TSABURI 56 - IBIBILIA INDAKATIFU MU LUTIRICHI LWITAKHO NENDE LWISUKHA

Lisaala liu Khusuuvila mu Nyasaye

¹ Yivi Nyasaye, ndolela tsimbavasi, shichila vandu vangwananga; vatsiku vaanje vandambitsanga shia litukhu.

² Vatsiku vaanje vangwananga mbasu kwosi. Ni vanyishi vangwananga mu vwiloli vwavo.

³ Lwa ndanganga khuria, suuvililanga mu yivi.

⁴ Suuvililanga mu Nyasaye wa nzitsominyanga, mu Nyasaye vuchila khuria. Ni shina shiu mundu utushili khukhutsa anyala khukhola inzi?

⁵ Vatsiku vaanje vakhavanga khusalilitsa shia litukhu; vanzenyelanga shivi.

⁶ Vakanilanga halala, nivali muvwivisi, nivaheenzishitsa shia shindu shiosi shia kholanga. Valindililanga khunziira.

⁷ Nyasaye, vasalilitse shichila vindu vitamanu viavo; kuura vandu venavo khuvirila mu vurima vwovwo!

⁸ Nivi wamanya khuli mbirilanga mu vutiinyu; khali wavalitsa khulila khwanje. Kosi kanyala khuva kahandikwa mu shitabu shioshio?

⁹ Shia isaa yosi yasaalanga khu yivi, vatsiku vaanje vakalushitswangwa inyuma. Manyi ndi toto Nyasaye ali ninzi --

¹⁰ Suuvililanga mu Nyasaye, wa nzitsominyanga likhuva lielie, mu Mwami Nyasaye, wa nzitsominyanga likhuva lielie.

¹¹ Lisuuvilitsa lianje lili mu Nyasaye vuchila khuria. Ni shina shiu mundu anyala khukhola khwinzi?

¹² Nyasaye, khutukha khukholele ka nalaaka; nakhuha shihanwa shianje shiu khukhusanditsa,

¹³ shichila nivi wandulitsa mu likhutsa nukhonya khuvula khukuurwa. Khulwa yako, njendanga imbeli wa Nyasaye mu vulavu vuhaananga vulamu.