TSABURI 68 - IBIBILIA INDAKATIFU MU LUTIRICHI LWITAKHO NENDE LWISUKHA

Nyasaye Alakuura Liihe

¹ Vwakhavele vulahi Nyasaye namanyinyi vunyali vwevwe, nu khusalanyinya vatsiku veve; vwakhavele vulahi yavo vamuhimanga vilushi nivakuurwa.

² Khuli vushindu vuhuutsanga mwooshi, nindio avahuutsanga; khuli lubila luyekukhanga khu mulilu, khali nindio vwakhavele vulahi vandu vatamanu khukhutsila imbeli wa Nyasaye.

³ Navutswa vandu vi likhola liu vulunji vasangale ma vikhoye imbeli wa Nyasaye nu vuyaanzi khandi vakhuvanga liyooko liu vuyaanzi.

⁴ Mwimbile Nyasaye, mumwimbile lwimbo lu khwitsominya lira lielie; lombeli woyo uchendelanga khu malesi injila. Lira lielie nu Mwami Nyasaye -- musangale numuli imbeli wewe.

⁵ Nyasaye uli mwoyo mu Litempeli lielie Litakatifu, ni tata wa vavisandu khandi alindanga vulahi vakhutsakhali.

⁶ Aheetsanga vandu vavula ha vamenya inzu yavamenyamu navutswa achila vavohe vava nu vuyaanzi shichila vakholelwi khuva vavoholole, navutswa vandu vahingani valiitsa khumenya mu shivala shiumakana.

⁷ Yivi Nyasaye, lwa wimilila vandu vovo, lwa wachenda chenda khukhalakanyila mu shiangalangwi,

⁸ shivala shiatechela, imbula nikhuva, shichila khwitsa khwa Nyasaye wi Shikulu shia Sinai, khwitsa khwa Nyasaye wa Israeli.

⁹ Nivi wachila imbula inyishi nikhuva khandi shivala shioshio shiumakana nishinyola matsi khandi;

¹⁰ Vandu vovo vumbakhamu tsinzu tsiavo; nivi wahaana shiukhulia khu Vamanani shichila uli mulahi.

¹¹ Mwami Nyasaye yahaana lilako, ma vakhali vanyishi nivalanditsa makhuva:

¹² “Vami halala na vasikali vavo viliihe vilukhanga!” Vandu vakhali vu mungo vakavana vindu via vali nivanyoli khurula muliihe:

¹³ vindu khuli vituti viakhunikhwa nifetsa. Via mavaha kang'ang'anga khuli itsahabu inyukhu. Shichila shina vandu valala khu munyi nivarikala mu viiko via makondi khulitukhu liliihe

¹⁴ Lwa Mwami Nyasaye yasalanyinya vami khu Shikulu shia Zalumoni, yachila machina ki imparafu nikaroonyayo.

¹⁵ Yivi Shikulu shia Bashani, nivi uli shikulu shiraambi, shikulu shiu rukulu runyishi!

¹⁶ Shikulu shiurukulu runyishi, shichila shina ushendeshelanga shikulu shia Nyasaye yarovola khumenyamu? Mwami Nyasaye aliitsa khumenyamu mihika ni mihika!

¹⁷ Mwami Nyasaye arulanga mu Shikulu shia Sinai khwitsa havundu hehe Hatakatifu na makaare ki tsifarasi tsietsie tsiu khukwanila.

¹⁸ Atikulukhanga natsia hikulu na vandu vavohe; anyolanga vihanwa khurula khu vandu vahingani. Mwami Nyasaye aliitsa khumenyayo.

¹⁹ Khwitsominyi Mwami Nyasaye, ukhuchinjilanga misiko chieru militoho shia litukhu; neye Nyasaye ukhuhonyinyanga.

²⁰ Nyasaye weru ni Nyasaye ukhuhonyinyanga; Mwami Nyasaye neye ukhuhonyinyanga khurula mu likhutsa.

²¹ Navutswa ni katoto Nyasaye alasionola mirwi chia vatsiku veve, chia yavo vatsilililanga khukhola vwoni.

²² Mwami Nyasaye umali khuvoola, “Niitsa khulera vatsiku venyu khukalukha khurula Bashani, niitsa khuvarulitsa mu luliiva lwi inyanza,

²³ khu nikanyalikha muliseena mumusahi kwavo, khandi tsisiimbwa tsienyu tsilikhomba masahi kavo hali khanyishi khutukha lwa tsiliitsa khwikura.”

²⁴ Nyasaye, vandu voosi valolanga khuli khuchendanga nu khumali khukuura vatsiku veru, khuchenda khwa Nyasaye, uli Mwami wanje, khutsia khwinjila Havundu Hatakatifu.

²⁵ Vandu vu khwimba tsinyimbo imbeli, vu vukhana inyuma, vaana vi shikhana vakhuvanga manyanga hakari havo.

²⁶ “Mwitsominyile Nyasaye havundu ha vandu veve valiitsa khwakanila; munyi vitsukhulu va Yakobo voosi, mwitsominye Mwami Nyasaye!”

²⁷ Luhia lwa Benyamini, nululi lutititi mu tsiosi, nalwo lukhuraanga khwitsa, vimilili vu luhia lwa Yuda halala ni shituma shiavo shia vandu navo valondakhu, vimilili vu luhia lwa Zabuloni nende luhia lwa Nafutali nivali inyuma wavo.

²⁸ Yivi Nyasaye, manyinya tsingulu tsiotsio, tsingulu tsia wakhumanyinyakhu

²⁹ khurulila mu Litempeli mu Yerusalemi, mwa vami vakhulerelanga vihanwa.

³⁰ Kondeshela Vamisri, vali khuli kunyama kumbulimu kumenyanga mu vitundu; kondeshela vandu vi tsimbia tsindi, vali khuli shituma shi tsichilishi ni vimoli viatsio, khutukha lwa vakhusikamila khandi vakhuhe mikasa chiavo. Salanyinya vandu vayaanza liihe yavo!

³¹ Vimilili valiitsa khwitsa khurula Misri; vandu Vaetsopia valiitsa khusaala khu Nyasaye nivachinga makhono kavo mwikulu.

³² Vami vamihanga shivala, mwimbile Nyasaye lwimbo, mwitsominyile Mwami Nyasaye mu tsinyimbo,

³³ khu woyo uchendelanga khu malesi, malesi kali kakhale mumuhulile, lwa akhuvanga liyooko liu mwoyo mukali muno.

³⁴ Landitsi makhuva khulondokhana khu tsingulu tsia Nyasaye; Mwami wamihanga Vaisraeli, vunyali vwevwe vuli mu malesi.

³⁵ Nyasaye wa Israeli nu witsingulu tsinyishi nu vunyali mu Litempeli lielie, khandi akhulombanga khuva ni tsingulu nende vunyali. Khwitsominyi Nyasaye!