TSABURI 83 - IBIBILIA INDAKATIFU MU LUTIRICHI LWITAKHO NENDE LWISUKHA

Lisaala liu Khukuurila Vaisraeli Vatsiku

¹ Yivi Nyasaye, nuyaanza lekha khuhonjela; kholakhu shindu, uvuli khwitsumishitsa vutswa!

² Lola! Vatsiku vovo vakholanga shileeche, khandi yavo vakhwambakhana va khuhinganyinyanga.

³ Vakanakananga muvwivisi ka vanyala khukhola vandu vovo; vikhalilanga khwiira yavo vulindanga.

⁴ Vavoolanga, “Hambi khutivitsi shivala shiavo, khu Vaisraeli valikora vutswa!”

⁵ Vikhalilanga khukhola ka vamali khuloshitsa, niviyunga khukhukhumbila:

⁶ nivali vandu vi tsisomo tsia Edomu nende Ishimaeli; vandu vi tsisomo tsia Moabu nende Hagari;

⁷ vandu vi tsimbia tsia Gebali, Amoni, nende Amaleki, khandi va mataala ka Filistia nende Tiro.

⁸ Khali Vashuria viyunga halala khukhonya Vaamoni nende Vamoabu, nivali vitsukhulu va Loti.

⁹ Vakhole khuli wakhola Vamidiani, khuli wakhola Sisera nende Yabini ha Muchela kwa Kishoni.

¹⁰ Wavakuurila havundu halaangwangwa Endori, mivili chiavo nichikuundilaho.

¹¹ Khola vimilili vavo ka wakhola Orebu nende Zehebu; kuura vamihi vavo voosi khuli wakuura Zeba nende Zalumuna,

¹² vavoola, “Khuliitsa khwivukulila vene shivala shia Nyasaye.”

¹³ Yivi Nyasaye wanje, vasalanyinye khuli lukuushi, khuli ikhulio yu vushindu vuhuutsanga.

¹⁴ Khuli mulilu kuyeelitsanga muliru, khuli tsimemo tsihaambitsanga vikulu,

¹⁵ vakhunganyinyi ni imbuutsa yoyo nu khuvatechelitsa nu vushindu vwovwo vululu.

¹⁶ Yivi Mwami Nyasaye, vahe tsisoni, khu vakhuhuchilile uli ni tsingulu.

¹⁷ Vatsililile khunyola tsisoni nivaheenda mwoyo, lekha likhutsa liavo live li tsisoni.

¹⁸ Lekha vakhumanye ndi nivi Mwami Nyasaye wonyene, uli Nyasaye Uli Ikulu khu Viosi shia havundu hosi khulilova.