TSABURI 69 - IBIBILIA INDAKATIFU MU LUTIRICHI LWITAKHO NENDE LWISUKHAKhulila khu Khwenya Khukhonywa 1 Yivi Nyasaye, mbonyinya! Ndi himbi khwiyinikha mu matsi. 2 Niyinikhanga mu shitohi, khandi mbulakhu havundu hanyala khusinjila; ndi mu luliiva lwa matsi, khandi maruundu ka matsi kambutsanga iyi neyo. 3 Mbwele tsingulu khurulana khu lisaala lianje liu khwenya khukhonywa, khandi ling'ori lianje linumanga. Tsimoni tsianje tsimali khumuuchiha, lwa nindililanga tsikhwili ukhonye. 4 Vandu vanyishi vahimanga inzi vuchila shivune shiosi khuvira liswi lili khu murwi kwanje. Vatsiku vaanje vavoolanga vuvehi khwinzi; vali ni tsingulu khandi venyanga khunziira. Vanomba nimbana vindu viashili khuhuuvakhu. 5 Yivi Nyasaye, wamanya vwoni vwanje; Vusilo vwanje shiuvwaviswa khu yivi tawe. 6 Mwami Nyasaye wi Mikaanda Chiliihe, ukhalekha vandu vali ni lisuuvilitswa mu yivi khuheelwa tsisoni shichila inzi tawe. Nyasaye wa Israeli, ukhambuchilila nomolomele yavo vasaalanga khu yivi makhuva matamanu tawe! 7 Mali khunyekwa shichila yivi khandi mali khunyola tsisoni. 8 Nakwa vutswa khuli mundu mucheni khu vamwavo vaanje, khuli mundu urulanga mu vandu vuluhia lundi khu vandu vu munzu mweru. 9 Vuyaanzi vwanje khu Litempeli liolio vusambanga khuli mulilu; lwa vakhunyekanga vanyekanga inzi khandi. 10 Nzichehitsanga mwene lwambonganga vuchila khulia shiukhulia, navutswa vandu vanyekanga. 11 Lwa nzifwalanga tsinguvu tsia makunia, vandu vasekhanga. 12 Valomolomanga khulondokhana khwinzi mu tsinjila tsi litaala, khandi vatandi vakhuva lukanu lu khukholela shihenye henye. 13 Navutswa Mwami Nyasaye, inzi nasaala khu yivi; Nyasaye, khonya mu isaa yulolanga ulakhonya. Khonya shichila vuyaanzi vwovwo vwi tsingulu, khandi shichila urweshitsanga lilaaka liolio liu khuhonyinya. 14 Khonya mbuli khwiyinikha mu shitohi; ninda mu milembe khurula mu vatsiku vaanje, khulindwa mu milembe khurula mu matsi ku luliiva. 15 Ukhahuchililakhu matsi ki michelelo kambilane tawe; ukhahuchililakhu nziyinishi mu luliiva inoho khukhutsa tawe. 16 Mwami Nyasaye, khonya khuvirila mu vulahi vu vuyaanzi vwovwo vwi mihika ni mihika; khonya khuvirila mu tsimbavasi tsiotsio tsiu khuchenyinya! 17 Lekha khwivililakhu murumishi wowo; ndi mu vutiinyu muno -- khonya vwangu! 18 Hamba himbi umbonyinyi; khonya khurula khu vatsiku vaanje. 19 Nivi wamanya khuli vanyekanga, khuli mbukulwangwa vutamanu nu khukholwa tsisoni; wamanya vatsiku vaanje voosi. 20 Manyeko kamali khumbelelitsa mu mwoyo kwanje, khandi mbendanga mwoyo. Nakanakana nalolelwa tsimbavasi, navutswa shinalolelwa tawe; nakanakana naleminywa mwoyo, navutswa mundu avulakhuho waneminyakhu mwoyo. 21 Lwa nali ni inzala, vamba isuumu; lwa nali nu vuluhu, vamba idivai indulu ng'wi! 22 Saalanga ndi milukha chiavo chiu khulia chivativitsi; Saalanga ndi milukha chiavo mitakatifu chivamululi. 23 Vavekhulitsi! Vakokhominywi mikongo shia khase khosi! 24 Valolele vurima; vasalilitse mu vululu vwovwo. 25 Tivitsa maheemo kavo ka vamenyamu; ukhahuchililakhu mundu khumenya mu maheemo kavo tawe. 26 Vatambitsanga yavo va wasalilitsa; nivalomoloma khulinyakhana lia yavo va warumula. 27 Tsililila khumeeta vwoni vwavo khu vundi; ukhavahonyinyakhu khali hatititi hene tawe. 28 Saalanga ndi mira kavo karulitswi mu shitabu shiu vulamu khandi vavuli khuvalitswa mu vandu vi likhola liu vulunji. 29 Navutswa salilanga vululu khandi ndi mu vutiinyu; Nyasaye, ninda khandi umbonyinyi! 30 Niitsa khwimba lwimbo lu khwitsominya Nyasaye; mamuhe vukhumi nu mwoyo ku khusanditsa. 31 Yaka kalayaanzitsa Mwami Nyasaye khuvira khumusinzila ing'ombe, khuvira khumukholela musango kwi ichilishi. 32 Lwa vandu vatambitswangwa valola kenako, valasangala; yavo vasaalanga khu Nyasaye valatinyilitswa mioyo. 33 Mwami Nyasaye akhonyanga vandu vavula shindu shiosi khandi shianyala khwivilila vandu veve mucheela tawe. 34 Shia shindu shiosi shili mwikulu khandi khulilova, vindu viosi vili mu inyanza, vitsominyi Nyasaye. 35 Nyasaye aliitsa khuhonyinya vandu vamenyanga mu Sayoni nu khumbakha khandi vuyia mataala ka Yuda. Vandu veve valiitsa khumenyayo nivavukula shivala shienesho khuva shiavo, 36 vitsukhulu va varumishi veve valamenyamu, khandi yavo vamuyaanza valiitsa khumenyayo. |
© The Bible Society of Kenya, 2013
Bible Society of Kenya