TSABURI 84 - IBIBILIA INDAKATIFU MU LUTIRICHI LWITAKHO NENDE LWISUKHA

Vali Nikhaavi Vali mu Litempeli lia Nyasaye

¹ Yivi Mwami Nyasaye wi Mikaanda Chiliihe, Litempeli liolio lianyanzitsa muno!

² Nakhavele nu vuyaanzi nindimu! Nzikombanga mbe nindi mu Litempeli liu Mwami Nyasaye; khwimbila Nyasaye uli mwoyo tsinyimbo tsiu vuyaanzi.

³ Khali maroleletsi kayumbakha vitsu, khandi iminyi ili ni shitsu shiayo; ha yalulilanga vaana vayo himbi khu vwaali vwovwo, Mwami Nyasaye wi Mikaanda Chiliihe, nivi uli Mwami wanje khandi Nyasaye wanje.

⁴ Vali ni ikhaavi yavo vali mu Litempeli liolio vakhwitsominyilanga mu tsinyimbo shia khase khosi.

⁵ Vali ni ikhaavi yavo vanyolanga tsingulu khurula khu yivi, vali nu mwoyo ku khutsia khusaala khu Shikulu shia Sayoni.

⁶ Lwa valiitsa khuva nivavirilanga mu luhoongo lumakana lwa Baka, valukholanga lukwa havundu hi virula via matsi; imbula yu khuraanga yitsulanga muvio na matsi ka matavalia.

⁷ Vatsilililanga khuva ni tsingulu tsinyishi; valiitsa khulola Nyasaye wa vanyasaye vandi voosi khu Shikulu shia Sayoni.

⁸ Yivi Mwami Nyasaye wi Mikaanda Chiliihe, hulila lisaala lianje. Nyasaye wa Yakobo, mbulishitsa!

⁹ Nyasaye, kasitsa Mwami weru, nali mwami wa yivi mwene warovola.

¹⁰ Khumenya mu Litempeli liolio litukhu lilala khuviri khumenya havundu handi khumatukhu tsiheelefu; vwakhavele vulahi nisinjile ha shilivwa shi inzu ya Nyasaye wanje khuvira khumenya mu tsingo tsia vandu vatamanu.

¹¹ Mwami Nyasaye neye ukhulindanga khandi nu Mwami wu vukhumi vunyishi muno, akhukholelanga malahi nu khukhuha luyali. Aheetsanga yavo vakholanga likhola liu vulunji vindu vilahi.

¹² Mwami Nyasaye wi Mikaanda Chiliihe, Mundu uli ni lisuuvilitsa mu yivi ali ni ikhaavi!