanyikhanila mwikulu, khandi likhola liu vulunji liliitsa khumanyikhanila mu shivala.

¹² Ni kilikali, Mwami Nyasaye aliitsa khukhuha vindu vilahi; shivala shieru shilitsa khunyola lichesa linyishi.

¹³ Likhola liu vulunji liliitsa khumwimilila, khandi vuliitsa khumulombela injila yu khulondelakhu.