TSABURI 77 - IBIBILIA INDAKATIFU MU LUTIRICHI LWITAKHO NENDE LWISUKHANyasaye Atinyilitsanga Vandu mu Vutiinyu Vwavo 1 Ndilanga tsikhwili nu mwoyo kwosi khu Nyasaye; ndilanga nayaanza ambulishitsi. 2 Nindi mu vutiinyu khavanga Mwami Nyasaye; njinganga mwikulu makhono kaanje vuchila khuvwa tsingulu vutukhu vwosi nisaala, navutswa shinyala khuleminywa mwoyo tawe. 3 Lwa nganakananga khulondokhana khu Nyasaye, nzirulilanga; lwa mparakhu, khutsanga mwoyo. 4 Anombanga ndeminya mu vutukhu vwosi; mbendanga mwoyo, mbula khuli nomoloma. 5 Nganakananga khulondokhana khumatukhu kavira manzitsushitsa mihika chiali chia khale. 6 Navwelela mu tsinganakani mu vutukhu vwosi; mparakhu, khandi yaka nako ka nireevana mwene: 7 “Mwami Nyasaye aliitsa khukhwambakhana shia khase khosi? Shialiitsa khuyaanzitswakhu na khutsi khandi tawe? 8 Anyala khuva wakhuyaanza khutsi? Lilaaka lielie linyala khuva lishili khurweshitswa? 9 Nyasaye anyala khuva wayivilila khukhulolela tsimbavasi? Vurima vwevwe vwamulomba wayambakhana khukhuvela tsimbavasi?” 10 Nalwo lwa navoola, “Shindu shisalilitsanga muno ni yishi -- ndi Nyasaye Uli Ikulu khu Viosi wamala khuvwa tsingulu.” 11 Yivi Mwami Nyasaye, niitsa khwitsushitsa vikholwa viovio viu khuchenyinya; nakanakanakhu viloleshitsu viovio via wakhola mumatukhu kakhale. 12 Niitsa khukanakanakhu shindu khu koosi ka wakhola; niitsa khuparakhu vikholwa viovio viu vunyali. 13 Yivi Nyasaye, shia shindu shiosi shia wu kholanga ni shitakatifu. Khali nyasaye wundi avulakhuho wi tsingulu khuli yivi. 14 Nivi Nyasaye wu kholanga viloleshitsu; nivi wamanyinya vunyali vwovwo mu vandu vi tsimbia tsindi. 15 Nivi wahonyinya vandu vovo khuvirila mu tsingulu tsiotsio, vitsukhulu va Yakobo nende Yosefu. 16 Khuli mundu akhulolanga aria, nindio khandi matsi kakhulola nikaria; toto, khali luliiva lwi inyanza lwatechela. 17 Imbula yakhuva khurula mu malesi; likulu liahilikana mwikulu, tsimbeni tsi likulu nitsihemukha shia havundu hosi. 18 Likulu liolio liahilikana khuli likaare liolio liu muliihe, ma tsimemo tsi tsimbeni nitsihemukha shia havundu hosi mu shivala; shivala shiatechela khandi nishinuya. 19 Nivi wavirila mu inyanza; wambukha inyanza yu luliiva, navutswa ha wavirila shihalolekha tawe. 20 Nivi wimilila vandu vovo khuli mwayi, Musa nende Haruni khuvasinjilila. |
© The Bible Society of Kenya, 2013
Bible Society of Kenya